قازاقستاننىڭ ەلشىسى نۇرباح رۇستەموۆ رۋمىنيانىڭ ەنەرگەتيكا ءمينيسترى ۆيردجيل پوپەسكۋمەن كەلىسسوزدەر وتكىزدى, دەپ حابارلايدى Egemen.kz قر سىرتقى ىستەر مينيسترلىگىنىڭ ءباسپاسوز قىزمەتىنە سىلتەمە جاساپ.
تاراپتار 2021 جىلعى ىنتىماقتاستىقتىڭ قورىتىندىلارىن تالقىلادى, اعىمداعى جاعدايدى قاراستىردى جانە ورتا مەرزىمدى پەرسپەكتيۆاعا ارنالعان جوسپارلاردى بەلگىلەدى.
اڭگىمەلەسۋ بارىسىندا ەلشى قازاقستاننىڭ رۋمىنيامەن ەنەرگەتيكا سالاسىنداعى قارىم-قاتىناستى نىعايتۋعا دايىندىعى تۋرالى ۇستانىمىن جەتكىزدى.
سونداي-اق «قازمۇنايگاز ينتەرنەيشنل» كومپانياسىنىڭ دامۋى جانە ونىڭ قازاقستاندىق ەنەرگەتيكالىق رەسۋرستاردى ەۋروپاعا ەكسپورتتاۋداعى بەلسەندى قىزمەتى تۋرالى دا ءسوز بولدى.