ۋكرايناداعى احۋال كۇننەن-كۇنگە ناشارلاۋ ۇستىندە. ۇرىس بارىسى دا وزگەرىسكە ۇشىرادى. بۇعان دەيىن رەسەي اسكەرى اۋىر تەحنيكالارمەن قالالاردى باسىپ الۋعا تىرىسقان. الايدا بۇل جوسپار جۇزەگە اسپاعاننان كەيىن ۋكراينانىڭ ءىرى قالالارىن زىمىراندارمەن اتقىلاپ جاتىر.
رەسەي پرەزيدەنتىنىڭ ءباسپاسوز حاتشىسى دميتري پەسكوۆ اۋە سوققىلارى قاراپايىم تۇرعىندارعا باعىتتالعانى تۋرالى اقپارات وتىرىك دەپ ايتتى. دەگەنمەن, الەۋمەتتىك جەلىلەردەگى ۆيدەولاردا ۋكراينا قالالارىنا رۇقسات ەتىلمەگەن ۆاكۋمدىق جانە كاسسەتالىق بومبالارمەن, قاناتتى زىمىراندارمەن اتقىلاپ جاتقانى بايقالادى. ماسەلەن, ۆيدەولاردىڭ بىرىندە حاركوۆتىڭ ءدال ورتاسىنا تۇسكەن زىمىراننىڭ كوپ دۇنيەنى بۇلدىرگەنى انىق كورىنەدى. سونداي-اق قاراپايىم تۇرعىنداردىڭ ءۇيىنىڭ قيراندىلارى دا ءجيى جاريالانىپ جاتىر.
بىرىككەن ۇلتتار ۇيىمىنىڭ ادام قۇقىقتارى جونىندەگى كەڭسەسىنىڭ (OHCHR) مالىمەتىنە سۇيەنسەك, وتكەن اپتادا رەسەي اسكەرى ۋكرايناعا باسىپ كىرگەننەن بەرى كەمىندە 136 بەيبىت تۇرعىن قازا تاپقان. سونىڭ ىشىندە 13 بالا بار. شامامەن 400-گە جۋىق ادام جارالاندى.
OHCHR ءباسپاسوز حاتشىسى ليز تروسسەلل قازا تاپقانداردىڭ كوپشىلىگى ۋكراينانىڭ شىعىسىنداعى دونەتسك جانە لۋگانسك وبلىستارىنىڭ تۇرعىندارى ەكەنىن جەتكىزدى. الايدا شىعىن بۇدان الدەقايدا كوپ بولۋى مۇمكىن.
ۇلىبريتانيا بارلاۋ قىزمەتى تاراتقان دەرەكتەرگە سۇيەنسەك, باسقىنشى اسكەردىڭ كيەۆكە قاراي جىلجۋى باياۋلاپ قالعان. سوندىقتان ەل استاناسىن ارتيللەريامەن اتقىلاپ جاتىر. ۋكراينانىڭ وڭتۇستىگىندەگى حەرسون قالاسىنىڭ مەرى شاھاردى رەسەيلىك ساربازدار قورشاپ العانىن حابارلادى.
ناتو باسشىسى يەنس ستولتەنبەرگ رەسەيدى ۋكرايناداعى سوعىستى توقتاتىپ, بارلىق كۇشتەرىن شىعارۋعا شاقىردى. سونىمەن قاتار اليانس كيەۆتى قولداۋ ماقساتىندا اسكەر نەمەسە اسكەري ۇشاق جىبەرمەيتىنىن جەتكىزدى.
«ناتو – قورعانىسقا ارنالعان وداق. ءبىز رەسەيمەن قاقتىعىسقىمىز كەلمەيدى. رەسەيدەن دەرەۋ سوعىستى توقتاتىپ, ۋكراينادان بارلىق كۇشتەرىن شىعارىپ, ماسەلەنى ديپلوماتيالىق جولمەن شەشۋگە شاقىرامىز», دەدى يەنس ستولتەنبەرگ.
ۇلىبريتانيا پرەمەر-ءمينيسترى بوريس دجونسون «ەۋروپا قۇرلىعى اپاتقا تاپ بولدى» دەپ مالىمدەدى. ۆارشاۆاعا بارعان ساپارىندا ول پولشا ۇكىمەتى مەن حالقى گۋمانيتارلىق داعدارىستى شەشۋگە مول ۇلەس قوسىپ جاتقانىنا توقتالدى.
