قىزىلجاردا رەسپۋبليكالىق اقىندار ايتىسى بولدى, دەپ حابارلايدى Egemen.kz.
وبلىستىق مادەنيەت باسقارماسىنىڭ ۇيىمداستىرۋىمەن, ەرىك اسقاروۆ اتىنداعى ايتىس مەكتەبىنىڭ جەتەكشىسى جارقىن جۇپارحان سياقتى ازاماتتىڭ بەلسەندىلىگىمەن ءاز – ناۋرىزدىڭ قارساڭىندا وتكەن بۇل ايتىس قازاقستاننىڭ حالىق جازۋشىسى, ءسوز زەرگەرى عابيت مۇسىرەپوۆتىڭ 120 جىلدىعىنا, حالىق جازۋشىسى, دراماتۋرگ, سافۋان شايمەردەنوۆتىڭ 100 جىلدىعىنا جانە اقىن, قوعام جانە مەملەكەت قايراتكەرى كاكىمبەك سالىقوۆتىڭ 90 جىلدىعىنا ارنالىپ, «ۇلتىن سۇيگەن ۇلىلار» دەپ اتالدى.
ايتىستى قازاقستاننىڭ ەڭبەك سىڭىرگەن قايراتكەرى, حالىقارالىق ايتىس اقىندارى مەن جىرشى-تەرمەشىلەر وداعىنىڭ توراعاسى, اقتاڭگەر اقىن ءجۇرسىن ەرماننىڭ ءوزى جۇرگىزدى. قاتىسقان اقىندار اراسىندا رەسپۋبليكاعا تانىمال ۇزدىكتەر رۇستەم قايىرتاي, ەركەبۇلان قاينازار, قاليجان ءبىلداش, مەيىربەك سۇلتانحان, تولەگەن جامانوۆ, تىلەگەن ءادىلوۆ, سەرىك قۋانعان, شۇعايىپ سەزىمحان, قازىرەت بەردىحان, نۇرزات قارۋ, جۇمابەك راحيموۆ, جارقىن جۇپارحان بولدى.
قازاقستاننىڭ ەڭبەك سىڭىرگەن قايراتكەرى, حالىقارالىق «الاش» ادەبي سىيلىعىنىڭ لاۋرەاتى عالىم جايلىباي توراعالىق ەتكەن, قۇرامىندا قازاقستان جازۋشىلار وداعى توراعاسىنىڭ ءبىرىنشى ورىنباسارى اقبەرەن ەلگەزەك, «دارىن» مەملەكەتتىك جاستار سىيلىعىنىڭ لاۋرەاتى, اقىن داۋلەتكەرەي كاپ ۇلى, كاسىپكەر, رۋحانيات جاناشىرى جومارت وماروۆ, اقىن-سازگەر داستەن بايمۇقانوۆ, سەگىز سەرى اتىنداعى قازاق حالىق اسپاپتار وركەسترىنىڭ كوركەمدىك جەتەكشىسى قايىرلى عافۋروۆ بولعان قازىلار القاسى باس جۇلدەنى جارقىن جۇپارحاننىڭ العانىن ءبىراۋىزدان ماقۇلدادى. ءسويتىپ جارقىن سوڭعى ءبىر ايدا ەكى رەسپۋبليكالىق ايتىستىڭ باس جۇلدەسىن قانجىعاسىنا بايلادى. بۇعان دەيىن ول تاراز قالاسىندا بولعان «جامبىل – مەنىڭ ءوز اتىم, حالىق – مەنىڭ شىن اتىم» اتتى رەسپۋبليكالىق ايتىستا دا ءبىرىنشى ورىن العان ەدى. جەرلەسىمىزگە جەڭىستەرىڭ قۇتتى بولسىن دەپ تىلەيمىز!