پوليتسەيلەر ەلوردادا ەسىرتكى وتكىزۋمەن اينالىسقان كۇدىكتىلەردى ۇستاۋ بويىنشا ارنايى وپەراتسيا جۇرگىزدى, دەپ حابارلايدى Egemen.kz.
«سۇگىر ءالى ۇلى كوشەسى بويىنشا جەدەل-ىزدەستىرۋ ءىس-شارالارىن جۇرگىزۋ كەزىندە 44 جاستاعى ايەل ۇستالدى, ءتىنتۋ جۇمىستارى بارىسىندا ايەلدىڭ تۇرعىلىقتى جەرى بويىنشا سالماعى 4 كگ گاشيش تابىلىپ, تاركىلەندى. كۇدىكتى ەسىرتكى زاتتارىن ەلوردا اۋماعىندا ساتپاق بولعان», دەپ حابارلادى نۇر-سۇلتان پد ءباسپاسوز قىزمەتى.
اتالعان فاكتى بويىنشا قر قك 297-بابى 2-بولىگى «ەسىرتكى زاتتاردى, پسيحوتروپتىق زاتتاردى, سول تەكتەستەردى وتكىزۋ ماقساتىندا زاڭسىز دايىنداۋ, قايتا وڭدەۋ, ساتىپ الۋ, ساقتاۋ, تاسىمالداۋ, جونەلتۋ نەمەسە وتكىزۋ» بويىنشا سوتقا دەيىنگى تەرگەۋ جۇرگىزىلۋدە.
ەسىرتكى «ساتۋشى» ايەل 12 جىلعا دەيىنگى مەرزىمگە باس بوستاندىعىنان ايىرىلۋى مۇمكىن.