جامبىل وبلىسىندا اۋا رايىنىڭ كۇرت ناشارلاۋىنا بايلانىستى رەسپۋبليكالىق جانە وبلىستىق ماڭىزى بار جولدار جابىلدى, دەپ حابارلايدى Egemen.kz.
جامبىل وبلىسى توتەنشە جاعدايلار دەپارتامەنتىنىڭ حابارلاۋىنشا, 14 اقپاندا ساعات 13:15-تە قاتتى بوران, نولدىك كورىنۋ جانە اۋا رايىنىڭ جالپى ناشارلاۋىنا بايلانىستى تاراز-شىمكەنت تاس جولىندا بارلىق اۆتوكولىك تۇرلەرى ءۇشىن قوزعالىس جابىلدى.
اۋا رايىنىڭ قولايسىزدىعىنا بايلانىستى جامبىل وبلىسى پوليتسيا دەپارتامەنتى جۇرگىزۋشىلەرگە جول قوزعالىسى ەرەجەلەرى مەن قاۋىپسىزدىك نورمالارىن ساقتاۋدى, ءاۆتوموبيلدىڭ تەحنيكالىق جاعدايىنا مۇقيات بولۋدى, جاياۋ جۇرگىنشىلەر جولدا پايدا بولعان كەزدە ساق بولۋدى ەسكەرتەدى.
«قۇتقارۋ قىزمەتىنىڭ حابارلاۋىنشا, 14-17 اقپان ارالىعىندا جامبىل وبلىسىندا اۋا رايىنىڭ ناشارلاۋى, جەلدىڭ كۇشەيۋى جانە كوكتايعاق كۇتىلەدى. وسىعان بايلانىستى جامبىل وبلىسى پوليتسيا دەپارتامەنتى قىسقى جول بويىمەن (كوكتايعاققا, جاڭادان جاۋعان قارعا, تاپتالعان قارعا) ءجۇرۋ كەزىندە اۆتوموبيلدەر اراسىنداعى قاشىقتىقتى, بۇيىرلىك ارالىقتى, جىلدامدىق رەجيمىن قاتاڭ ساقتاۋ, سونداي-اق كەنەتتەن تەجەۋ مەن قوزعالىسقا جول بەرمەۋ قاجەت ەكەنىن ەسكە سالادى», دەپ اتاپ ءوتتى جامبىل وبلىسى پوليتسيا دەپارتامەنتىنىڭ ءباسپاسوز قىزمەتى.
جۇرگىزۋشىلەرگە اۋا رايى جاعدايلارىن ەسكەرە وتىرىپ, كولىكتەگى قوزعالىس مارشرۋتىن الدىن الا جوسپارلاۋعا جانە اۋا رايى ناشارلاعان كەزدە ەلدى مەكەندەردەن تىس جەرلەرگە شىعۋدى شەكتەۋگە كەڭەس بەرىلەدى.