بۇكىلالەمدىك بوكس ۇيىمى (WBO) ورتا سالماقتا باق سىناپ جۇرگەن قازاق وعلانى جانىبەك ءالىمحان ۇلى مەن مەكسيكالىق حايمە مۋنگيا اراسىندا جەكپە-جەك وتكىزۋ تۋرالى شەشىم شىعاردى, دەپ حابارلايدى Egemen.kz.
الەمنىڭ ۋاقىتشا چەمپيونى اتاعى ءۇشىن ءوتۋى ءتيىس كەزدەسۋگە مەكسيكالىق بوكسشى كەلىسىم بەرە مە؟ ءاي, قايدام. Golden Boy پروموۋتەرلىك ۇيىمى حايمە مۋنگيانى گەننادي گولوۆكينمەن كەزدەستىرگىسى كەلەتىنى و باستان ءمالىم. سودان دا بولار, حايمە ءبىرىنشى ورتا سالماقتان ورتا سالماققا اۋىسىپ, چەمپيون دەمەتريۋس اندرادەنىڭ مىندەتتى قارسىلاسى اتانعان كەزدە دە ونى اقش بوكسشىسىنا قارسى شىعارمادى. ايتپەسە مۋنگيا ءبىر جارىم جىل بۇرىن الەم چەمپيونى اتاعىنا تالاسۋشى ەدى. ەندى الەم چەمپيونىنا قارسى رينگكە كوتەرىلۋگە ق ۇلىقسىز بولعان مەكسيكالىق بوكسشى ۋاقىتشا چەمپيون اتاعىنا تالاسۋعا نيەتتەنە قويماس. الايدا حايمە جانىبەكپەن شايقاستان باس تارتسا, جانكۇيەرلەر تاراپىنان سىنعا ۇشىرايتىنى ءمالىم. سوندىقتان امالدىڭ جوقتىعىنان كەلىسىم بەرۋى دە مۇمكىن. كىم ءبىلسىن؟ ول گولوۆكينمەن كەزدەسىپ, ۇلكەن شايقاستان اجەپتەۋىر قارجى تاپقىسى كەلەدى. ال گەننادي ونى ەلەي قويار ما ەكەن؟