قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى مارات ءازىلحانوۆ ەلىمىزدەگى بىرقاتار ەتنومادەني بىرلەستىكتىڭ وكىلدەرىمەن ونلاين رەجىمدە كەزدەستى.
«احىسكا» تۇرىك ەتنومادەني بىرلەستىگىنىڭ مۇشەلەرىمەن وتكەن كەزدەسۋدە قاتىسۋشىلار مەملەكەت باسشىسىنىڭ جاڭا قازاقستان قۇرۋ يدەياسىنا قولداۋ ءبىلدىردى. «پرەزيدەنت باستاماسىمەن جاريالانعان جاڭا قازاقستان تۇجىرىمداماسى, ءبىرىنشى كەزەكتە, قوعامنىڭ تۇتاستىعىن بىلدىرەدى. قابىلدانعان ءىس-شارالار كەشەنى ەلدىڭ ساياسي جانە ەكونوميكالىق ومىرىندەگى جاسامپاز وزگەرىستەرگە قۋاتتى سەرپىن بەرەتىنى ءسوزسىز. وسىعان وراي بۇل كۇندەرى قازاقستان حالقى اسسامبلەياسى ءوز قىزمەتىن قايتا جانداندىرۋ بويىنشا ارنايى ءىس-شارالاردى ىسكە اسىرۋدا», دەدى م.ءازىلحانوۆ.
تۇرىك بىرلەستىگىنىڭ مۇشەلەرى وسكەلەڭ ۇرپاقتىڭ رۋحاني جانە ادامگەرشىلىك تاربيەسىنە, جاستاردىڭ جۇمىسپەن قامتىلۋ دەڭگەيىن ارتتىرۋعا, ۇلتتىق مادەنيەتتى دامىتۋ مەن ىلگەرىلەتۋگە, جالپى تىرشىلىك ارەكەتىنىڭ باسقا دا ماڭىزدى اسپەكتىلەرىنە نازار اۋداردى. «قاڭتار ايىنىڭ باسىندا قازاقستان حالقىمەن بىرگە وسىناۋ قيىن كەزەڭدى باستان وتكەردىك. مەملەكەت باسشىسىنىڭ قولداۋىنىڭ ارقاسىندا ەلمەن ءبىر كىسىدەي جۇمىلىپ, ىنتىماعىمىزدى ساقتاي بىلدىك. ارينە, ارقايسىمىز ءۇشىن حالىقتىڭ الەۋمەتتىك تۇراقتىلىعى مەن قاۋىپسىزدىگى باستى ورىندا. سوندىقتان قازىر اسسامبلەيانىڭ, ونىڭ قۇرىلىمدارى مەن ارىپتەستەرىنىڭ نەگىزگى مىندەتى – ءتيىمدى ءىس-ارەكەت جاساۋ. بايقاۋشى ءرولىن سومداماي, ناقتى يگى ءىس-شارالاردى ىسكە اسىرۋعا, وتانىمىزدى ودان ءارى گۇلدەندىرۋگە اتسالىسۋ», دەدى «احىسكا» تۇرىك ەتنومادەني بىرلەستىگىنىڭ توراعاسى ز.كاسانوۆ.
كەزدەسۋ قورىتىندىسى بويىنشا قاتىسۋشىلار ورتاق مامىلەگە كەلىپ, ۇسىنىلعان ءىس-شارالاردى بىرلەسە اتقارۋعا دايىن ەكەندىكتەرىن ءبىلدىردى.
مارات ءازىلحانوۆتىڭ كۇرد ەتنومادەني بىرلەستىگىنىڭ وكىلدەرىمەن وتكىزگەن كەزدەسۋگە «باربانگ» قازاقستان كۇردتەرى قاۋىمداستىعىنىڭ توراعاسى ا.اليەۆ, «باربانگ» قازاقستان كۇردتەرى قاۋىمداستىعىنىڭ الماتى قالالىق فيليالىنىڭ توراعاسى م.تاگيروۆ, «جينا كۇرد» رەسپۋبليكالىق كۇرد گازەتىنىڭ باس رەداكتورى ج.وسمانوۆ جانە باسقالارى قاتىستى. كەزدەسۋ بارىسىندا م.ءازىلحانوۆ كۇرد ەتنومادەني بىرلەستىكتەرىنىڭ قازاقستان حالقى اسسامبلەياسىن دامىتۋداعى بەلسەندى جانە بىرىكتىرۋشى ءرولىن اتاپ ءوتتى. سونىمەن قاتار قحا-نىڭ كۇرد ەتنومادەني بىرلەستىكتەرىنىڭ ەتنوسارالىق كەلىسىمدى, قوعامداعى تولەرانتتىلىق پەن حالىقتىڭ بىرلىگىن نىعايتۋدا بەلسەندى جۇمىس ىستەپ, قحا-نىڭ قولداۋىنا يە بولىپ وتىرعانىن ايتتى. سونداي-اق قازاقستاننىڭ قاعيداتتى ۇستانىمى – ەتنوستىق ماسەلەلەردى ساياسي ماقساتتاردا پايدالانۋعا جول بەرمەۋ كەرەك ەكەنىن اتاپ ءوتتى.
