مەن – ونەرتاپقىشپىن. عىلىمنىڭ ءار سالاسىنا قاتىستى 25 جاڭالىق اشتىم. جاڭالىقتارىما پاتەنت العانمىن. سولاردىڭ 7-ەۋى ورتكە قارسى باعىتتالعان. ەگەر دە وسى جاڭالىقتاردى ىسكە اسىرساق, كوپتەگەن ادامنىڭ ءومىرىن, باعالى دا قۇندى زاتتاردى, مال-م ۇلىكتى امان الىپ قالۋعا مۇمكىندىك تۋار ەدى.
ويتكەنى مەن وسى جاڭالىقتاردىڭ پايداسىن تەكسەرۋ ءۇشىن 2014 جىلى ءورت ماشيناسىنىڭ قۇرالدارىن جانە ءورتتى بۋمەن ءوشىرۋ ءتاسىلىن سىناقتان وتكىزدىم.
ونىڭ قالاي وتكەنى تۋرالى بەينەفيلمدى جانە سىناققا قاتىناسقان كىسىلەردىڭ جازعان اكتىسىن Facebook جەلىسىنەن, مارات ايۋباەۆ دەگەن پاراقشادان, «فيلم و پوجارە» دەگەن بەينەجازبادان كورۋگە جانە وقۋعا بولادى.
ءورت ماشيناسى (پاتەنت №28801) ونەرتابىس سالاسىنداعى رەسپۋبليكالىق «شاپاعات-2015» بايقاۋىندا جەڭىس ديپلومىمەن ماراپاتتالدى. ديپلومعا ءۇش مينيستر قول قويىپ, ءمورىن باسقان. ال ادىلەت ءمينيسترى العىسحات بەرگەن.
2019 جىلى «جانارماي قويمالارىندا ءورتتى بولدىرمايتىن» جاڭالىقتىڭ (پاتەنت №2272) سىناعىن جاسادىم. بۇل جاڭالىق جانارماي قويمالارىندا ءورتتى مۇلدەم دەرلىك بولدىرمايدى. ەگەر ءبىر سەبەپتەردەن ءورت شىعىپ جاتسا, ول اۆتوماتتى تۇردە 2-3 مينۋتتا سوندىرىلەدى. ەش ادام زاقىمدانبايدى, شىعىن دا بولمايدى.
وسى جاڭالىقتاردى ىسكە اسىرساق, توقتاپ تۇرعان زاۋىتتارىمىز جۇمىس ىستەپ, مىڭداعان ادام جۇمىسپەن قامتاماسىز ەتىلەدى. ءورت ءسوندىرۋ تەحنيكالارىن باسقا مەملەكەتتەر بىزدەن ساتىپ الىپ, ەل بيۋدجەتىنە ميللياردتاعان قارجى تۇسەدى. جاڭالىقتارىمىزدى باسقا مەملەكەتتەر دە پايدالانىپ, تالاي وقىس وقيعالاردىڭ الدى الىنادى.
وسى جەردە ايتپاعىم, مەن وسى جاڭالىقتارىمدى 10 جىلدان استام ۋاقىت ىسكە اسىرا الماي كەلەمىن. سول ارالىقتا مەنىڭ بارماعان جەرىم, اشپاعان ەسىگىم قالمادى. سولاردىڭ ءبىرى – توتەنشە جاعدايلار مينيسترلىگى. جاڭالىقتارىم قانشا پايدالى بولسا دا ونداعىلار قولداۋدىڭ ورنىنا كەدەرگى كەلتىرۋدەن تانعان ەمەس. سوندىقتان ەل مۇددەسى ءۇشىن عالىمدارمەن, ماماندارمەن باس قوسىپ, ءبىر شەشىمگە كەلگەن دۇرىس بولار ەدى. وسى حاتىمدى رەداكتسياعا سول ءۇشىن جازىپ وتىرمىن.
مارات ايۋباەۆ,
ونەرتاپقىش
تاراز