كەزىندە تالاس اۋدانىنىڭ ورتالىعى بولعان اقكول اۋىلى كەيىنگى جىلدارى ءبىرشاما قيىندىقتى باستان كەشتى. توقسانىنشى جىلدارى توزىپ, توقىراۋعا ۇشىراعان اۋىلدا ماسەلە كوبەيگەن بولاتىن. ءتىپتى تۇرعىنداردىڭ الەۋمەتتىك جاعدايى ءالسىز بولعان سوڭ ولاردىڭ ءبىرازى تۋعان اۋىلدان تابان اۋدارعان ەدى.
الايدا ارادا ءبىراز جىل وتكەن سوڭ مەملەكەت قولداۋىنىڭ ناتيجەسىندە اقكول اۋىلى قايتا تۇلەپ, جاڭارۋ جولىنا ءتۇستى. پرەزيدەنت قاسىم-جومارت توقاەۆتىڭ اۋىلدى جەرلەرگە ءتيىستى كوڭىل ءبولۋ تۋرالى تاپسىرماسىنا وراي اقكول بۇگىندە قايتا جاڭعىرىپ كەلەدى. تالاي جىلدان بەرى اۋىل تۇرعىندارىن تولعاندىرعان ماسەلەلەر شەشىمىن تابۋدا. كوپشىلىكتىڭ كوتەرگەن ماسەلەلەرىنە قۇلاق اسقان تالاس اۋدانىنىڭ اكىمى قاناتبەك مادىبەك اۋىلدى كوركەيتۋ ماقساتىندا ءالى تالاي جۇمىس اتقارىلاتىنىن ايتادى.
جەرگىلىكتى جۇرتشىلىق تالاي ۋاقىتتان بەرى جول ازابىن تارتىپ كەلگەن ەدى. ب ۇلىنگەن, توزعان اۋىلىشىلىك جولدار مەملەكەت قولداۋىنىڭ ناتيجەسىندە قايتا قالپىنا كەلتىرىلۋدە. بۇل كۇندە اۋىلداعى 25 كوشەنىڭ 20-سىنا اسفالت توسەلىپتى. سونداي-اق بۇرىنعى كوللەدجدىڭ ەسكى عيماراتى كۇردەلى جوندەۋدەن ءوتىپ, 200 ورىندىق №6 تالاس اۋداندىق ارناۋلى الەۋمەتتىك قىزمەتتەر ۇسىنۋ ورتالىعى بولىپ جاڭادان اشىلعان. مۇندا 172 ادام جۇمىسپەن قامتىلعان. نەگىزىنەن ولاردىڭ باسىم بولىگىن اۋىل تۇرعىندارى قۇرايدى. بۇل ارقىلى اۋىلداعى جۇمىسسىزدىق ماسەلەسى دە وڭ شەشىمىن تاۋىپ وتىر. ەندى قازىرگى تاڭدا اۋىلدا سپورت كەشەنى سالىنۋدا. اتالعان سپورت كەشەنىنىڭ قۇنى 336 ملن تەڭگەنى قۇرايدى. جوبانىڭ قۇرىلىسى بيىلعى ماۋسىم ايىندا اياقتالىپ, پايدالانۋعا بەرىلەدى. سونىمەن قاتار اقكولدىكتەر ءبىراز جىلدان بەرى اۋىلعا گاز تارتۋ ماسەلەسىن كوتەرىپ كەلەدى. وسى ورايدا اتالعان ماسەلە دە ەسكەرىلىپ, قازىرگى تاڭدا جۋالى اۋدانىنىڭ بيلىكول اۋىلىنان بەرى قاراي گاز قۇبىرى تارتىلۋدا. بۇل قۇبىر ارقىلى اقكول اۋىلىنا جانە وسى اۋىلعا جاقىن بىرنەشە اۋىلعا دا جىل سوڭىنا دەيىن گاز بەرىلەدى دەپ جوسپارلانعان. سونىمەن قاتار اۋىلدىقتار ءۇشىن جەر ماسەلەسى دە وزەكتى. بۇل رەتتە اقكول اۋىلدىق وكرۋگىنىڭ اكىمى جاندوس راتوۆ اۋىلدا 3 463 گەكتار جەر بار ەكەنىن, ەندى مال جايىلىمى 5 964 گەكتارعا ۇلعايىپ وتىرعانىن ايتتى. ال تۇرعىنداردىڭ قاجەتتىلىگىنە وراي 210 گەكتارعا جۋىق جايىلىم جانە ەگىستىك جەرلەر مەملەكەت مەنشىگىنە قايتارىلعان.
