الماتى
الماتى جىلداعىداي ناۋرىز مەرەكەسىن ۇلكەن ءسان-سالتاناتپەن قارسى الدى. بيىلعى مەرەكەنىڭ ەرەكشەلىگى سول, قالا اكىمدىگىنىڭ باستاماسىمەن تابيعات تۇلەگەن بۇل مەرەكەنى زيالى قاۋىم وكىلدەرى مەن ەل نامىسىن قورعاپ جۇرگەن سپورت شەبەرلەرى قالالىق مادەنيەت جانە دەمالىس ساياباعىنا جاس كوشەت وتىرعىزىپ, جاڭارۋ مەن قايتا تۇلەۋ داستۇرىنە ساي مەرەكەلىك شارالاردى قولعا الۋدان باستادى.
ناۋرىز مەرەكەسىندە قالاداعى بارلىق مەكەمەلەر ۇلتتىق-مادەني شارالاردى ۇيىمداستىرىپ, حالىققا قىزمەت كورسەتۋ ورتالىقتارى كەلۋشىلەرگە ارنايى سىي-سياپات جاسادى. جەكەلەگەن مەملەكەتتىك قىزمەت كورسەتۋ ورتالىقتارى مەن بانك قىزمەتكەرلەرى ۇلتتىق كيىم كيىپ, ءاربىر تاپسىرىس بەرۋشى جانە مۇقتاج جانعا مەرەكەلىك سىيلىقتار تاپسىردى. قالادا ورنالاسقان ءاربىر عيماراتتا ناۋرىز كوجە مەن سىيلىقتار ۇلەستىرىلدى.
ەلباسىنىڭ ءوزى اشقان «مەگا الماتى-2» ويىن-ساۋىق كەشەنىندە بوستاندىق اۋدانىنىڭ اكىمدىگى مەرەكەلىك ۇلكەن شارا ۇيىمداستىردى. سىيلىقتار تاراتىلىپ, مەرەكەلىك شارالار, ءتۇرلى سپورتتىق-مادەني ويىندار وتكىزىلدى. قالانىڭ ورتالىق الاڭىنان باستاپ, بارلىق اۋدانداردا جەڭىلدەتىلگەن باعامەن جارمەڭكەلەر ۇيىمداستىرىلدى.
بۇل كۇنى, سونداي-اق قازاق ەستراداسىنىڭ شەبەرلەرى ەل الدىندا ونەر كورسەتىپ, بەلگىلى سپورت جانە مادەنيەت قايراتكەرلەرى حالقىمەن بىرگە بولدى. قالا اكىمدىگىنىڭ ۇيىمداستىرۋىمەن حالىققا ناۋرىز كوجە تاراتىلىپ, ۇلتتىق سپورت تۇرلەرى – بالۋان كۇرەسى, ارقان تارتىسۋ, جەكە سايىس تۇرلەرىنەن باق سىناسۋ باسەكەسى جينالعان قاۋىمنىڭ كوڭىلىنەن شىعا ءبىلدى.
قالا الاڭدارىنا تىگىلگەن كيىز ۇيلەر كەلۋشى قوناقتاردى مەرەكەلىك داستارقانمەن كۇتىپ, ەتنوس وكىلدەرى مادەني ءىس-شارالار ۇسىندى. كەشكىسىن قالا اسپانىن ادەتتەگىدەي وت-شاشۋ كومكەرىپ, جاستاردىڭ بي كەشىنىڭ قۇرمەتىنە قازاقستان ەسترادا جۇلدىزدارىنىڭ مەرەكەلىك كونتسەرتى ءوتتى.
قانات ەسكەندىر,
«ەگەمەن قازاقستان».
الماتى وبلىسى
تابيعات-انانىڭ عالاماتتىعىندا شەك بار ما؟! كۇنى كەشە عانا تالدىقورعاندا سىركىرەي جاۋىن جاۋىپ, اسپان استى قارا-قوشقىل بۇلتپەن تۇنەرىپ تۇرعان-دى. مىنە, 21 ناۋرىزدا كۇن رايى شايداي اشىلىپ, حالىقتى شاتتىققا بولەدى. ورتالىق الاڭعا اق شاتىرلار تىگىلىپ, سان الۋان ءتۇستى ۇلتتىق كيىمدەرىن مالىنتا كيگەن ونەر ادامدارى اسەم اندەرىن اۋەلەتىپ, مىڭ بۇرالا بيلەپ بەرگەندە ەل شىن قۋانىپ, ونەرپازدار ونەرىنە ءتانتى بولدى.
