قازاقستاندا اۋىل شارۋاشىلىعىن قولداۋعا بەرىلەتىن سۋبسيديا ەكى ەسە كوبەيمەك. سالاعا جاۋاپتى ۆەدومستۆا باسشىسى وسى ماقساتتا ۇكىمەتتەن قوسىمشا 70 ميلليارد تەڭگە سۇرادى, دەپ حابارلايدى Egemen.kz «حابار 24» تەلەارناسىنا سىلتەمە جاساپ.
ۇكىمەت ۇسىنىستى ەسەپتەپ, سۋبسيديا بەرۋ تارتىبىنە وزگەرىستەر ەنگىزەدى. قارجى العان شارۋالارعا ناقتى مىندەت قويىلادى. ماسەلەن, 100 مالدان كەم دەگەندە 80 ءتول الۋ كەرەك. ونىڭ اسىل تۇقىمدى ەكەنى ارنايى تەكسەرىلەدى. ەگىن شارۋاشىلىعىندا دا وسىنداي مىندەتتەر بار.
ايتا كەتەيىك, ەلدە سوڭعى 5 جىلدا اۋىل شارۋاشىلىعىن دامىتۋعا 2 تريلليون تەڭگە بولىنگەن. الايدا بۇل سالادا اۋىز تولتىرىپ ايتارلىق ناتيجە جوق. قارجى شارۋاعا جەتپەي, ورتا جولدا تالان-تاراجعا تۇسەدى. ءماجىلىستىڭ ءبىر توپ دەپۋتاتى كەشە وسىنداي سىن ايتتى. ولار اگروونەركاسىپ كەشەنىنە بەرىلەتىن سۋبسيديانى جوق دەگەندە 2-3 ەسەگە كوبەيتىپ, مال شارۋاشىلىعىن دامىتۋ باعىتىندا ۇلتتىق جوسپار ازىرلەۋ كەرەك ەكەنىن اتاپ ءوتتى.