نۇر-سۇلتان قالاسىنىڭ اكىمى التاي كولگىنوۆ Instagram پاراقشاسىندا ەلوردادا سالىناتىن الەۋمەتتىك پاتەرلەر جايلى ايتتى, دەپ حابارلايدى Egemen.kz.
«باسپانا ماسەلەسى قالا تۇرعىندارى ءۇشىن قاشاندا وزەكتى بولىپ قالا بەرمەك. تۇرعىن ءۇي قولجەتىمدىرەك بولۋى ءۇشىن بىرنەشە باعىت بويىنشا جۇمىس ءجۇرىپ جاتىر. ولار – جەڭىلدىكپەن بەرىلەتىن قولجەتىمدى تۇرعىن ءۇي سالۋ, تۇرعىن ءۇي كەشەندەرىن جوندەۋ, اپاتتى جاعدايداعى جانە ەسكى ۇيلەردى بۇزۋ, قۇرىلىسى ۇزاققا سوزىلعان نىسانداردى اياقتاۋ جانە ت.ب.
جەڭىلدىكپەن بەرىلەتىن پاتەرلەر سالۋ جۇمىسى «بايتەرەك» حولدينگىنىڭ ەنشىلەس ۇيىمدارى جەلىسى بويىنشا ءجۇرىپ جاتىر. وسى سەبەپتى بىرقاتار ۇيىمنىڭ باسشىلىعىمەن جينالىس ءوتىپ, وزەكتى ماسەلەلەر قاراستىرىلدى. سونىمەن «بايتەرەك» حولدينگىنىڭ باسقارما توراعاسى قانات شارلاپاەۆپەن, «وتباسى بانكى» باسقارماسىنىڭ توراعاسى ءلاززات يبراگيموۆامەن, «بايتەرەك» حولدينگى باسقارما توراعاسىنىڭ ورىنباسارى ءادىل مۇحامەدجانوۆپەن كەزدەسىپ, وزەكتى ماسەلەلەردى قاراستىردىق. ماسەلەن, قازاقستاندىق تۇرعىن ءۇي باعدارلاماسى (قيك) جەلىسى بويىنشا – مەديتسينالىق جانە الەۋمەتتىك قىزمەتكەرلەرگە, پەداگوگتارعا, پوليتسيا دەپارتامەنتى مەن تجد قىزمەتكەرلەرىنە, مادەنيەت جانە سپورت قايراتكەرلەرىنە ارنالعان الەۋمەتتىك تۇرعىن ءۇي», دەپ جازدى ەلوردا اكىمى.
اكىم جاستارعا ارنالعان تۇرعىن ءۇي باعدارلاماسى جايلى دا تىلگە تيەك ەتىپ ءوتتى.
«وزدەرىڭىز بىلەتىندەي, وتباسى بانكى جەلىسى بويىنشا كەزەكتە تۇرعاندارعا وتكەن جىلدان باستاپ جاستارعا ارنالعان ارنايى تۇرعىن ءۇي باعدارلاماسىن ىسكە قوستىق. تۇرعىن ءۇي بويىنشا جەڭىلدەتىلگەن الەۋمەتتىك نەسيەلەندىرۋ باعدارلاماسى قالامىزدىڭ 36 جاسقا دەيىنگى جاستارىنا (كۇيەۋىنىڭ/ايەلىنىڭ جاسى ماڭىزدى ەمەس) ارنالعان.
مەملەكەت باسشىسى ازاماتتاردىڭ قولجەتىمدى باسپانا ساتىپ الۋىنا جاعداي جاساۋ ماسەلەسىنە ەرەكشە نازار اۋدارۋدى تاپسىردى. بيىل ءبىز تاعى دا 10 مىڭ الەۋمەتتىك پاتەر سالۋدى جوسپارلاپ وتىرمىز», دەدى التاي كولگىنوۆ.