25 اقپان كۇنى الاشتىڭ ارداقتىسى, اقىن ساكەن سەيفۋللين رەپرەسسيانىڭ قۇرىعىنا ءىلىنىپ اتىلعان بولاتىن. اتاۋلى داتاعا وراي نۇر-سۇلتان قالاسىندا ورنالاسقان ساكەن سەيفۋللين مۋزەيىندە اقىن ەسكەرتكىشىنە گۇل شوقتارى قويىلىپ, جينالعاندار رۋحىنا تاعزىم ەتتى, دەپ حابارلايدى Egemen.kz.
بۇگىن ساكەن سەيفۋلليننىڭ اتىلعانىنا 84 جىل تولدى. 84 جىل بۇرىن قىزىل ۇكىمەت قازاق حالقىنىڭ زيالىلارىن قىناداي قىرىپ سالدى. قاسىرەت قانىنا بويالعان قارالى كۇندى قازاق حالقى ەشقاشان جادىنان شىعارعان ەمەس. ۇلتى ءۇشىن وققا ۇشقان باتىر بابالاردى جىل سايىن ەسكە الۋ داستۇرگە اينالدى.
نۇر-سۇلتان قالاسىندا ورنالاسقان ساكەن سەيفۋللين مۋزەيى قۇرىلعان وتىز جىلدان اسا ۋاقىت ىشىندە ساكەننىڭ تۋعان كۇنى مەن اتىلعان كۇنىن اتاپ ءوتۋدى وزىنە پارىز ەتكەن. ءىس-شاراعا بەلگىلى ساكەنتانۋشىلار مەن قوعام قايراتكەرلەرى شاقىرىلدى. العاشقى ءسوزدى مۋزەي باسشىسى, مەملەكەتتىك سىيلىقتىڭ لاۋرەاتى, اقىن نەسىپبەك ايت ۇلى الىپ, ساكەن اتىلعان قاسىرەتتى كۇن تۋرالى كۇڭىرەنە تولعاندى. سول زامانداعى قازاقتىڭ تالاي ارىسىنىڭ باقيلىق بولعانىن اشىنىپ ايتتى. قىزىل ۇكىمەتتىڭ قانعا مالىنعان قىلىشىنىڭ كەسىرىنەن تالاي مارقاسقالارىمىزدان ايىرىلىپ قالعانىمىزدى تاعى ءبىر رەت ەسكە سالدى.
بۇدان سوڭ اقىن, قر جازۋشىلار وداعىنىڭ مۇشەسى, حالىقارالىق «الاش» ادەبي سىيلىعىنىڭ يەگەرى اقىن عالىم جايلىباي جالعاستىردى. ول ساكەن ءومىرى تۋرالى سىر شەرتىپ, ساكەن تاعىلىمى تۋرالى تولعانىپ, الاش ارداقتىسىنا ارنالعان ولەڭىن وقىدى. ساكەننىڭ اقىندىعى مەن ازاماتتىعىنا توقتالا كەلىپ, قىرعىز دەگەن اتاۋدان ارىلۋىمىزعا تىكەلەي سەبەپ بولعان ساكەنگە قازاق حالقى قارىزدار ەكەنىن تىلىنە تيەك ەتتى.
كەيىننەن ساكەننىڭ ناعاشى قارىنداسى اسىلگۇل ءابىش ءسوز الىپ, ساكەننىڭ ءومىرى جايلى سويلەدى. ساكەندى تانۋ قازاق جاستارىنا پارىز ەكەنىن تاعى ءبىر ەسكە سالدى. ساكەننىڭ ءسانى, اۋەلەگەن ءانى تۋرالى تەبىرەنە تولعادى.
قاراعاندى وبلىسى نۇرا اۋدانىنىنىڭ احمەت اۋىلىنداعى ساكەن مەكتەبىنىڭ ديرەكتورى اتىمتاي بالابيەۆ تە ءسوز سويلەپ, ساكەننىڭ ءبىلىم سالاسىنا قوسقان ۇلەسى, اشقان مەكتەپتەرى تۋرالى تولىققاندى مالىمەتتەرىمەن ءبولىستى. قوعام قايراتكەرى ورالباي ابدىكارىموۆ باسشىلىق ەتەتىن «ساكەن قورىنىڭ» وكىلدەرى دە گۇل شوعىن قويۋ راسىمىنە قاتىستى.