كۇرد ەتنوسىنىڭ وكىلدەرى قاڭتارداعى وقيعالار ەلىمىزدەگى بەيبىتشىلىك پەن تىنىشتىقتىڭ قانشالىقتى ماڭىزدى ەكەنىن تاعى ءبىر رەت ايقىن كورسەتكەنىن جەتكىزدى. ء«بىز قازاق حالقىمەن بىرگە ءتۇرلى تاريحي كەزەڭدەردى ەڭسەردىك. بۇگىندە ءبىز ەلىمىزدىڭ مۇددەلەرىن قورعاۋ مەن نىعايتۋ جولىنداعى جۇمىستى ودان ءارى جالعاستىرماقپىز. سونداي-اق وزىندىك ەرەكشەلىگىمىزدى جوعالتپاۋ ءۇشىن مادەنيەتىمىزدى, سالت-ءداستۇرىمىز بەن ءتىلىمىزدى ۇرپاقتان-ۇرپاققا جەتكىزۋ جولىندا ەڭبەك ەتەمىز», دەدى ا.اليەۆ.
ءوز كەزەگىندە كۇرد ەتنومادەني بىرلەستىگىنىڭ وكىلدەرى قازاقستان حالقى اسسامبلەياسىنىڭ قىزمەتىن ىلگەرىلەتۋ مەن دامىتۋعا بايلانىستى ءوز ۇسىنىستارىن ءبىلدىردى. اتاپ ايتقاندا, قحا قىزمەتىنە بارلىق ەتنوستاردىڭ بەلسەندى جاستارىن تارتا وتىرىپ, جوبالاردى دامىتۋ, ەلىمىزدىڭ كادرلىق الەۋەتىنىڭ شەتەلگە كەتۋىنە جول بەرمەۋ ماقساتىندا جاڭا قازاقستاندى قۇرۋدا جاستارمەن بەلسەندى جۇمىس جۇرگىزۋ جانە مەملەكەتتىك ءتىلدىڭ ءرولىن ارتتىرۋ ماقساتىندا ەتنوستاردى بىرىكتىرۋ ماسەلەلەرى تالقىلاندى.
كەزدەسۋ بارىسىندا قحا توراعاسىنىڭ ورىنباسارى اسسامبلەيا ەلىمىزدىڭ بارلىق ەتنومادەني بىرلەستىكتەرىنە جانە ەتنوستاردىڭ مادەنيەتىن, داستۇرلەرىن, ءتىلىن دامىتۋعا بارىنشا قولداۋ كورسەتەتىنىن اتاپ ءوتتى.
م.ءازىلحانوۆ قازاقستان ۇيعىرلارى رەسپۋبليكالىق ەتنومادەني ورتالىعىنىڭ بەلسەندىلەرىمەن كەزدەسۋدە ۇيعىر ەتنوسىنىڭ قازاقستاندىق ءپاتريوتيزمدى دامىتۋ مەن نىعايتۋعا باعىتتالعان جۇمىسىن جوعارى باعالادى. ونىڭ ايتۋىنشا, بۇگىنگى كۇن اسسامبلەيانىڭ جۇمىسىنا جاڭا تاسىلدەردى ەنگىزۋدى تالاپ ەتەدى.
ءوز كەزەگىندە ۇيعىر ەتنومادەني بىرلەستىگىنىڭ وكىلدەرى «قاسىرەتتى قاڭتار» كەزىندە ورتاق شاڭىراعىمىزدىڭ تىنىشتىعىن ساقتاپ قالعان مەملەكەت باسشىسىنا شىن جۇرەكتەن ريزاشىلىعىن ءبىلدىردى.
سونداي-اق كەزدەسۋ بارىسىندا قحا جۇمىسىنىڭ تيىمدىلىگىن ودان ءارى ارتتىرۋدىڭ نەگىزگى اسپەكتىلەرى قارالدى.