وسى ورايدا ۇلىبريتانيادا كونسەرۆاتورلار مەن وپپوزيتسيالىق دەپۋتاتتار ۇكىمەتتى قىسىمعا الىپ, ۋكراين بوسقىندارىن قابىلداۋعا كىرىسۋدى تالاپ ەتتى. پرەمەر-مينيستر سونداي-اق ۋكراينا پرەزيدەنتى ۆولوديمير زەلەنسكيدىڭ «كوشباسشىلىعى مەن ەرلىگىنە» قۇرمەت كورسەتەتىنىن اتاپ ءوتتى.
ەۋروپالىق پارلامەنتتە ۋكرايناداعى احۋالعا بايلانىستى تىڭدالىم ءوتىپ, اتالعان ەلدىڭ پرەزيدەنتى ۆولوديمير زەلەنسكي بەينە-رەجىمدە قاتىستى. دەپۋتاتتار باسقىنشىلارمەن كۇرەستە ەرىك-جىگەر كورسەتىپ جاتقان زەلەنسكيگە ءبىر مينۋت بويى تىك تۇرىپ, قول شاپالاقتاپ قۇرمەت كورسەتتى. «بۇگىن سىزدەرگە قايىرلى تاڭ, قايىرلى كۇن نەمەسە قايىرلى كەش دەپ ايتا المايمىن. سەبەبى كەي ادامدار ءۇشىن ءار كۇن قايىرلى بولىپ جاتقان جوق. كەيبىرى ءۇشىن بۇل كۇن اقىرعى كۇنگە اينالدى», دەدى ول.
سونداي-اق زەلەنسكي رەسەيدىڭ تەك اسكەري نىساندارعا شابۋىل جاسايمىز دەگەن مالىمدەمەسىن جوققا شىعاردى. «16 بالانى ءولتىردىڭ. قاي اسكەري بازادا بالالار بار؟ قاي بالا تانك ايداپ ءجۇر ەكەن؟», دەدى ول.
دۇيسەنبى كۇنى ۋكراينا باسشىلىعى ەۋروپالىق وداققا ەنۋ تۋرالى ءوتىنىش جاسادى. ۇيىم اتالعان ەلدى قۇرامىنا ەنگىزۋ پروتسەسى جەدەل جۇرەتىنىن, قازىرگى تاڭدا ونى قاراستىرىپ جاتقانىن اتاپ ءوتتى. ەو-عا مۇشە بىرقاتار مەملەكەت بۇل ۇسىنىستى قولدايتىنىن مالىمدەدى.
سونىمەن قاتار ەۋروپالىق پارلامەنت ۇيىمنىڭ رەسەيدىڭ مۇنايى مەن گازىن يمپورتتاۋدى شەكتەۋگە شاقىردى. دەپۋتاتتار كرەملدىڭ باسقىنشى قادامىنا قارسى جاۋاپ رەتىندە قاتاڭ سانكتسيالار ەنگىزۋدى تالاپ ەتىپ وتىر. قۇجاتتا ەۋروپالىق وداقتىڭ پورتتارىنا رەسەيگە باراتىن كەمەلەردى كىرگىزۋدەن باس تارتۋ جونىندە ايتىلعان.
Maxar كومپانياسى سپۋتنيكتەن تۇسىرىلگەن سۋرەتتەرگە سۇيەنە وتىرىپ, كيەۆكە سولتۇستىك-باتىس باعىتتا شامامەن 64 شاقىرىمعا سوزىلعان رەسەيدىڭ اسكەري كولونناسى كەلە جاتقانىن حابارلادى.
رەسەيگە سانكتسيا سالعاندار سانى كۇننەن-كۇنگە ارتىپ بارادى. ءتىپتى ساياساتقا قاتىسى جوق كومپانيالار دا اۋىلىن الىس قوندىرۋدى ءجون سانادى. ماسەلەن, Disney كومپانياسى Batman ءفيلمىن رەسەيدە كورسەتۋدەن باس تارتتى. Mastercard كومپانياسى ەلدەگى بىرقاتار قارجى ينستيتۋتىنىڭ جۇمىسىنا تىيىم سالىنعانىن حابارلادى.