اۋا رايىنىڭ بۇزىلۋىنا بايلانىستى نۇر-سۇلتان قالاسىنىڭ ماڭىنا قاتىنايتىن 3 جولاۋشىلار اۆتوبۋسىنىڭ قوزعالىسى توقتاتىلدى, دەپ حابارلايدى Egemen.kz.
«ساعات 12:00-گە وزەكتى اقپارات: اۋا رايىنىڭ ناشارلاۋىنا جانە تاسجولداردىڭ جابىلۋىنا بايلانىستى قالا ماڭىنا قاتىنايتىن № 310, 315 جانە 317-ءىنشى باعدارلاردىڭ قوزعالىسى ۋاقىتشا توقتاتىلدى. قالا ماڭىنا قاتىنايتىن باسقا باعدارلار جەلىدە», - دەلىنگەن City Transportation Systems كومپانياسى تاراتقان حابارلامادا.
ەسكە سالايىق, كەشە اۋا رايى جاعدايىنا قاتىستى ەلوردا ىرگەسىندەگى ەلدى مەكەندەرگە قاتىنايتىن № 315 جانە 316-ىنشى اۆتوبۋستاردىڭ قوزعالىسىنا ۋاقىتشا تىيىم سالىنعان بولاتىن.
سينوپتيكتەر 13 ناۋرىزدا اقمولا وبلىسىنىڭ وڭتۇستىك جارتىسىندا جاياۋ بۇرقاسىن بولاتىنىن, شىعىستان, سولتۇستىك-شىعىستان جەل سوعىپ, ونىڭ كۇشى 15-20 م/س جەتەتىنىن ەسكەرتكەن بولاتىن.
نۇر-سۇلتان قالاسىندا, سونداي-اق جاياۋ بۇرقاسىن, 15-20 م/س ەكپىندە جەل كۇتىلەدى.