دۇكەن سورەلەرىندە سىرەسىپ تۇرعان قاپ-قاپ قانت ءبىر كۇننىڭ ىشىندە عايىپ بولعاندا, شەكەرسىز شەكەسى تەرلەپ, شاي ىشە المايتىن اعايىن كادىمگىدەي ابدىراپ قالعان. ساۋدا ورىندارىندا قانتپەن قوسا, شەتەلدەن كەلەتىن تاۋىقتىڭ سان ەتى دە جوق بولىپ كەتتى. ارتىنشا, وبلىس اكىمدىگىندە وتكەن كەڭەستە ايماق باسشىسى ءوڭىردىڭ ازىق-ت ۇلىك باعاسىن تۇراقتاندىرۋ قورىندا قانت بار ەكەنىن, مۇنىڭ سىرتىندا, قوسىمشا قانت ساتىپ الۋعا تاعى دا قوماقتى قاراجات بولىنگەنىن ايتتى.
قوستانايداعى كوتەرمە ساۋدا ورىندارىندا قانت كوپ ەكەنىن جەكە دۇكەنى بار كاسىپكەرلەر دە راستاپ وتىر. بىراق ساتىلمايدى.
– وسىدان ەكى اپتا بۇرىن قانتتىڭ كيلوسىن 400 تەڭگەدەن العانمىن. ودان كەيىن بۇكىل اپتا بويى تابا المادىم. كەشە بارلىق كوتەرمە ساۋدا ورىندارىن تاعى شارلاپ شىقتىم, قانت جوق. جۇرتتىڭ ايتۋىنشا, كوتەرمە ساۋدامەن اينالىساتىن كاسىپكەرلەر ءبىر وزگەرىستى كۇتىپ وتىر. ەستۋىمشە, قازىر قالادا قانت ساتاتىن ءبىر-اق نۇكتە بار. بۇرىن ول جەردەن 390 تەڭگەدەن الاتىنبىز, بۇگىن 700 تەڭگەدەن ساتىپ جاتىر ەكەن. ماعان 25 كيلولىق ءبىر قاپتى 14 مىڭ تەڭگەدەن ۇسىندى. بۇعان 20 پايىز ۇستەمە پۇل قوسىپ ساتسام, ونى كىم الادى؟ رەسەي مەن بەلارۋستەن كەلەتىن تاۋىقتىڭ سان ەتىن دە تابا المادىم, – دەدى شاعىن دۇكەن ۇستاپ وتىرعان كاسىپكەردىڭ ءبىرى.
ايماق باسشىسى وبلىستىڭ ازىق-ت ۇلىك تاۋارلارىن تۇراقتاندىرۋ قورىنداعى قانتتىڭ تاياۋ كۇندەرى جەرگىلىكتى ساۋدا جەلىلەرى ارقىلى ساتىلا باستايتىنىن مالىمدەدى.
– ساۋدا جەلىلەرى قانتتى شەكتەۋلى تۇردە ساتادى. وسى ارقىلى قانتتىڭ ايماقتان تىس جەرلەرگە ساتىلىپ كەتۋىنە جول بەرمەيتىن بولامىز. سونداي-اق «ازىق-ت ۇلىك كورپوراتسياسى» اق ارقىلى جەتكىزۋشىلەر جاقىن ارادا تاعى دا قانت ساتىپ الاتىن بولادى. باسقا ەلدەردەن دە قانت اكەلۋ ماسەلەسى قاراستىرىلۋدا. وبلىستا قانت قورىن جەتكىلىكتى مولشەردە ساتىپ الۋ ءۇشىن قوسىمشا 850 ملن تەڭگە قاراجات ءبولۋ تۋرالى تاپسىرما بەردىم, – دەدى ارحيمەد مۇحامبەتوۆ.
وبلىستىڭ بارلىق اۋماعىندا قانت تاپشىلىعىن جويۋ شارالارى قولعا الىنىپ, قالا جانە اۋدان اكىمدىكتەرى الەۋمەتتىك ماڭىزى بار ازىق-ت ۇلىك تاۋارلارىنا كۇندەلىكتى مونيتورينگ جۇرگىزە باستادى.
قوستاناي وبلىسى