جۇرت الدىنا شىققان الماتى وبلىسىنىڭ اكىمى اڭسار مۇساحانوۆ: «بارشاڭىزدى شۋاقتى نۇرىمەن شاتتىققا بولەگەن, تابيعاتتى تۇلەتكەن, ۇلىستىڭ ۇلى كۇنى, جىل باسى – ءاز ناۋرىز مەرەكەسىمەن قۇتتىقتايمىن! ەلباسى نۇرسۇلتان نازارباەۆ «تاريحي تامىرى تەرەڭگە بويلاعان ءاز ناۋرىز دانا حالقىمىزدى قاي كەزدە دە ەڭسەسى بيىك ەلدىكتىڭ, ىرگەسى سوگىلمەس بىرلىكتىڭ, ىرىس پەن ىنتىماقتىڭ مەرەكەسى» دەپ اتاپ كورسەتكەندەي, ناۋرىز كوكتەم مەن جاڭارۋدىڭ جارشىسى, ۇلتارالىق تاتۋلىق پەن دوستىقتىڭ دانەكەرى», – دەپ مەرەكەلىك شارانى اشىپ بەردى.
بيىل جەتىسۋ جەرىندە ءاز ناۋرىز وزىندىك تىڭ ەرەكشەلىكتەرىمەن دارالانۋدا. ءوڭىر باسشىسىنىڭ ۇيعارىمىمەن جەتى كۇن: باتا بەرۋ-الۋ ءداستۇرى, ادامدار پەندەشىلىگىن ءبىرى ەكىنشىسى كەشىرۋ كۇنى, قامقورلىق جاساۋ, بۇلاق كوزدەرىن تازالاۋ, اعاش ەگۋ, بەيبىتشىلىك پەن دوستىق, مەيىرىمدىلىك كۇنى دەپ بەلگىلەنىپ, ول جالپىحالىقتىق قولداۋ تاپتى.
تاعى ءبىر اتاپ وتەر جايت – جەلماياسىنا ءمىنىپ, جەر ءجانناتى جەتىسۋعا دا جەتكەن اسان قايعى بابا بەينەسىن سومداعان كورىنىستەن باستاۋ العان ۇلتتىق داستۇرلەر ادەمىلىكتىڭ كەرەمەت ءبىر كورىنىستەرىمەن بەينەلەي جالعاسىپ, جاس ۇرپاق ساناسىنا وزىندىك جولىمەن سىڭىرىلگەنى بولدى. ءسويتىپ, كۇن مەن ءتۇن تەڭەلگەندە تابيعاتتىڭ تاماشا تارتۋىنا ءتانتى بولعان حالىق جاراتقان يەمىزگە العىستارىن اعىتا, اقبوز ۇيلەرى مەن شاتىرلارىن تىگە, جەتى ءتۇرلى ءدام قوسىپ جاساعان ناۋرىز كوجە ءىشۋدى باستادى.
نۇربول الدىباەۆ,
«ەگەمەن قازاقستان».
اقمولا وبلىسى
كوكشەتاۋ كەشەدەن بەرى ناۋرىز جارشىلارىنىڭ اسقاق داۋسىمەن ويانۋدا. كوڭىلدى كوككە ورلەتكەن شۋاقتى مەرەكە كەلدى ولكەمىزگە! بۇل – قازاق ەلىنىڭ اسىل مۇراتتارىن دارىپتەگەن دۋماندى ءارى ويلى توي رەتىندە جۇرەكتەرگە تولعانىس تەبىرەنىستەرىن قۇيۋىمەن قىمبات مەيرام. ول يۋنەسكو-نىڭ مادەني مۇرا تىزىمىنە ەنۋىمەن حالقىمىزدى ماقتانىش سەزىمىنە بولەيدى.
بيىلعى ناۋرىز ءوزىنىڭ ىزگىلىك, حالىق اراسىنداعى دوستىقتى بەكىتۋ, قايىرىمدىلىق, باۋىرلاستىق قاتىناستاردى نىعايتۋ, ءار ۇلتتىڭ سالت-داستۇرلەرىنە قۇرمەت سەزىمدەرىن شالقىتۋىمەن دارىپتەلۋدە. كوكشەتاۋدىڭ باستى مەرەكەلىك شارالارى ابىلاي حان جانە تاۋەلسىزدىك الاڭدارىندا قاتار وتكىزىلۋى دە جان دۇنيەمىزگە جىلىلىق ۇيالاتادى.
