اقىل – ايبىنىمىز, كىتاپ – بايلىعىمىز

ۇلتتىق قوعامدىق سەنىم كەڭەسىنىڭ ءتورتىنشى وتىرىسىندا مەملەكەت باسشىسى قاسىم-جومارت توقاەۆ «تاعى ءبىر ماڭىزدى مىندەت – مەكتەپ كىتاپحانالارىنىڭ كىتاپ قورىن جاڭالاۋ جانە تولىقتىرۋ. قازىر بۇل كىتاپحانالاردىڭ قورى ەسكىرگەن ءارى جۇتاڭ. اسىرەسە كوركەم تۋىندىلار مەن تارتىمدى ادەبيەتتەر تاپشى. قازاق تىلىندەگى ءتيىستى ادەبيەتتەر وتە از نەمەسە مۇلدەم جوق. وقۋشىلار­دىڭ الەم ادەبيەتى كلاسسيكتەرىنىڭ شىعارمالارىنا قولى جەتە بەرمەي­دى», دەي كەلە ەلىمىزدىڭ ءبىلىم جانە عىلىم مينيسترلىگىنە ءتيىستى تاپسىرمالار بەرگەن بولاتىن. وسى ورايدا وقۋشىلاردىڭ بىلىمىنە ءبىلىم, اقىلى­نا اقىل قوساتىن «وقۋعا قۇشتار مەكتەپ» جوباسى ازىرلەنىپ, قولدانىسقا ەنگىزىلدى.

بۇل جوبا جوقتان بار جاساۋ, بولماسا قاعاز جۇزىندە عانا ىسكە اساتىن كوزدى الداۋ ارەكەتى ەمەس. «وقۋعا قۇشتار مەكتەپ» دەگەنىڭىز ەڭ الدىمەن مەكتەپ كىتاپحانالارىن كوركەم ادەبيەتپەن تولىقتىرۋ, وقۋشىلاردى كىتاپ وقۋعا تارتۋ, ونى ادەتكە اينالدىرۋ ءۇشىن ءتۇرلى ءىس-شارالار وتكىزۋ, كىتاپحانالاردا قولايلى جاعداي جاساۋ, جوندەۋ جانە جابدىقتاۋ, كىتاپحاناشىلاردىڭ بىلىكتىلىگىن ارتتىرۋ سىندى اۋقىمدى جۇمىستاردى قامتيتىن ءمانى مەن ماڭىزى بولەك باستاما.

«وقۋعا قۇشتار مەكتەپ» جوباسى مەملەكەت باسشىسىنىڭ تاپسىرماسى بويىنشا جۇزەگە اسىرىلۋدا. ءبىز قويىلعان مىندەتتى ورىنداپ جاتىرمىز, قازىردىڭ وزىندە وڭ ناتيجەلەر بار دەپ ايتۋعا بولادى. جوبا ىسكە اسىرىلعاننان باستاپ مەكتەپ كىتاپحانالارىندا كوركەم ادەبيەت سانى ايتارلىقتاي ءوستى, ونىڭ ىشىندە مەملەكەتتىك تىلدەگى ادەبيەتتەر. ەگەر بۇعان دەيىن قازاق تىلىندەگى ادەبيەتتەر از بولسا, قازىر كىتاپ قورىنىڭ باسىم بولىگىن مەملەكەتتىك تىلدەگى ادەبيەتتەر تولىقتىردى. سونىمەن قاتار تەك قازاقستاندىق اۆتورلاردىڭ عانا ەمەس, الەمدىك ادەبيەت تۋىندىلارى دا بار. «وقۋعا قۇشتار مەكتەپ» – وتە ماڭىزدى جوبا, سوندىقتان بۇل جۇمىستى جالعاستىرۋ قاجەت», دەيدى ءبىلىم جانە عىلىم ءمينيسترى اسحات ايماعامبەتوۆ.

ماسەلەن, بىلتىر قازان ايىندا اتالعان جوبا اياسىندا ەلىمىزدەگى مەكتەپ كىتاپحانالارىنا 2,5 ملن-عا جۋىق كوركەم ادەبيەت ساتىپ الىندى. اتالعان كىتاپتاردىڭ باسىم بولىگى شىعىس قازاقستان, جامبىل جانە پاۆلودار وبلىستارىندا ساتىپ الىنىپ, كىتاپحانا قورىنىڭ باسىم بولىگى مەملەكەتتىك تىلدەگى ادەبيەتتەرمەن تولىقتىرىلدى. رەسپۋبليكالىق عىلىمي-پراكتيكالىق ءبىلىم بەرۋ مازمۇنىن ساراپتاۋ ورتالىعىنىڭ ديرەكتورى ەلدوس نۇرلانوۆتىڭ ايتۋىنشا, وسى جوبانى ىسكە اسىرۋ كەزەڭىندە مەكتەپ وقۋشىلارىنىڭ كىتاپحاناعا دەگەن قىزىعۋشىلىعى ارتا ءتۇستى. «وسى وقۋ جىلىنان باس­تاپ تۇركىستان, پاۆلودار, سولتۇستىك قازاقستان جانە قوستاناي وبلىستارىندا ءبىر وقۋشى كىتاپحاناعا ورتا ەسەپپەن 10 رەتتەن استام, ال الماتى, شىمكەنت قالالارىندا, قىزىلوردا, ماڭعىستاۋ, اتىراۋ جانە باسقا دا وبلىستاردا 6-9 رەت بارعان. بۇل بالالاردىڭ كوركەم ادەبيەتكە كوبىرەك قىزىعۋشىلىق تانىتا باستاعانىن كورسەتەدى», دەيدى ە.نۇرلانوۆ.

راسىمەن دە, «وقۋعا قۇشتار مەكتەپ» جوباسى قولعا الىنا باستاعاننان بەرى مەكتەپ كىتاپحانالارى مەن ونداعى ورىندار سانى كوبەيدى. مەكتەپتەردە بالالاردىڭ كىتاپ وقۋى ءۇشىن قولايلى جاعداي جاسالىپ جاتىر. ارينە, «وقۋعا قۇشتار مەكتەپ» جوباسى اياسىندا قولعا الىنىپ جاتقان وزگە دە ءىس-شارالار, ءتۇرلى تاسىلدەر, تىڭ باستامالار جەتىپ ارتىلادى. ونىڭ بارلىعىن تىلگە تيەك ەتۋ مۇمكىن ەمەس. ەڭ باستىسى, ەرتەڭگى ەل جاستارى كوزى اشىق, كوكىرەگى وياۋ بولىپ ءوسۋى ءۇشىن مەملەكەت تاراپىنان ماڭىزدى قادامدار جاسالىپ جاتىر. وسكەلەڭ ۇرپاق وسىنى ءتۇسىنىپ, باعالاۋى كەرەك. ول ءۇشىن ۇستازدار, كىتاپحاناشىلار, اتا-انالار قاۋىمى ايانباي تەر توگىپ, جاس بۋىندى كىتاپ وقۋعا قىزىقتىرۋدىڭ, ىنتالاندىرۋدىڭ جولىن تابۋى قاجەت. جاڭا قازاقستاندى بۇگىنگى اعا بۋىن كەلەشەك جاس ۇرپاققا ساپالى ءبىلىم, تاعىلىمدى تاربيە بەرۋمەن قالىپتاستىرادى.

اقتوتى تەزەكباەۆا,

ىنتىماق جالپى ءبىلىم بەرەتىن مەكتەپتىڭ ديرەكتورى

قاراعاندى وبلىسى,

جاڭاارقا اۋدانى