بۇگىندە مەملەكەت تاراپىنان بەرىلگەن ءتۇرلى مۇمكىندىكتى پايدالانىپ, اۋىل تۇرعىندارىنىڭ جاعدايىن جاقسارتۋ دا قولعا الىنعان. ماسەلەن, اۋىلدا «باستاۋ بيزنەس» جوباسىمەن 24 ادام وقىپ, سونىڭ ىشىندە 11 اۋىل تۇرعىنى 6,5 ملن تەڭگە قايتارىمسىز گرانتقا يە بولعان. قازىرگى كەزدە ولار جەكە كاسىپپەن اينالىسۋدا. ونىڭ ىشىندە 9 ادام مال باسىن كوبەيتسە, 1 ازامات شاشتارازدىڭ قۇرال-جابدىقتارىن جانە 1 تۇرعىن كونديتەرلىك پەش الىپ, ءوز كاسىپتەرىن باستاپ كەتكەن. سونىمەن قاتار 7 اۋىل تۇرعىنى ءتۇرلى مەملەكەتتىك باعدارلامالارعا قاتىسىپ, جالپى كولەمى 19,8 ملن تەڭگە جەڭىلدەتىلگەن نەسيە العان. سونداي-اق وبلىس اكىمىنىڭ باستاماسىمەن جۇزەگە اسىرىلعان «جومارت تۇلەك» جوباسى بويىنشا اۋىل تۇلەكتەرىنىڭ دەمەۋشىلىگىمەن جالپى كولەمى 11,5 ملن تەڭگەگە «تاۋەلسىزدىك اللەياسى», «تۇلەكتەر اللەياسى» جانە ستريت-ۆوركاۋت سپورتتىق الاڭشاسى سالىنىپ, ى.التىنسارين اتىنداعى ورتا مەكتەپتىڭ اۋلاسى اباتتاندىرىلعان. «اسارلاتىپ ءۇي سالۋ» جوباسى دا تيىسىنشە جۇزەگە اسۋدا.
الايدا اۋىلدا تۇرعىنداردى الاڭداتاتىن ماسەلەلەر دە بار. ماسەلەن, «سۇلتان» كانالىنا سۋ رەتتەگىش قوندىرعى سالۋ جانە جاڭا جەدەل جاردەم كولىگىن الۋ قاجەت. سونداي-اق تۇرعىنداردىڭ دەنى وبلىس اكىمى بەردىبەك ساپارباەۆتان بيزنەس يدەياسىن جۇزەگە اسىرۋ ماقساتىندا مەملەكەتتىك گرانت قاراستىرۋدى سۇراپ وتىر. سول سياقتى اۋىلدان الەۋمەتتىك دۇكەن اشۋ ءۇشىن جەڭىلدەتىلگەن نەسيە العىسى كەلەتىن ازاماتتار دا بار. ال وبلىس باسشىلىعى تۇرعىندار كوتەرگەن اۋىل مەكتەبىن جوندەۋ مەن جاڭا امبۋلاتوريا سالۋ ماسەلەلەرىنىڭ دە شەشىلەتىنىن ايتۋدا. سونداي-اق كەيىنگى جىلدارى اۋىلدىقتار ءۇشىن سۋ ماسەلەسى دە وزەكتى بولىپ وتىر. وسى ورايدا «اقكول» سۋ قويماسى كۇردەلى جوندەۋدەن وتكەن. ەندى الداعى مامىر ايىنا دەيىن اتالعان سۋ قويماسىنا كەمىندە 90 ملن تەكشە مەتر سۋ جينالۋى كەرەك. جاۋاپتى باسشىلار «اقكول» سۋ قويماسىنىڭ جاعدايىن نازارعا السا, تالاي جىلدان بەرى كۇرمەۋى شەشىلمەي كەلگەن سۋ ماسەلەسى دە وڭ شەشىمىن تابادى.
جامبىل وبلىسى