اتىراۋداعى اتىس: پوليتسيا كۇدىكتىنىڭ ۇستادى

«15 ناۋرىزدا ساعات 22:30-دا اتىراۋ ۋپ-عا «اۆانگارد» شاعىن اۋدانىندا ورنالاسقان سوڭعى ايالدامادا وق اتىلعانى تۋرالى حابارلاما كەلىپ ءتۇستى. وقيعا ورنىندا «Reno Duster» ماركالى اۆتوكولىگى تابىلدى, كولىك ىشىندە 2 ءمايىت جاتقان. پوليتسيا اتىس بولعان جەرگە كەلگەنگە دەيىن وق جاراقاتىن العان ءبىر ادام جەدەل جاردەم قىزمەتكەرلەرىمەن وبلىستىق اۋرۋحانانىڭ جانساقتاۋ بولىمىنە جاتقىزىلعانى بەلگىلى بولدى. دارىگەرلەردىڭ ايتۋىنشا, زارداپ شەگۋشى كومادا جاتىر, جاعدايى اۋىر. وقيعا ورنىندا جەدەل-تەرگەۋ توبى, سونداي-اق وبلىس پروكۋرورىنىڭ ورىنباسارى ا.عىلىم, اتىراۋ قالاسىنىڭ پروكۋرورى ا.تايتۋللين جۇمىس ىستەۋدە. كىسى ءولتىرۋ فاكتىسى بويىنشا اتىراۋ وبلىستىق پوليتسيا دەپارتامەنتى قك-ءنىڭ 99 - بابىنىڭ 2-بولىگى بويىنشا سوتقا دەيىنگى تەرگەۋدى باستادى. قىلمىستى اشۋعا باعىتتالعان قاجەتتى جەدەل-تەرگەۋ ءىس-شارالارى جۇرگىزىلۋدە», دەپ حابارلادى وبلىستىق پوليتسيا دەپارتامەنتىنىڭ ءباسپاسوز قىزمەتى.

وق اتقان كۇدىكتى وقيعا ورنىنان ءىزىن سۋىتىپ ۇلگەردى. 

«پوليتسيا قىزمەتكەرلەرى ماڭعىستاۋ وبلىسىنىڭ 1993 جىلى تۋعان تۇرعىنىن قولعا ءتۇسىردى. ونىڭ ايتۋىنشا, اتىس ازاماتتار اراسىندا تۋىنداعان كەلىسپەۋشىلىكتەن بولعان. قازىر كۇدىكتى ۋاقىتشا ۇستاۋ يزولياتورىنا قامالدى», دەپ حابارلادى وبلىستىڭ پوليتسيا دەپارتامەنتىنىڭ ءباسپاسوز قىزمەتى.