ەۋرازيالىق ەكونوميكالىق وداققا مۇشە مەملەكەتتەردىڭ باسشىلارى تاسىمالداردى قاداعالاۋ ءۇشىن ناۆيگاتسيالىق پلومبالاردى قولدانۋ تۋرالى كەلىسىم ماتىنىنە قول قويۋ ءراسىمى وتۋدە. كەلىسىم كۇشىنە ەنگەن سوڭ پلومبا سالىنعان كولىكتەر ءبىر مارشرۋت بويىندا ەاەو-تىڭ ءار ەلىندە بىرنەشە رەت تەكسەرىلمەيدى, ول بيزنەس ءۇشىن قوسىمشا اكىمشىلىك كەدەرگىلەردى الىپ تاستاۋعا ىقپال ەتەدى. بۇل تۋرالى قارجى مينيسترلىگىنىڭ مەملەكەتتىك كىرىستەر كوميتەتى حابارلادى.
وسىعان دەيىن, 2021 جىلعى 10 جەلتوقساندا ەۋرازيالىق ەكونوميكالىق وداققا مۇشە مەملەكەتتەردىڭ باسشىلارى ەۋرازيالىق ەكونوميكالىق وداقتا تاسىمالداردى قاداعالاۋ ءۇشىن ناۆيگاتسيالىق پلومبالاردى قولدانۋ تۋرالى كەلىسىمدى ماقۇلداعان بولاتىن.
وسى كەلىسىم بويىنشا جۇمىس 2017 جىلدان باستاپ ەاەو ەلدەرى ساراپشىلارىنىڭ جانە ەۋرازيالىق ەكونوميكالىق كوميسسيا قىزمەتكەرلەرىنىڭ قاتىسۋىمەن جۇرگىزىلدى. جالپى, كەلىسىم ناۆيگاتسيالىق پلومبالاردى قولدانا وتىرىپ, تاۋارلاردى ەاەو-عا مۇشە ەكى جانە ودان دا كوپ مەملەكەتتەردىڭ اۋماقتارى بويىنشا وتكىزۋ كەزىندە ولاردى قاداعالاۋ مۇمكىندىگىن كوزدەيدى.
قازىرگى ۋاقىتتا مەملەكەت باسشىلارىنىڭ كەلىسىم ماتىنىنە تىكەلەي قول قويۋ ءراسىمى وتۋدە. كەلىسىمگە بارلىق ەلدەر قول قويعاننان كەيىن ەۋرازيالىق ەكونوميكالىق كوميسسيا وداققا مۇشە مەملەكەتتەرگە راتيفيكاتسيالاۋدى جۇرگىزۋدى باستاۋ مۇمكىندىگى تۋرالى حابارلاما جىبەرەتىن بولادى.
بۇل رەتتە قازاقستان رەسپۋبليكاسىندا راتيفيكاتسيالاۋ تۋرالى زاڭمەن ءبىر مەزگىلدە ۇلتتىق زاڭنامانى كەلىسىم نورمالارىنا سايكەس كەلتىرۋگە باعىتتالعان زاڭ جوباسى پىسىقتالاتىن بولادى.
بۇدان باسقا, كەلىسىمدى ىسكە اسىرۋ ءۇشىن ەەك-ءتىڭ 28 شەشىمىن ازىرلەۋ تالاپ ەتىلەدى, ولار كەلىسىم كۇشىنە ەنگەننەن كەيىن 180 كۇننەن كەشىكتىرىلمەي قابىلدانۋى ءتيىس.
بۇل رەتتە كولىكتىڭ ەرەكشەلىگىن ەسكەرە وتىرىپ, تاۋارلاردىڭ ساناتىنا بايلانىستى وتپەلى كەزەڭدەر كوزدەلگەن. بۇل تاسىمالداۋدىڭ ءاربىر كەزەڭىن قاداعالاي وتىرىپ, ناۆيگاتسيالىق پلومبالاردى قولدانۋ پروتسەسىنىڭ تيىمدىلىگىن جەتىلدىرۋگە مۇمكىندىك بەرەدى.
بيزنەس ءۇشىن وسى كەلىسىمنىڭ ارتىقشىلىقتارى ەاەو كەڭىستىگىندە ءوز تاۋارلارىنىڭ قاۋىپسىز ءترانزيتى مۇمكىندىگىندە, ەاەو باقىلاۋشى ورگاندارى تاراپىنان باقىلاۋدىڭ قوسىمشا نىساندارى مەن شارالارىن الىپ تاستاۋدا بولىپ وتىر. ياعني ەگەر پلومبا سالىنعان بولسا, وندا ەاەو-نىڭ ءاربىر مەملەكەتىندە تاۋاردى, ال كەيبىرەۋلەرىندە ءبىر مارشرۋت ءۇشىن بىرنەشە رەتتەن تەكسەرۋدىڭ قاجەتى جوق. مۇنداي جاعدايلار شىعىنداردى ايتارلىقتاي تومەندەتەدى جانە جالپى بيزنەس ءۇشىن قوسىمشا اكىمشىلىك كەدەرگىلەردى الىپ تاستاۋعا ىقپال ەتەدى.
مەملەكەت وسى كەلىسىمنەن حالىقارالىق تاسىمالداردىڭ ايقىندىعىن, «جالعان ءترانزيتتى» جانە «جالعان يمپورتتى» جويۋدى جانە تيىسىنشە قازىناعا اقشا تۇسىمدەرىنىڭ ۇلعايۋىن الادى.