قر پرەمەر-ءمينيسترى ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا قر پرەزيدەنتى قاسىم-جومارت توقاەۆتىڭ بيىلعى 8 اقپانداعى ۇكىمەتتىڭ كەڭەيتىلگەن وتىرىسىندا بەرگەن تاپسىرمالارىن ورىنداۋ جونىندەگى شارالار قارالدى, دەپ جازادى Egemen.kz قر پرەمەر-ءمينيسترىنىڭ ءباسپاسوز قىزمەتىنە سىلتەمە جاساپ.
«مەملەكەت باسشىسى قاسىم-جومارت كەمەل ۇلى توقاەۆ ەلىمىزدىڭ وسى جىلعا ارنالعان نەگىزگى الەۋمەتتىك-ەكونوميكالىق دامۋ باسىمدىقتارىن ايقىنداپ بەردى. ۇكىمەتتىڭ ەڭ ماڭىزدى مىندەتتەرىنىڭ ءبىرى – حالىقتىڭ تابىسىن ارتتىرۋ جانە جاڭا جۇمىس ورىندارىن قۇرۋ», دەدى ءا. سمايىلوۆ.
قر پرەزيدەنتىنىڭ تاريفتىك جوسپارلار جونىندەگى تاپسىرماسىن ورىنداۋ اياسىندا مونوپوليست وپەراتورلار مەن دەلدالدار الىپ وتىرعان تاريفتەر مەن كوميسسيالارعا ءبىر اي ىشىندە تالداۋ جۇرگىزىپ, ولاردى قايتا قاراۋ نەمەسە الىپ تاستاۋ جونىندە شەشىمدەر دايىنداۋ تاپسىرىلدى.
پرەمەر-مينيستر مەملەكەت باسشىسىنىڭ تاپسىرمالارىن ىسكە اسىرۋ اياسىندا تاۋ-كەن سەكتورىندا پايدالى قازبالاردى وندىرۋگە سالىناتىن سالىق مولشەرلەمەسىن, مۇناي ونىمدەرىن وندىرۋشىلەرگە ارنالعان اكتسيزدەردى, جەر قويناۋىن پايدالانۋشىلاردىڭ ديۆيدەنتتەرى بويىنشا جەڭىلدىكتەردى جانە ترانسفەرتتىك باعا بەلگىلەۋ ءتارتىبىن قايتا قاراۋ بويىنشا ۇسىنىستار ازىرلەنگەنىن اتاپ ءوتتى.
كوكتەمگى ەگىس جۇمىستارىن جۇرگىزۋ جانە ديقانداردى ارزانداتىلعان ديزەل وتىنىمەن, تۇقىممەن, تىڭايتقىشتارمەن جانە پەستيتسيدتەرمەن قامتاماسىز ەتۋ ماسەلەسىنە ەرەكشە نازار اۋدارىلدى.
قوماقتى مەملەكەتتىك قارجىلاندىرۋ مەن كورسەتىلەتىن مەملەكەتتىك قولداۋ شارالارىنا قاراماستان, ارنايى ەكونوميكالىق ايماقتاردىڭ ەل ەكونوميكاسىنا قوسىپ وتىرعان ۇلەسى وتە تومەن دەڭگەيدە قالىپ وتىر.
«باسقارۋشى كومپانيالاردىڭ جۇمىسى ءتيىمسىز. الەۋەتتى ينۆەستورلار ارنايى ەكونوميكالىق ايماقتارعا كىرۋ, قاجەتتى ينفراقۇرىلىمنىڭ بولماۋى, باسقارۋشى كومپانيالاردىڭ سالعىرتتىعى سياقتى ۇنەمى ءتۇرلى كەدەرگىلەرگە تاپ كەلەدى», دەپ ءاليحان سمايىلوۆ, تەكسەرىس جۇرگىزىپ, 1 ناۋرىزعا دەيىن ناقتى ۇسىنىستار ازىرلەۋدى تاپسىردى.
تاۋارلىق جانە سۇيىتىلعان گاز ءوندىرىسىن ۇلعايتۋ, سونداي-اق مۇناي-گاز سالاسىنداعى ينۆەستورلار ءۇشىن ىنتالاندىرۋ شارالارىن ازىرلەۋ ماقساتىندا ۇكىمەت باسشىسى ءبىر اي ىشىندە ۇكىمەتكە ءتيىستى زاڭنامالىق تۇزەتۋلەر توپتاماسىن ەنگىزۋدى تاپسىردى.
«رەسۋرستىق بازانى ۇلعايتۋ ماسەلەسى وتە وزەكتى بولماق. نەگىزگى باسىمدىق – ىشكى نارىقتى, ونىڭ ىشىندە كاسىپورىنداردى گازداندىرۋ», دەدى پرەمەر-مينيستر وتىرىس بارىسىندا.
سونىمەن قاتار مينيسترلەر كابينەتىنىڭ باسشىسى اۋرۋحانالار سالۋ بويىنشا مەملەكەتتىك-جەكەمەنشىك ارىپتەستىك جوباسىنىڭ بىرىڭعاي جانە وڭتايلى نۇسقاسىن ازىرلەۋدى, شۇعىل تۇردە «سق-فارماتسيا» بازاسىندا مەديتسينالىق تەحنيكانى ءبىر ورتالىقتان ساتىپ الۋ, ونىڭ ىشىندە وندىرۋشىلەردەن بۇكىل پايدالانۋ مەرزىمىنە سەرۆيس ۇسىنا وتىرىپ, تىكەلەي ساتىپ الۋ ماسەلەلەرىن پىسىقتاۋدى تاپسىردى.
«ساتىپ الۋدىڭ اشىقتىعىن قامتاماسىز ەتۋ ءۇشىن بۇل پروتسەستى تولىعىمەن اۆتوماتتاندىرۋ قاجەت», دەدى قر پرەمەر-ءمينيسترى.
«قازىرگى جاعدايدا ءبىز جۇدىرىقتاي جۇمىلىپ, ناقتى ناتيجە كورسەتۋىمىز قاجەت. ءبىزدىڭ باستى مىندەتىمىز – حالىقتىڭ تابىسىن ارتتىرۋ جانە تۇرمىس ساپاسىن جاقسارتۋ. سونىمەن قاتار باسەكەگە قابىلەتتى جانە ارتاراپتاندىرىلعان ەكونوميكانى دامىتۋعا كۇش سالۋىمىز قاجەت», دەدى ءا. سمايىلوۆ.