پرەزيدەنتتىڭ جولداۋىنان كەيىن ەلدە جاڭا قازاقستاننىڭ بولاشاعىنا دەگەن نىق سەنىم پايدا بولدى.
جولداۋدى ۋنيۆەرسيتەتتىڭ پروفەسسور-وقىتۋشى قۇرامى, ستۋدەنتتەر, بارلىعىمىز ۇلكەن ىنتامەن تىڭدادىق. شىن مانىندە ومىرىمىزدەگى ءىرى ساياسي وقيعا بولدى دەپ ەسەپتەيمىز. وبلىس بولۋ ماسەلەسىن ءبارىمىز بۇرىننان ايتىپ جۇرگەن ەدىك. بىراق مىناۋ پاندەميا دەگەن باس كوتەرتپەي تۇرعان كەزدە قاباتتاستىرمايىق دەيتىنبىز. ونىڭ ۇستىنە قاڭتارداعى مەملەكەتتىك توڭكەرىس جاساۋعا ۇمتىلعان سودىرلاردىڭ سويقانى تاعى ءبىر ەڭسەمىزدى تۇسىرسە, اينالامىزداعى گەوساياسي جاعداي دا اسا قيىن ەكەندىگىن بىلەسىزدەر. شىنىمىزدى ايتساق, الاعاي-بۇلاعاي كەزدە جاعدايىمىزدى ايتا بەرمەيىك دەپ جۇرگەنبىز. سويتسەك, پرەزيدەنتىمىز كورەگەندىك كورسەتىپ, حالىقتىڭ ۇزاق جىلدار بويعى سۇرانىسىنا قۇلاق استى. الەمدىك دارەجەدەگى ءىرى مەملەكەت قايراتكەرى, ديپلومات ەكەندىگىن, كورەگەن باسشى ەكەندىگىن كورسەتتى.
ەندىگى كەزەكتە, اباي وبلىسى دەپ سىرتقى بەلگىمىز عانا اۋىسىپ قويماي, ءبىزدىڭ ومىرىمىزگە ۇلكەن جاڭالىق اكەلەدى دەپ ويلايمىن. مىسالى, تالدىقورعان وبلىسى جەكە وبلىس بولعان سوڭ قۇلپىرىپ, جايناپ كەتتى. بۇگىندە ءىرى مەگاپوليسكە اينالىپ بارادى. سوعان قاراپ ۇلكەن ءۇمىت كۇتەمىز. ءبارى ساتىمەن جۇزەگە اسىپ جاتسا, اباي وبلىسىنىڭ ورتالىعى, سەمەي قالاسى قازاق ەلىنىڭ ساۋلەتتى دە, داۋلەتتى قالاسىنا اينالادى دەپ ويلايمىز, سەنەمىز.
جاڭاعى جاڭالىقتى ەستىگەندە ءبىر-ءبىرىمىزدى قۇشاقتاپ, كوشەدەگى جۇرت ءسۇيىنشى سۇراسىپ, كوزدەرىنە قۋانىشتىڭ ىستىق جاسى كەلدى. پرەزيدەنت ەلدىڭ كوكەيىندە جۇرگەن ماسەلەنى سالماقتاپ, سارالاپ باتىل شەشىم جاساۋى – ءىرى تاريحي وقيعا. ەندەشە, جاڭا وبلىسىمىز قازاقستاننىڭ دامۋىنا ۇلەس قوساتىن ءوڭىر بولادى دەگەنىنە ۇمىتتەمىز. وسى تاريحي-ساياسي شەشىمگە حالىق زور سەنىم ارتىپ وتىر. سەنىم اقتالسىن!
اراپ ەسپەمبەتوۆ,
فيلولوگيا عىلىمدارىنىڭ دوكتورى, پروفەسسور
سەمەي