قىزىلاعاشتاعى تاسقىننىڭ سالدارىنان زارداپ شەككەن ەلدى مەكەندەردىڭ قاتارىندا ەگىنسۋ دا بار. قىزىلاعاشتىقتاردىڭ مۇقتاجدىقتارىنا بايلانىستى قۇرىلىس قارقىندى باستالىپ, بۇگىندە تۇرعىندار باسپانالى بولىپ, جۇمىس ناتيجە بەرە باستادى. ەندى ەگىنسۋلىقتاردىڭ جاعدايىن ءجىتى باقىلاعان وبلىس اكىمى سەرىك ۇمبەتوۆ ەگىنسۋ اۋىلىندا بولىپ, ەلدى مەكەندەگى قالپىنا كەلتىرۋ جۇمىستارىنىڭ بارىسىمەن تانىستى.
بۇعان دەيىن مۇندا قازاق قۇرىلىس جانە ارحيتەكتۋرا, سەيسمولوگيا عىلىمي زەرتتەۋ ينستيتۋتىنىڭ ماماندارى تاسقىن سالدارىنان زارداپ شەككەن تۇرعىن ۇيلەردىڭ بۇگىنگى جاعدايىن زەرتتەپ, ناقتى قورىتىندى شىعارىپتى. اۋىلداعى 75 ءۇي وسىنداي تەكسەرۋدەن ءوتىپ, قورىتىندى بويىنشا 21 ءۇي بۇزىلۋعا جانە جاڭادان سالىنۋعا جاتاتىندىعى, ال 54 ءۇي كۇردەلى ءجوندەۋدى قاجەت ەتەتىندىگى اتاپ كورسەتىلگەن. وسىعان بايلانىستى مۇنداعى قۇرىلىس جۇمىستارى قالىپتى جۇرگىزىلۋدە دەۋگە بولادى.
قازىرگى كەزدە اۋىلداعى 12 ءۇيدىڭ شاتىرى جابىلىپ, 14 ءۇيدىڭ قابىرعاسى قالانعان. قۇرىلىسى اياقتالۋعا جاقىن العاشقى 3 ءۇي 15 مامىردا پايدالانۋعا بەرىلەدى دەپ كۇتىلۋدە. بۇل ۇيلەردىڭ ىشكى ارلەۋ جانە اۋلالارىن اباتتاندىرۋ جۇمىستارى قالىپتى. ال قالعان ۇيلەردىڭ قۇرىلىسىن جەدەل جۇرگىزىپ, شىلدەنىڭ بىرىنە دەيىن بەرۋ بەلگىلەنگەن. وعان 7 مەردىگەر كومپانيا تارتىلسا, ولاردا 400-گە جۋىق قۇرىلىسشى جۇمىس ىستەۋدە.
اۋىلداعى زارداپ ششەككەن نىسانداردىڭ قاتارىندا 640 ورىندىق مەكتەپ پەن بالا باقشا دا بار. مۇندا دا كۇردەلى جوندەۋ جۇمىستارى ەتەك الىپتى. سونداي-اك فەلدشەرلىك-امبۋلاتوريالىق قوسىن مەن ءمالدارىگەرلىك ەمدەۋ ورنىنىڭ عيماراتتارى دا جاڭادان بوي كوتەرۋدە. جاس ۇرپاققا ساپالى ءبىلىم بەرەتىن مەكتەپتەگى قولعا الىنعان قۇرىلىس جۇمىستارىن ارالاعان وبلىس اكىمى مۇنداعى اتقارىلعان جۇمىستارعا باعاسىن بەرىپ, قۇرىلىستىڭ مەيلىنشە ساپالى اتقارىلۋىن تالاپ ەتتى. سونىمەن قاتار ول ءبىلىم شاڭىراعىن وقۋشى پارتاسىنان باستاپ, كومپيۋتەر مەن بارلىق وقۋ ۇدەرىسىنە قاجەتتى قۇرال-جابدىقتارمەن قامتاماسىز ەتۋدى تاپسىردى.
وبلىس اكىمى تۇرعىندارمەن كەزدەسىپ, ولاردىڭ ساۋالدارىنا جاۋاپ قايتاردى. ولاردىڭ قاتارىندا باسپانالارىن جاڭادان سالۋدى وتىنگەندەر دە بار. وعان بايلانىستى وبلىس باسشىسى قازاق قۇرىلىس جانە ارحيتەكتۋرا, سەيسمولوگيا عىلىمي زەرتتەۋ ينستيتۋتىنىڭ ماماندارى ءجۇرگىزگەن جۇمىس قورىتىندىسى باسشىلىققا الىناتىنىن ءتۇسىندىردى.
حالىق باستارىنا تۇسكەن اۋىرتپالىقتى بىرگە بولىسكەن بارشا جۇرتشىلىققا ريزاشىلىقتارىن دا ايتتى. اسىرەسە, اپاتتىڭ الدىن الۋدا مەملەكەت باسشىسى جەدەل شەشىم قابىلداپ, ۇكىمەتتەن قارجى ءبولدىرىپ, جۇمىستى ءجىتى قاداعالاعانىنا العىستارىن ءبىلدىردى. ءبىز مۇنداي قيىندىقتى ءوز كۇشىمىزبەن كوتەرە المايتىن ەدىك. مىناداي كۇردەلى جوندەۋ جۇمىستارىن جاساي المايتىنىمىز انىق. مەملەكەتتىڭ كومەگىنىڭ ارقاسىندا ۇيلەرىمىز تاسقىنعا دەيىنگى قالپىنان الدەقايدا جاقساردى. اۋىل جاڭا كەيىپكە ەنىپ, ساۋلەتتەنە تۇسەتىن بولدى, دەدى تۇرعىندار بىزبەن اڭگىمەسىندە.
كۇمىسجان بايجان, الماتى وبلىسى.