IBF جانە IBO تۇجىرىمدارى بويىنشا ورتا سالماق دارەجەسىندەگى الەم چەمپيونى, وتانداسىمىز گەننادي گولوۆكين Walking the Floor باعدارلاماسىندا ورتا سالماقتاعى وزگە تۇجىرىمدار بويىنشا الەم چەمپيوندارى دجەرمالل چارلو جانە دەمەتريۋس اندرادەمەن كەزدەسۋ وتكىزۋ تۋرالى سۇراققا جاۋاپ بەردى, دەپ حابارلايدى Egemen.kz sports.kz-كە سىلتەمە جاساپ.
«مەن كۇنى بۇرىن جوسپارىممەن بولىسكەندى ۇناتپايمىن. ويتكەنى ريوتا مۋراتاعا قارسى وتەتىن جەكپە-جەكتىڭ ماڭىزى زور. ودان اتتاپ ءوتىپ سويلەۋگە بولمايدى. سونداي-اق باسقا بوكسشىلاردىڭ اتتارىن اتاپ, ولاردى جارنامالاعىم كەلمەيدى. كەز كەلگەنىنىڭ اتىن اتاساڭ, ءارى قاراي ايقايلاي جونەلەدى. ال بىرەۋلەردى ەلەمەسەڭ, ول دا الدىڭعىسىنان اسىرىپ, بىردەڭەلەردى ايتىپ شىعادى. ولاردىڭ كىممەن جۇدىرىقتاساتىنى بەلگىلى. جەكپە-جەكتەرىنىڭ داتاسى دا, وتكىزىلەتىن ورنى دا انىقتالعان. پروموۋتەرلەرى مەن مەنەدجەرلەرىنىڭ تاڭداۋى سولاي بولدى. ءوز باسىم ۇلكەن جەكپە-جەكتەرگە قاي كەزدە دە دۇرىس قارايمىن. سونىمەن قاتار كەيبىر بوكسشىلاردىڭ جوسپارىنا كەدەرگى كەلتىرگىم كەلمەيدى. قازىر بىرەۋىنىڭ اتىن اتاسام, مەنىڭ ايتقانىمدى مىسالعا كەلتىرىپ, جوسپارداعى جەكپە-جەگىنەن باس تارتۋى ىقتيمال.
ءبارى دۇرىس بولۋى ءۇشىن الدىمەن مۋراتامەن قولعاپ ءتۇيىستىرىپ الايىن. نەگىزى قارجىلىق جاعىنان دا, يميدجدىك تۇرعىدان دا ءتيىمدى جەكپە-جەكتەردى ءبىرىنشى كەزەكتە نازارعا الاتىن بولامىن. كىمنىڭ نارىقتاعى سۇرانىسى جوعارى ەكەنى مىندەتتى تۇردە ەسكەرىلەدى. سونداي-اق الەم چەمپيونى بەلدىگى بار بوكسشىلار نازاردان تىس قالماق ەمەس», دەدى گەننادي گولوۆكين ءوز ويىمەن ءبولىسىپ.