«قىزىل كىتاپقا» ەنگەن «التىنەمەل» مەملەكەتتىك ۇلتتىق تابيعي پاركىندەگى جانۋارلارعا ساناق جۇرگىزىلدى. بۇل تۋرالى «24 kz» حابارلادى.
اتالعان ۇلتتىق پارك قىزمەتكەرلەرى مەن زوولوگيا جانە اڭشىلىقتى قاداعالاۋ ينستيتۋتىنىڭ ماماندارى ەكى كۇن بويى جانۋارلاردى ساناپ شىقتى. وتكەن جىلى مۇنداعى تاۋ ەشكىلەرى 131 بولسا, قازىردە ونىڭ سانى 158-گە جەتكەن. ال قاراقۇيرىق باسى بىلتىرعى جىلمەن سالىستىرعاندا 350-گە ءوسىپتى. الايدا, «قىزىل كىتاپقا» ەنگىزىلگەن جانۋارلاردىڭ سانى ارتۋىنا قاسقىرلار شابۋىلى كەدەرگى جاساپ تۇر. ويتكەنى, ەسكى ادىسپەن قاقپان قۇرىپ, قاسقىر ۇستاۋ كۇتكەندەگىدەي ناتيجە بەرمەي وتىر.
«التىنەمەل» مەملەكەتتىك ۇلتتىق تابيعي پاركى شىعىستان باتىسقا, ودان ورتالىق ازياعا سوزىلىپ جاتقان تۇران جانە جوڭعار ءشولى, شىعىس جانە وڭتۇستىك-شىعىس باعىتقا قاراي قىتاي مەن موڭعولياعا دەيىن جالعاساتىن بيوگرافيالىق اۋماقتا ورنالاسقاندىعىمەن قۇندى. سوندىقتان پاركتىڭ وزىنە عانا ءتان بيولوگيالىق, لاندشافتىق ەرەكشەلىكتەرى بار. ونىڭ تاعى ءبىر تابيعي ەرەكشەلىگى, 20-25 مەتر ارالىقتا وسىمدىكتەر ەكوجۇيەسىنىڭ اۋىسۋىن انىق بايقاۋعا بولادى. ناقتى ايتقاندا, بۇل جەردەن جوعالىپ كەتۋ قاۋپى تونگەن 60 ءتۇرلى وسىمدىكتەردى كەزدەستىرە الاسىز. سونىڭ 29 ءتۇرى «قىزىل كىتاپقا» ەنگەن. سونىمەن بىرگە, پارك اۋماعىندا قازاقستاننىڭ «قىزىل كىتابىنا» ەنگەن قۇلان, قاراقۇيرىقتىڭ ەڭ كوپ ءتۇرى مەكەندەيدى. پاركتە جىرتقىش قۇستاردىڭ دا تۇرلەرى وتە كوپ. «التىنەمەل» مەملەكەتتىك ۇلتتىق تابيعي پاركى الەمگە ايگىلى پرجەۆالسكي جىلقىلارىن تابيعاتقا قايتا قايتارۋ ماقساتىنداعى سىناق جۇمىستارىن جۇرگىزىپ وتىرعان ەلىمىزدەگى بىردەن-ءبىر عىلىمي ورتالىق. دۇنيەجۇزىندە سانى وتە از قالعان بۇحار بۇعىسى دا ءبىزدىڭ پاركتە بار. سونداي-اق, پارك اۋماعىنان ەمدىك قاسيەتى ايرىقشا مينەرالدى ىستىق سۋدىڭ (تەرمينالدىق) قاينار كوزدەرىن كەزدەستىرە الاسىز. مۇندا تاريحي-مادەني ەسكەرتكىشتەر دە بار.ءبىزدىڭ داۋىرىمىزگە دەيىنگى IV-VI عاسىرلارداعى ساق قورعاندارىنىڭ ىشىندە «بەسشاتىر» قورعاندارىنىڭ الاتىن ورنى ايرىقشا», -دەدى «التىنەمەل» مەملەكەتتىك ۇلتتىق تابيعي پاركىنىڭ باس ديرەكتورى حالىق ءبايادىلوۆ.
ءامىرحان الماعانبەتوۆ.
دەرەككوز: «24 kz».
فوتو: e-history.kz.