تۇركيا شىعىسىنداعى احلات قالاسىندا قازاقستاننىڭ قۇرمەتتى كونسۋلدىعى اشىلدى, دەپ حابارلايدى Egemen.kz قر سىرتقى ىستەر مينيسترلىگىنە سىلتەمە جاساپ.
قۇرمەتتى كونسۋلدىقتىڭ اشىلۋىنا بيتليس پروۆينتسياسىنىڭ گۋبەرناتورى, دەپۋتاتتار, قالا مەن اۋدان مەرلەرى, پروۆينتسيانىڭ الدىڭعى قاتارلى وكىلدەرى جانە بۇقارالىق اقپارات قۇرالدارى قاتىستى.
وكىلدىكتىڭ تۇساۋكەسەر سالتاناتىندا ەلشى ابزال ساپاربەك ۇلى بۇگىنگى ەرەكشە ءىس-شارا باۋىرلاس ەلدەر قازاقستان مەن تۇركيا اراسىنداعى ديپلوماتيالىق قارىم-قاتىناستىڭ مەرەيلى 30 جىلدىعى قارساڭىندا ءوتىپ جاتقانىن اتاپ ءوتتى.
سونداي-اق ستراتەگيالىق ءارى سەنىمدى نىساندا قالىپتاسقان ەكىجاقتى ىنتىماقتاستىققا نازار اۋداردى.
وسى رەتتە, تاريحي ماڭىزى بار احلات قالاسىندا قۇرمەتتى كونسۋلدىقتىڭ اشىلۋى ەكى ەلدىڭ رۋحاني-مادەني, ەكونوميكالىق قارىم-قاتىناستارىنىڭ دامۋىنا وڭ سەپتىگىن تيگىزەتىنىنە سەنىم ءبىلدىردى.
بيتليس پروۆينتسياسىنىڭ گۋبەرناتورى وكتاي چاگاتاي ءوز سوزىندە ءىس-شارانىڭ ەرەكشەلىگىن, ياعني قازاقستاننىڭ قۇرمەتتى كونسۋلدىعى وسى ايماقتا تۇڭعىش شەتەلدىك وكىلدىك بولىپ سانالاتىنىن جەتكىزىپ, بۇل قادام قازاقستان مەن تۇركيا اراسىنداعى ىنتىماقتاستىقتى ودان ءارى نىعايتۋعا ۇلەس قوساتىنىن ايتتى.
قۇرمەتتى كونسۋل مۋاز ەرگەزەن ەكى ەلدىڭ پرەزيدەنتتەرىنىڭ قۇپتاۋىمەن جوعارى لاۋازىمعا لايىق دەپ تانىعاندىعى ءۇشىن شەكسىز ريزاشىلىعىن ءبىلدىرىپ, ەكىجاقتى بايلانىستاردىڭ دامۋىنا ءوز ۇلەسىن قوساتىنىن اتاپ ءوتتى.
ايتا كەتەيىك, تۇركيادا قازاقستاننىڭ سەگىز قۇرمەتتى كونسۋلدىعى بار. ولاردىڭ وكرۋگتارى رەتىندە الانيا, كونيا, مەرسين, بۋرسا, كودجاەلي, حاتاي, دەنيزلي جانە بيتليس پروۆينتسيالارى دەپ بەلگىلەنگەن. الداعى ۋاقىتتا حاتاي, كونيا جانە دەنيزليدە قر قۇرمەتتى كونسۋلدىقتارى اشىلاتىنى جوسپارلانعان.