ەلىمىزدە پويىز بيلەتىن ينتەرنەت ارقىلى ساتىپ الۋ تەحنولوگياسى قولدانىسقا ەنگىزىلدى. بۇل الەمدىك تاجىريبەدە بار ءادىس بويىنشا بيلەت ديستانتسيالىق تۇردە رەسىمدەلەدى. قاعاز تۇرىندەگى كوشىرمەسى پرينتەردەن شىعارىلادى. جولاۋشىنىڭ پويىزعا وتىرۋى ەلەكتروندىق تىركەلۋ ارقىلى جۇرگىزىلەدى.
بۇل شارا استانادا ناۋرىزدىڭ 26-سىندا قاناتقاقتى جوبا رەتىندە WWW.EPAY.RAILWAYS.KZ سايتىندا باستالدى. «بۇگىننەن باستاپ بۇل نۇسقا قاناتقاقتى جوبا رەتىندە الماتى-استانا (001/002 پويىزى), ورال-استانا (057/058 پويىزى), اتىراۋ-الماتى (077/078 پويىزى), اقتوبە-استانا (087/088) پويىزدارىنا ەنگىزىلدى», دەپ حابارلادى «قازاقستان تەمىر جولى» ۇلتتىق كومپانياسىنىڭ وفيسىندە وتكىزىلگەن ءباسپاسوز كونفەرەنتسياسىندا «اقپاراتتىق تەحنولوگيالار ديرەكتسياسى» فيليالىنىڭ ديرەكتورى سەرگەي نيكيتەنكو. ونىڭ سوزىنە يلانساق, ينتەرنەتتىك بيلەت ساتۋمەن قازاقستاننىڭ بارلىق ءوڭىرى 2015 جىلعا دەيىن قامتىلاتىن بولادى.
كومپيۋتەر ارقىلى بيلەت ساتىپ العان جولاۋشى بۇرىنعىداي كاسساعا بارماستان, تىكەلەي پويىزعا وتىرار الدىندا جولسەرىككە كورسەتىپ ول موبيلدىك تەرمينال ارقىلى تىركەيدى. مۇنىمەن قاتار, تەمىرجول كاسساسى ارقىلى بيلەت ساتۋ دا جۇرگىزىلەدى. ەلەكتروندىق بيلەت ساتۋ اينالىمعا ەنگەن كەزدە جولاۋشى «جولاۋشىلار تاسىمالى» اق-تىڭ كاسساسىنا بارعاندا قولىنا بيلەتتىڭ كوشىرمەسىن الادى. بۇل دا اقى تولەۋ تەرمينالى سياقتى ترانزاكتسيا چەگىنە ۇقسايدى. جول ءجۇرۋ قۇجاتىندا پويىزدىڭ بارلىق مالىمەتتەرى كورسەتىلەدى. ونىڭ ىشىندە ءنومىرى, باعدارى, ۆاگوننىڭ ءنومىرى, ورنى ءبارى قامتىلادى. بۇل اقپاراتتار بيلەتتى ساتىپ الۋ كەزىندە جولسەرىكتىڭ ەلەكتروندىق تىركەۋ قۇرالىندا كورىنەدى. پويىزعا وتىرار الدىندا جولاۋشى فيسكالدى بيلەتتى نەمەسە جەكە كۋالىگىن, تولقۇجاتىن, كورسەتىپ ءوز ورنىنا وتىرادى.
جاڭا تەحنولوگيا – ەلەكتروندىق بيلەتتىڭ سوڭعى ۇلگىسى. بۇل ءوز كەزەگىندە قاعاز جول قۇجاتتارىنان باس تارتىپ, جولاۋشىعا بارىنشا قولايلى جاعداي تۋعىزادى. بيلەت ساتۋ اۆتوماتتاندىرىلادى. جولاۋشىلار شارۋاشىلىعىندا جۇمىس تيىمدىلىگى جاقسارادى. «ەلەكتروندى بيلەت ءبىر مەزگىلدە سالىق ورگاندارىنا مويىندالعان فيسكالدى چەك رەتىندە جۇرەدى. سوندىقتان دا, مۇنداي جول ءجۇرۋ بيلەتتەرى ءىسساپار جونىندەگى ەسەپ بەرۋ كەزىندە رەسمي قۇجات رەتىندە تانىلادى», دەدى بريفينگتە ۇلتتىق كومپانيانىڭ «ەلەكتروندى بيلەت» جوباسىنىڭ مەنەدجەرى عازيز دونەنباي.
جولاۋشىنىڭ ۇيدە, جۇمىس ورنىندا وتىرىپ-اق كومپيۋتەرمەن نەمەسە ينتەرنەتى بار ۇيالى تەلەفونمەن دە بيلەت الۋىنا بولادى. اتالمىش جوبانى «قازاقستان تەمىر جولى» ۇك» اق, «جولاۋشىلار تاسىمالى» اق جانە ۇلتتىق كومپانيانىڭ «اقپاراتتىق تەحنولوگيالار ديرەكتسياسى» بىرلەسىپ جاساعان. بۇل باعدارلاما مەملەكەت باسشىسىنىڭ جولداۋىنا سايكەس, 2013 جىلعى قاڭتاردىڭ 8-ىندەگى قابىلدانعان «اقپاراتتىق قازاقستان-2020» مەملەكەتتىك باعدارلاماسىنا وراي جاسالىپ وتىر. ول ماڭىزدى باعدارلاما بويىنشا 2017 جىلى ەلەكتروندىق قۇجات اينالىمى 40 پايىزعا جەتكىزىلسە, 2020 جىلى ءجۇز پايىزعا ورىندالۋى ءتيىس ەكەن.
قازىردىڭ وزىندە استاناداعى پويىز بريگادالارى ءموبيلدى رەگيستراتورمەن جۇمىس جاساۋعا ۇيرەتىلىپ بولعان. ولاردىڭ وڭىرلەردەگى ارىپتەستەرى دە جاڭا تەحنولوگيانى يگەرۋگە كىرىسىپ جاتقان كورىنەدى.
نۇرباي ەلمۇراتوۆ,
«ەگەمەن قازاقستان».