ۇكىمەتتىڭ كەزەكتى وتىرىسىندا قر ۇلتتىق ەكونوميكا ءمينيسترى الىبەك قۋانتىروۆ حالىقتىڭ ەڭبەك ەتۋدەن تۇسەتىن تابىسىنىڭ ۇلەسى سوڭعى 10 جىلدا 10,8 پايىزدىق تارماققا تومەندەگەنىن ايتتى, دەپ حابارلايدى Egemen.kz.
«وسى جىلدىڭ 11 قاڭتارىندا مەملەكەت باسشىسى حالىقتىڭ جۇمىسپەن قامتىلۋى ماسەلەسىنە توقتالىپ, حالىقتىڭ تابىسىن ارتتىرۋ باعدارلاماسىن ازىرلەۋدى تاپسىردى. وسى تاپسىرمانى ورىنداۋ ماقساتىندا ۇلتتىق ەكونوميكا مينيسترلىگى مەملەكەتتىك ورگاندارمەن, ۇلتتىق كاسىپكەرلەر پالاتاسىمەن جانە ساراپشىلىق قاۋىمداستىقپەن بىرلەسىپ, كەدەيشىلىك پەن جۇمىسسىزدىق دەڭگەيى بويىنشا ناقتى جاعدايعا تالداۋ جۇرگىزە كەلە, ءتيىستى باعدارلاما جوباسىن ازىرلەدى. تالداۋ ناتيجەلەرى بويىنشا تۇراقتى وڭ ديناميكاعا قاراماستان, سوڭعى ەكى جىلدا حالىقتىڭ اقشالاي تابىسىنىڭ ءوسۋ قارقىنى 2019 جىلعى 6,4 پايىزدان 2021 جىلى 2,9 پايىزا دەيىن باياۋلاعانى بايقالدى», دەدى مينيستر.
مينيستر ءوز سوزىندە حالىق تابىسىنىڭ قۇرىلىمىندا ەڭبەك ەتۋدەن تۇسەتىن كىرىستەردىڭ تومەندەۋى جانە الەۋمەتتىك ترانسفەرتتەردەن كىرىستەردىڭ ءوسۋى بايقالاتىندىعىن جەتكىزدى.
«حالىقتىڭ ەڭبەك ەتۋدەن تۇسەتىن تابىسىنىڭ ۇلەسى سوڭعى 10 جىلدا 10,8 پايىزدىق تارماققا تومەندەدى. ءوز كەزەگىندە, الەۋمەتتىك ترانسفەرتتەردىڭ ۇلەسى كەرىسىنشە, 10 پايىزعا ءوستى. جۇرگىزىلگەن تالداۋدى ەسكەرە وتىرىپ, حالىقتىڭ تابىسىن ارتتىرۋ باعدارلاماسىندا مىنا باسىمدىقتار بەلگىلەندى:
جۇمىسشى جاستار سانىن ارتتىرۋ; حالىقتىڭ الەۋمەتتىك وسال توپتارىنىڭ جەكەلەگەن ساناتتارىن جۇمىسقا ورنالاستىرۋ; بيۋدجەت جۇمىسكەرلەرىنە لايىقتى جالاقى تاعايىنداۋ; ەڭبەك كىرىسىندەگى تەڭگەرىمسىزدىكتەردى جويۋ; اۋىل شارۋاشىلىعىندا, وڭدەۋ ونەركاسىبىندە ءتيىمدى جۇمىسپەن قامتۋدى دامىتۋدى ىنتالاندىرۋ; كاسىپكەرلىك كىرىستىڭ ءوسۋىن ىنتالاندىرۋ; تابىستىڭ ساتىپ الۋ قابىلەتىن قورعاۋ», دەپ تۇسىندىردى الىبەك قۋانتىروۆ.ءمينيستردىڭ ايتۋىنشا, ۇكىمەتتىڭ بۇكىل ەكونوميكالىق ساياساتىنىڭ جالپى ماقساتى حالىق تابىسىن ارتتىرۋ بولعاندىقتان, باعدارلاما ۇلتتىق جوبالارمەن ءوزارا بايلانىستى. باعدارلاما اياسىنداعى ءىس-شارالاردى شارتتى تۇردە تىكەلەي جانە جاناما دەپ بولۋگە بولادى. تىكەلەي ءىس-شارالار بيۋدجەت جۇمىسكەرلەرىنىڭ جالاقىسىن كوتەرۋگە جانە كىرىستەردەگى تەڭگەرىمسىزدىكتى تەڭەستىرۋگە, ال جاناما ءىس-شارالار حالىقتى جۇمىسپەن قامتۋعا جاردەمدەسۋ, كاسىپتىك دايارلاۋ (قايتا دايارلاۋ), وڭدەۋشى كاسىپورىنداردىڭ ونىمدىلىگىن ارتتىرۋ جانە كاسىپكەرلىكتى دامىتۋ ارقىلى تابىستىڭ ءوسۋ مۇمكىندىكتەرىن كەڭەيتۋگە باعىتتالعان.