مەملەكەت باسشىسىنىڭ تاپسىرمالارىن ورىنداۋ اياسىندا پرەمەر-مينيستر ءاليحان سمايىلوۆ «قازاقستاننىڭ دامۋ بانكى» اق قىزمەتىن رەفورمالاۋ ماسەلەلەرى جونىندە كەڭەس وتكىزدى, دەپ حابارلايدى Egemen.kz پرەمەر-ءمينيستردىڭ ءباسپاسوز قىزمەتىنە سىلتەمە جاساپ.
رەفورمالاۋ اياسىندا قدب ەلىمىز ءۇشىن ستراتەگيالىق جانە ەكونوميكالىق ماڭىزى بار, وتەلۋ مەرزىمى ۇزاق اۋقىمدى ءارى كاپيتالدى كوپ قاجەت ەتەتىن ينۆەستيتسيالىق جوبالاردى, سونداي-اق يندۋستريالىق وندىرىستەردى قارجىلاندىرۋعا كوبىرەك باعدارلانادى دەپ جوسپارلانىپ وتىر.
«قدب جاڭا ءوندىرىس ورىندارىن قۇرۋ جوبالارىن قارجىلاندىرۋعا ماڭىز بەرۋى ءتيىس. قىزمەتتىڭ اشىقتىعىن ارتتىرۋ, بيزنەس-پروتسەستەردى وڭتايلاندىرۋ مەن تسيفرلاندىرۋ جانە بانك قىزمەتتەرىنىڭ قولجەتىمدىلىگىن كەڭەيتۋ جونىندەگى جۇمىستاردى ودان ءارى جالعاستىرۋ قاجەت», دەپ اتاپ ءوتتى قر پرەمەر-ءمينيسترى ءا. سمايىلوۆ.