مەملەكەت باسىشىسى قاسىم-جومارت توقاەۆ Qazaqstan تەلەارناسىنىڭ تىلشىسىنە بەرگەن سۇحباتىندا «قاڭتار قاسىرەتى» جايلى ساۋالدارعا جاۋاپ بەردى, دەپ حابارلايدى Egemen.kz.
پرەزيدەنت باستاپقىدا ۇيىمداستىرىلعان بەيبىت شەرۋلەردىڭ مۇلدەم باسقا ارناعا بۇرىلىپ كەتكەنىن ايتتى.
– ارينە, باستاپقىدا بەيبىت شەرۋلەر بولدى. مۇنى ءبارىمىز كوردىك. ەلىمىزدىڭ ءار ايماعىندا ازاماتتار الاڭعا جينالىپ, ءوز تالاپتارىن ايتتى, ءتىپتى, نارازىلىقتارىن ءبىلدىردى. شىنىن ايتساق, اۋەلدە ەشقانداي قيراتۋ, قىلمىستىق ارەكەتتەر بولعان جوق. بىراق, جاعداي كەيىن مۇلدەم باسقا ارناعا بۇرىلىپ كەتتى. ارانداتۋشىلار مەن قاراقشىلار پايدا بولدى. ولاردىڭ شىنايى ماقساتى بەيبىت ميتينگىگە قاتىسۋ ەمەس, بيلىككە شابۋىل جاساۋ بولدى.
ءبىر سوزبەن ايتقاندا, سوڭىنا قاراي الاڭعا ناعىز لاڭكەستەر شىقتى. ب ۇلىكشىلەر مىڭداعان قارۋ-جاراقتى ۇرلاپ كەتتى. قازىرگى ۋاقىتتا پوليتسيا ولاردى ىزدەپ جاتىر. ازىرگە تۇگەلدەي تابىلعان جوق. بۇزاقىلار سول قارۋدان تاعى دا ادام اتۋى ابدەن مۇمكىن. سوندا مۇنى كىم ىستەدى دەگەن سۇراق تۋادى؟ كىم جاسادى؟ بەيبىت شەرۋگە شىققاندار ما؟ شىن مانىندە, بۇل – كاسىبي قاراقشىلاردىڭ ءىسى, – دەدى پرەزيدەنت.
سونداي-اق قاسىم جومارت توقاەۆ ولاردىڭ قايدان پايدا بولعانىن جانە الاڭعا شىققانداردىڭ ءبارىن بەيبىت شەرۋشى دەپ ايتۋعا بولمايتىنىن اتاپ ءوتتى.
– مەن وسى سۇراققا بىرنەشە رەت جاۋاپ بەردىم. مۇنىڭ الدىن الا جوسپارلانعان ارەكەت ەكەنى انىقتالدى. ارنايى دايىندىقتان وتكەن قىلمىستىق توپتار, لاڭكەستەر وقيعانىڭ بەل ورتاسىندا ءجۇرىپ, قاراقشىلاردى, قۇقىق بۇزۋشىلاردى باسقاردى. ارينە, بۇزاقى توپتاردىڭ اراسىندا بەيبىت ازاماتتار دا بولدى. ەندى, ولاردى, لاڭكەستەردەن, قاراقشىلاردان ءبولىپ الۋىمىز كەرەك. بۇل – وتە كۇردەلى ماسەلە. مۇنىڭ ءبارىن تەرگەۋ جۇمىستارى انىقتايدى. جالپى, مىنا نارسەنى دۇرىس ءتۇسىنۋىمىز كەرەك. الاڭعا شىققانداردىڭ ءبارىن تۇگەل بەيبىت شەرۋشى دەپ ايتۋعا بولمايدى. بۇل ەشقانداي اقىلعا سىيمايتىن نارسە. كوزى اشىق, ارى تازا ادام مۇنداي جالعان تۇجىرىمعا ەشقاشان سەنبەيدى, – دەدى مەملەكەت باسشىسى.
سونىمەن قاتار جاعدايدى كىمدەر ۋشىقتىرعانىن دا ايتتى.
– ەڭ الدىمەن, لاڭكەستەر جاعدايدى ۋشىقتىردى. ولاردىڭ ماقساتى – ەلدىڭ تۇتاستىعىن بۇزۋ, حالىقتى قورقىتۋ. ال, بەيبىت شەرۋشىلەر سولاردىڭ قارماعىنا ءتۇستى. قازىر سول كىناسىز ازاماتتاردىڭ قۇقىعىن قورعاۋىمىز كەرەك. مەن ءاربىر ءىس بويىنشا مۇقيات تەرگەۋ جۇرگىزۋ كەرەك دەپ ايتتىم. ادامداردىڭ قۇقىعىن بۇزعان تۇلعالار جازاعا تارتىلادى. ءبىز بۇعان قاجەتتى شارانىڭ ءبارىن قابىلدايمىز. ەش كۇمان بولماسىن, – دەدى قاسىم-جومارت توقاەۆ.