قوستانايدا حالىقارالىق ايەلدەر كۇنى قارساڭىندا وتكەن مەرەكەلىك جيىندا كوپبالالى انالار التىن مەن كۇمىستەن القا تاقتى. سالتاناتتى ءىس-شارا بارىسىندا وبلىس اكىمى ارحيمەد مۇحامبەتوۆ باتىر انالارعا جەتى «التىن القا» جانە توعىز «كۇمىس القا» تابىس ەتتى.
وڭىردەگى بارشا ايەلدەر قاۋىمىن اتاۋلى مەرەكەمەن قۇتتىقتاعان ايماق باسشىسى ايەل زاتى قازىرگى قوعامنىڭ قاي سالاسىندا بولسىن ەرەكشە ورىن الاتىنىن اتاپ ءوتتى.
– ەگەر قوستاناي وبلىسى تۋرالى ايتاتىن بولساق, ءبىزدىڭ ايەلدەر ءوڭىردىڭ قوعامدىق جانە ساياسي ومىرىنە بەلسەندى قاتىسادى. بۇگىندە بارلىق دەڭگەيدەگى ءماسليحاتتاردىڭ 267 دەپۋتاتىنىڭ 40 پايىزى ايەلدەر. قازىر وبلىستا 5,5 مىڭنان استام مەملەكەتتىك قىزمەتشى بار دەسەك, ونىڭ 60%-ى – قىز-كەلىنشەكتەر. جەرگىلىكتى اتقارۋشى ورگانداردا 155 ايەل باسشىلىق لاۋازىمداردا قىزمەت اتقارادى. ونىڭ ىشىندە وبلىس اكىمىنىڭ ورىنباسارى, 6 وبلىستىق باسقارمانىڭ باسشىلارى, قالا جانە اۋدان اكىمدەرىنىڭ 22 ورىنباسارى جانە اپپارات باسشىلارى, 31 اۋىلدىق وكرۋگ اكىمى بار. قازىرگى قازاقستاننىڭ ازاماتشالارى اسا بەلسەندى ءارى جان-جاقتى. ايەلدەر ساياسات, بيزنەس, ءبىلىم مەن عىلىم, ونەر مەن مادەنيەت, سپورت سياقتى ماڭىزدى سالالاردا جوعارى تابىستارعا قول جەتكىزىپ, بيىكتەردەن كورىنىپ كەلەدى. الايدا ايەلدىڭ باستى ميسسياسى – وتباسى جىلۋى مەن وشاقتىڭ بەرەكەسىن ساقتاۋ بولىپ قالا بەرەدى, – دەدى ارحيمەد مۇحامبەتوۆ.
مەرەكەلىك جيىنعا قوستانايعا الىستان ارنايى شاقىرىلعان اتى اڭىزعا اينالعان اكتريسا مەرۋەرت وتەكەشەۆا دا قاتىستى. وبلىس اكىمى كوپشىلىك الدىندا قادىرلى قوناققا ءىلتيپات ءبىلدىرىپ, قۇرمەت كورسەتتى.
– مەرۋەرت قاراتايقىزى وتەكەشوۆا ايگىلى «قىز جىبەك» فيلمىندە باستى ءرولدى سومداعان ءبىرتۋار ونەر قايراتكەرى. قىز جىبەك دانالىقتىڭ, سۇلۋلىقتىڭ, كىرشىكسىز سۇيىسپەنشىلىكتىڭ ەتالونى بولىپ سانالادى. وسىندا وتىرعان ارۋ انالارىمىزدىڭ ءبارى دە ۇلتتىق كينو تاريحىنداعى قايتالانباس عاجايىپ تۋىندىنى كوپ مارتە قايتارا كورىپ, قىز جىبەككە قاراپ بوي تۇزەدى دەسەك قاتەلەسپەيتىن شىعارمىز. ال مەرۋەرت قاراتايقىزى بىزگە دەيىنگى جانە بىزدەن كەيىنگى زامانداعى قازاق قىزدارىنا ۇلگى بولىپ قالا بەرەدى, – دەدى ايماق باسشىسى.
وبلىس اكىمىنە, جالپى قوستاناي جۇرتشىلىعىنا ريزاشىلىق بىلدىرگەن مەرۋەرت وتەكەشوۆا توبىل وڭىرىنە وسىمەن ەكىنشى رەت كەلىپ وتىرعانىن ايتتى.
ءسان-سالتانات پەن القىزىل گۇل شوقتارىنا تولى مەرەكەلىك ءىس-شارانىڭ سوڭى ءوڭىر ونەرپازدارى ازىرلەگەن كونتسەرتتىك باعدارلاماعا ۇلاستى.
قوستاناي