ەلدەن سۇراپىل حابار جەتكەن. وتكەن جىلى كوشىپ كەلگەن جەتكەرگەننىڭ ءۇي ورمانىن ءورت شالىپتى. وقيعانىڭ قالاي وربىگەنىن, ءورتتىڭ نەدەن شىققانىن ءالى ەشكىم ءتىس جارىپ ايتقان جوق. تەك قىستىڭ كوزى قىراۋدا قيىن بولعان ەكەن دەستى جۇرت.
جەتكەرگەن ءبىزدىڭ ەلگە كىرمە. بىلتىر شيەتتەي ءتورت بالاسى بار وسى وتباسى كوشىپ كەلگەندە اۋىل اق تۇيەنىڭ قارنى جارىلعانداي قۋانعان. مەكتەپ جاسىنداعى ءتورت بالا وقۋشى سانى جەتپەي, ەندى-ەندى جابىلۋدىڭ از-اق الدىندا تۇرعان نەگىزگى مەكتەپكە دەمەۋ. اۋىل ادامدارى كىرمە دەپ كەۋدەسىنەن يتەرگەن جوق, قايتا باۋىرىنا تارتىپ, قولۇشىن بەرىپتى. ناق ورتالىقتا, يەسىز تۇرعان, جەڭدى بىلەكتەي قاراعايدان قيىپ سالعان ءتورت بولمەلى ءۇي بار ەدى. سونى ساتىپ الىپ بەرگەن. الدىنا مال سالعان. ءوزى دە الدىنان جۇمىس ۇركىپ وتىراتىن ازامات ەكەن. از ۋاقىتتىڭ ىشىندە قاتارعا قوسىلىپ كەتكەن.
ەندى مىنە, ويلاماعان جەردەن قىرسىق شالعانىن قاراشى. اۋىلداعى اقساقالدار سالەم ايتىپتى. جىلۋ جيناسىن دەگەن. وبلىس ورتالىعىندا ءبىزدىڭ اۋىلدىڭ تۋمالارى كوپ. ىلە ەسەپشوتقا ەل قاتارلى قاراجات اۋداردىق.
– جىلۋى نەسى؟.. – دەپتى وتكەننىڭ ونەگەلى ءىسى وزەگىنە قونباعان بوزبالانىڭ ءبىرى.
ايداربەك اتا الگىگە جاقسىلاپ تۇسىندىرگەن. اتا-بابانىڭ سالتى. اعايىندى قىسىلعاندا قولتىعىنان دەمەۋ پارىز. جىلۋ – تىرشىلىكتىڭ داۋىلى توڭدىرعان جۇرەكتى جىلىتاتىن يگى امال. اقساقالدىڭ بىرلىككە شاقىرعان ءبىراۋىز لامىنەن كەيىن ەشكىم باس تارتقان جوق. ىرگەسى بوساپ قالعان اۋىلدا بوس تۇرعان ۇيلەر بارشىلىق. جينالعان قاراجاتقا ادام تۇراعى بولۋعا ابدەن لايىق تاعى ءبىر ءجوندى ءۇي الىنسا كەرەك, جيھازعا دا قارىق بولىپتى. اياق-قولى بۇتىندەلگەن.
قالادان قولما-قول اقشانى جيناپ اپارعان جىگىتتەر ايداربەك اقساقالدىڭ شاڭىراعىنا ات باسىن تىرەسە كەرەك. جەتكەرگەن دە جەتىپتى. رازىلىعىن بىلدىرگەن. العىس لەبىزىن جولداعان. جانىندا ەرتىپ كەلگەن ون جاسار بالاسى بار ەكەن. الگى بالانى ايداربەك اقساقالدىڭ وتىرعان ورنىنا ءبىر اۋناتىپ الدى دەيدى. جان ادامنان ايامايتىن جاقسىلىعى جۇعىستى بولسىن دەگەن شىعار. شىنىمەن جۇقسا, ەل ىشىندەگى ەسكى ءراسىم ەشقاشان ەسكىرمەيدى عوي.
كوكشەتاۋ