الماتىدا مەملەكەتتىك حاتشى ەرلان قاريننىڭ توراعالىعىمەن جاڭارتىلعان قۇرامداعى قازاقستان رەسپۋبليكاسى پرەزيدەنتى جانىنداعى جاستار ساياساتى جونىندەگى كەڭەستىڭ ءبىرىنشى وتىرىسى ءوتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
كەڭەستىڭ جاڭا قۇرامىنا قوعام بەلسەندىلەرى, جاس عالىمدار مەن كاسىپكەرلەر, وڭىرلەردىڭ, اۋىل جانە شىعارماشىل جاستاردىڭ وكىلدەرى, «تاۋەلسىزدىك ۇرپاقتارى» گرانتىنىڭ يەگەرلەرى, پرەزيدەنتتىك جاستار كادرلىق رەزەرۆىنىڭ مۇشەلەرى, جاستار ۇيىمدارىنىڭ كوشباسشىلارى كىردى.
جيىندا ەرلان قارين مەملەكەت باسشىسى جولداۋىنىڭ نەگىزگى باعىتتارىنا توقتالدى. ول پرەزيدەنت ۇسىنعان رەفورمالار مەملەكەت جاڭعىرۋىنىڭ جاڭا كەزەڭى ەكەنىن, جاڭا قازاقستاندى قۇرۋ مەن جاڭا باستامالاردىڭ باستاۋى بولىپ تابىلاتىنىن اتاپ ءوتتى. بۇل رەفورمالار حالىق اراسىندا, اسىرەسە جاستار ورتاسىندا ۇلكەن قولداۋعا يە.
بۇل رەتتە جاستار كەڭەسىنىڭ ءرولى ارتادى. ويتكەنى كەڭەس مۇشەلەرىن زاڭ جوبالارىن, تۇجىرىمدامالاردى جانە باسقا دا ستراتەگيالىق قۇجاتتاردى تالقىلاۋعا قاتىستىرۋ كوزدەلگەن.
قازىرگى ۋاقىتتا پارلامەنت ماجىلىسىندە «جاستار ساياساتى تۋرالى» زاڭ جوباسى قارالىپ جاتىر. ەرلان قارين كەڭەس وكىلدەرىن ماجىلىستەگى جۇمىس توپتارىنىڭ قۇرامىنا ەنگىزۋدى ۇسىندى. بۇدان بولەك, جاستار ساياساتى جونىندەگى كەڭەستىڭ جۇيەلى جۇمىس ىستەۋى ءۇشىن ونىڭ جانىنان ءتۇرلى كوميتەتتەر قۇرۋ جوسپارلانعان.
جيىندا قر پرەمەر-ءمينيسترىنىڭ ورىنباسارى ەرالى توعجانوۆ, قر ءبىلىم جانە عىلىم ءمينيسترى اسحات ايماعامبەتوۆ, ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ جانە «جاستار» عىلىمي-زەرتتەۋ ورتالىعىنىڭ ديرەكتورى ءازيز ىسقاقوۆ بايانداما جاسادى.
كەزدەسۋ سوڭىندا كەڭەس مۇشەلەرى مەملەكەتتىك ورگانداردىڭ باسشىلارىنا ءوز ساۋالدارىن قويىپ, ۇسىنىستارىن ايتتى.