پرەزيدەنت ۇسىنعان رەفورمانىڭ نەگىزگى ءمانى – مەملەكەت, ياعني بيلىك وكىلدەرى مەن بۇقارا اراسىندا ناقتى ناتيجە بەرىپ, قوردالانعان پروبلەمالاردىڭ جۇيەلى شەشىمىن تابۋعا ارقاۋ بولاتىن ەكىجاقتى ءتيىمدى ديالوگ ۇيىمداستىرۋ. ايماقتىق, جەرگىلىكتى ءوزىن-ءوزى باسقارۋ ورگاندارىنىڭ بەلسەندىلىگىن جەتىلدىرۋ, ازاماتتىق قوعام ينستيتۋتتارىنىڭ ءرولىن نىعايتۋدى كوزدەيدى. جۇيەنىڭ قالىپتاسۋىنا كەدەرگى تيگىزىپ وتىرعان اكىمشىلىك ىقپال, اسەردى السىرەتۋگە باعىتتالعان.
كوڭىلدەن شىققان تاعى ءبىر ماسەلە, پرەزيدەنتتىڭ جاقىن تۋىستارىنىڭ مەملەكەتتىك ورگاندار مەن كۆازيمەملەكەتتىك مەكەمەلەردىڭ باسشىلىعىنا تاعايىندالۋىنا تىيىم سالىنۋى. ايماقتىق-اكىمشىلىك رەفورما مەملەكەتتىك باسقارۋ ورگاندارىن اناعۇرلىم حالىققا جاقىنداتىپ, ءوڭىر-ولكەنىڭ كەشەندى دامۋىن وندىرىستىك, الەۋمەتتىك, ينفراقۇرىلىمدىق تۇرعىدان قامتاماسىز ەتۋگە ءتيىس.
پرەزيدەنت ساياسي رەفورمالاردى كەزەڭ-كەزەڭىمەن جانە تاباندى تۇردە جۇزەگە اسىرىپ كەلەدى. جۇيەلى جۇمىستىڭ نەگىزى دە بايقالادى. كەيىنگى ءۇش جىلدا ەلىمىزدىڭ قوعامدىق-ساياسي ءومىرىن جاڭعىرتۋ قاجەتى, ءاربىر ازاماتتىڭ ساياسي ساۋاتى مەن ساياسي مادەنيەتىن قالىپتاستىرۋدان تىس, مەڭگەرۋ دەڭگەيىنىڭ ساپاسى دا ماڭىزدى ەكەنىن ايتىپ ءجۇر. سەبەبى ساياسي رەفورمانىڭ ەكونوميكالىق رەفورمالارمەن قاتار ءجۇرۋى وزەكتى.
تابىستى ەكونوميكالىق ءوسىم ساياسي جۇيەنىڭ يكەمدىلىگىنە دە بايلانىستى. ال ساياسي جۇيەنىڭ نەگىزگى فورمۋلاسى: مىقتى پرەزيدەنت – ىقپالدى پارلامەنت – ەسەپ بەرەتىن ۇكىمەت. بۇل قاعيدا جۇزەگە اسىرىلعاندا عانا قوعامنىڭ اشىقتىعى, ساياسي باستامالاردىڭ جاريالىلىعىنان ۇلكەن قايىر بار. مەملەكەت باسشىسى جاريالاعان «حالىق ۇنىنە قۇلاق اساتىن مەملەكەت» تۇجىرىمداماسىنىڭ ومىرشەڭدىگى دە جۇرت ءۇشىن ماڭىزدى.
عازيز قۇلاحمەتوۆ,
ءماجىلىس دەپۋتاتى