قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى مارات ءازىلحانوۆ شىمكەنت قالالىق قحا جانىنداعى قوعامدىق قۇرىلىمداردىڭ جەتەكشىلەرى جانە ەتنومادەني بىرلەستىكتەردىڭ توراعالارىمەن كەزدەستى.
جيىندى اشقان شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان مەملەكەت باسشىسىنىڭ جاڭا قازاقستاندى قۇرۋ جونىندەگى رەفورماسى قوعام تۇتاستىعى مەن حالىق بىرلىگىن نىعايتۋداعى بىردەن-ءبىر ماڭىزدى قۇرال ەكەندىگىن اتاپ ءوتتى. «الدىمىزدا جاڭا قازاقستان قۇرۋ جونىندەگى مارتەبەلى مىندەتتەر تۇر. ەلىمىز دامۋدىڭ جاڭا كەزەڭىنە قادام باستى. بۇل كەزەڭ ساياسي جانە قوعامدىق فورماتسيانىڭ جاڭارۋىمەن جۇزەگە اسپاق. ءار سالادا تۇبەگەيلى وزگەرىستەر جۇرەدى, جاڭا كوزقاراس قالىپتاسىپ, جاڭا تاسىلدەر قولدانىلادى. قازاقستان حالقى اسسامبلەياسى دا جۇمىس مازمۇنىن جاڭارتىپ, قوعامدى توپتاستىرۋدىڭ ءتيىمدى جولدارىن ۇسىنىپ, ىسكە اسىراتىنىنا سەنىمدىمىن», دەدى ول.
كەزدەسۋدە قاتىسۋشىلار ەركىن فورماتتا ەتنوسارالىق قاتىناستار سالاسىن دامىتۋدىڭ الداعى پەرسپەكتيۆالارى تۋرالى پىكىر الماستى. سونداي-اق جاستاردىڭ جۇمىسپەن قامتىلۋ دەڭگەيىن ارتتىرۋعا جاردەمدەسۋدىڭ وزەكتى ماسەلەلەرى, ونىڭ ىشىندە «جاستار اسسامبلەياسى» قوعامدىق بىرلەستىگىنىڭ الداعى جۇمىس جوسپارلارى تالقىلاندى.
ءوز كەزەگىندە مارات ءازىلحانوۆ تۇراقتىلىعىمىزدى ساقتاۋدا, ىنتىماعىمىزدى ىدىراتىپ الماۋدا وڭىرلىك اسسامبلەيا مۇشەلەرىنىڭ ايرىقشا ءرولىن اتاپ ءوتىپ, اسسامبلەيا قىزمەتىن ترانسفورماتسيالاۋدا قازاقستاننىڭ بارلىق ەتنوستارىن بەلسەندى اتسالىسۋعا شاقىردى.
سونداي-اق قازاقستان حالقى اسسامبلەياسى توراعاسىنىڭ ورىنباسارى قازاقستان وزبەكتەرىنىڭ ەتنومادەني بىرلەستىكتەرى قاۋىمداستىعىنىڭ وكىلدەرىمەن كەزدەسۋ وتكىزدى.
ءىس-شاراعا قازاقستان رەسپۋبليكاسى پارلامەنتى ءماجىلىسىنىڭ دەپۋتاتى ف.قاراتاەۆ, «دۋستليك» رەسپۋبليكالىق وزبەك ەتنومادەني بىرلەستىگىنىڭ قۇرمەتتى توراعاسى ر.حالمۋرادوۆ, قازاقستان وزبەكتەرى «دۋستليك» قاۋىمداستىعىنىڭ توراعاسى ي.حاشيمجانوۆ, سونداي-اق وزبەك ەتنومادەني بىرلەستىكتەرىنىڭ توراعالارى مەن اقساقالدارى, زيالى قاۋىم وكىلدەرى قاتىستى. كەزدەسۋ بارىسىندا قازاقستان حالقى اسسامبلەياسى جانە ونىڭ قۇرىلىمدارى ءوز قىزمەتىندەگى جاڭا تاسىلدەردى قولدانۋ, مەملەكەتتىك ءتىلدىڭ بىرىكتىرۋشى ءرولىن ارتتىرۋ جانە قحا جاستار كادرلىق رەزەرۆىن قالىپتاستىرۋ نۇسقالارى, سونداي-اق ەتنومادەني بىرلەستىكتەردىڭ مەديا-جۇمىسى تالقىلاندى.
ءوز كەزەگىندە جيىنعا قاتىسۋشىلار تۇشىمدى ويلارىن ىقشامداپ ورتاعا سالىپ ءوتتى. الداعى ۋاقىتتا ولاردىڭ بارلىعى قۇزىرلى مەملەكەتتىك ورگانداردا پىسىقتالىپ, عىلىمي-ساراپشىلىق الاڭداردا تالقىلاناتىن بولادى.
قازاقستان وزبەكتەرى مەملەكەت باسشىسىنىڭ جاڭا قازاقستاندى قۇرۋداعى بارلىق ازاماتتاردىڭ ءال-اۋقاتىن قامتاماسىز ەتۋگە باعىتتالعان جۇيەلى قادامدارىن تولىق قولدايتىنىن جانە ىسكە اسىرۋدا بارىنشا قولداۋ كورسەتەتىنىن اتاپ ءوتتى.
ءوز كەزەگىندە مارات ءازىلحانوۆ «دۋستليك» قاۋىمداستىعى وزبەك ەتنوسىنىڭ وكىلدەرىن قازاقستاندىق قوعامعا بىرىكتىرۋ, ولاردى قازاقستاننىڭ تاۋەلسىزدىگىن نىعايتۋ پروتسەسىنە تارتۋ ميسسياسىن جوعارى دەڭگەيدە ورىنداپ جاتقانىن اتاپ ءوتتى.