شىمكەنت قالاسىنىڭ اكىمى مۇرات ايتەنوۆ تاسساي تۇرعىن الابى مەن نۇرتاس, ميراس شاعىن اۋداندارىنىڭ تۇرعىندارىمەن كەزدەسىپ, حالىقتى تولعاندىرعان كەز كەلگەن ماسەلەنىڭ نازاردان تىس قالمايتىنىن جەتكىزدى, دەپ حابارلايدى Egemen.kz.
10 مىڭنان استام تۇرعىنى بار تاسساي تۇرعىن الابى ساپالى ەلەكتر جانە اۋىز سۋمەن تولىق قامتىلعان بولسا, تابيعي گازبەن 80 پايىزى قامتىلعان. قالعان 20 پايىزىن كوگىلدىر وتىنعا قوسۋ بويىنشا قۇرىلىس جۇمىستارى جۇرگىزىلۋدە. اياقتالۋ مەرزىمى 2022 جىل. ال, كارىز جۇيەسىمەن قامتۋ ماقساتىندا «سارىاعاش امان» جشس مەكەمەسى تاراپىنان قۇرىلىس جۇمىستارى جۇرگىزىلۋدە. قۇرىلىسى جىل سوڭىندا اياقتالادى دەپ جوسپارلانۋدا.
سونىمەن بىرگە بيىل ينتەرنەت ساپاسىن جوعارلاتۋ بويىنشا 1 بازالىق ستانتسيا ورناتىلادى.
نۇرتاس شاعىن اۋدانىندا تۇراتىن 16 مىڭعا جۋىق حالىق پەن ميراس شاعىن اۋدانىنداعى 4 مىڭنان استام تۇرعىن تولىق تابيعي گازبەن, ەلەكتر جارىعىمەن, اۋىز سۋمەن قامتىلعان. وتكەن جىلى بۇل ەلدى مەكەندەردە 5 كوشە جارىقتاندىرىلىپ, 4 سپورت الاڭشا سالىنعان. بۇگىندە ميراس اۋدانىندا كارىز جۇيەسىنىڭ قۇرىلىسى جۇرگىزىلۋدە.
كەزدەسۋ بارىسىندا جەرگىلىكتى تۇرعىندار قازىلعان جولداردى قالپىنا كەلتىرۋ, تاس جولدارعا اسفالت سالۋ ماسەلەسىن ايتتى.
قالا باسشىسى 2022-2023 جىلدارى جاڭاقۇرىلىس اۋماعىندا ينفراقۇرىلىم جۇيەلەرى اياقتالۋىنا وراي, كوشەلەردى اسفالتتاۋ جۇمىستارى جۇرگىزىلەتىنىن جەتكىزدى. وعان قوسا, ءاربىر ەلدى مەكەندە كوتەرىلگەن پروبلەمالىق ماسەلەلەردى شەشۋ بويىنشا اكىمدىكتە ارنايى جيىن ۇيىمداستىرىلىپ, حالىق تالابىن ورىنداۋ مەرزىمى بەلگىلەنەتىنىن ايتتى.