الماتى وبلىسىندا براكونەرلەر ءسىبىر ەلىگىن اتىپ, ونى ات قۇيرىعىنا بايلاپ قويعان, دەپ حابارلايدى Egemen.kz.
بۇل جايىندا ەكولوگيا, گەولوگيا جانە تابيعي رەسۋرستار مينيسترلىگىنىڭ ءباسپاسوز حاتشىسى ولجاس بەركىنباەۆ Facebook پاراقشاسىندا جازدى.
«الماتى وبلىسىندا براكونەرلەر ءسىبىر ەلىگىن (ەركەگى ەكەن) اتىپ, ونى ات قۇيرىعىنا بايلاپ جىبەرىپتى. ىلە الاتاۋى ۇلتتىق پاركى تۇرگەن فيليالىنىڭ ينسپەكتورلارى ق.ءاشىموۆ, م. بايتاسوۆ, ك. جىلقايداروۆتار رەيد جۇرگىزىپ, الماتى مەملەكەتتىك تابيعي كەشەندى قورىعىنىڭ اۋماعىنان الماتى وبلىسىنىڭ ەكى تۇرعىنىن ەكى مىلتىعىمەن قوسا ۇستاعان. ولار سالت اتپەن جۇرگەن. الگى براكونەرلەر اتقان ولجاسىن سول قالپى ات قۇيرىعىنا بايلاپ قويعان. ولاردى ۇستاپ جاتقاندا ەلىك بايلانعان ات ۇركىپ, اۋىلعا قاشقان. الدىمەن براكونەرلەردى قۇرىقتاعان ينسپەكتورلار ارتىنشا ەلىك بايلانعان اتتى دا ۇستاعان», دەپ ءمالىم ەتتى ولجاس بەركىنباەۆ.
ونىڭ ايتۋىنشا, ەكولوگيا مينيسترلىگىنىڭ ينسپەكتورلارى زاڭ بۇزعانداردى الماتى وبلىسى ەڭبەكشىقازاق اۋداندىق پوليتسيا باسقارماسىنا جەتكىزگەن.
قازىر اتالعان فاكتى بويىنشا سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر.
«ايتا كەتەتىن جايت, بۇنداي زاڭ بۇزۋشىلىق ءۇشىن قىلمىستىق جاۋاپكەرشىلىك قاراستىرىلعان» دەپ تولىقتىردى مينيسترلىك وكىلى.