مەرەكە بۇرناعى كۇنگى ازىق-ت ۇلىك جارمەڭكەسىمەن باستالۋىندا ۇلكەن ءمان بار دەپ ەسەپتەيدى جۇرتشىلىق. مۇندا ەلىمىزدىڭ دارقان پەيىلى, مولشىلىق مۇراتتارى, «داستارقاننان ءدام كەتپەسىن» دەگەن ۇعىم ارناسى اسقاقتايدى. قالالىقتاردىڭ مەرەكەلىك ءمازىرى 15,1 ميلليون تەڭگەنىڭ 34,6 توننا تاعام ونىمدەرىمەن تولىقتى.
قالاداعى كيىز ءۇي اۋىلدارىن ارالاپ شىعۋدىڭ ءوزى عانيبەت. عاسىرلار تەرەڭىنەن بۇگىنىمىزگە جول تارتقان كوش-كەرۋەن, قىدىر بابامىزدىڭ اق تىلەگى, سال-سەرىلەردىڭ دۋمان شەرۋى قالىڭ جۇرتتى قۋانىش كەمەسىندە تەربەلتەدى. اقمولا وبلىسىنىڭ اكىمى قوسمان ايتمۇحامەتوۆتىڭ سالتاناتتى قۇتتىقتاۋى بۇگىنگى مەن بولاشاقتى ۇندەستىرۋىمەن سالماقتانا ءتۇستى.
«ناۋرىز دۋمان» وبلىستىڭ بارلىق اۋداندارىندا شاتتىق شاشتى. ماسەلەن, شالعايداعى ەگىندىكول اۋدانىندا رەسپۋبليكالىق اقىندار ايتىسى, بۋراباي اۋدانىندا «بولاشاقتىڭ جۇلدىزدارى» ايماقتىق بايقاۋى, جاقسى اۋدانىندا «جىگىت سۇلتانى», «قاراجورعا» سايىستارى, ەڭبەكشىلدەر اۋدانىندا «شىرايلى داستارقان», جارقايىڭ اۋدانىندا «باۋىرساق دۋمان», زەرەندى اۋدانىندا «ۇلكەنگە قۇرمەت, كىشىگە ىزەت» شاراسى وتكىزىلدى. ال ستەپنوگور قالاسىندا بوبەكتەر ورتالىعى, تسەلينوگراد اۋدانىندا ەكى بالاباقشا, اتباسار اۋدانىندا بالاباقشامەن قاتار, دەنەشىنىقتىرۋ-ساۋىقتىرۋ كەشەنى اشىلدى.
باقبەرگەن امالبەك,
«ەگەمەن قازاقستان».
اقتوبە وبلىسى
كوكتەمنىڭ مىڭ قۇبىلعان اۋا رايىنا قاراماستان, اقتوبەلىكتەر ناۋرىز مەيرامىنىڭ باستى شارالارى وتەتىن قازاقستان رەسپۋبليكاسىنىڭ تۇڭعىش پرەزيدەنت ن.نازارباەۆ اتىنداعى ورتالىق مادەنيەت جانە دەمالىس ساياباعىنا جينالدى. بۇركىپ باستالعان جاۋىننىڭ ارتى اق ۇلپا قارعا ۇلاسقانىمەن, مەرەكەگە جينالعانداردىڭ جۇزىنەن قۋانىش لەبى ەسىپ تۇردى. قول ۇستاسقان جاستار دا, نەمەرەسىن جەتەكتەگەن قارتتار دا ساياباقتا تىگىلگەن كيىز ۇيلەردى تاماشالاپ, ناۋرىز كوجە مەن كومپيىپ پىسكەن باۋىرساقتان ءدام تاتىپ جاتتى. ورتالىق ساياباققا دەمالۋعا كەلگەندەرگە قىزىر بابا باتاسىن بەردى, جاراپازان ايتىلدى. ونىڭ ارتى اقتوبەلىك ونەر شەبەرلەرى مەن ەتنومادەني بىرلەستىكتەر كوركەمونەرپازدارىنىڭ كونتسەرتتىك باعدارلاماسىنا ۇلاستى. سونىمەن قاتار, كوپشىلىك جىل يەسى – جىلقى, كوكتەم ارۋى قاتىساتىن ساحنالاندىرىلعان قويىلىمداردى جانە قىس پەن كوكتەمنىڭ «تايتالاسىن» تاماشالادى. مۇندا 11 اقشاڭقان كيىز ءۇي تىگىلدى. اراسىندا 16 قانات كيىز ءۇي دە بار. كەلۋشىلەر كيىز ۇيدەگى كورمەدەن اتا-بابالارىمىزدىڭ تۇرمىس-تىرلىگىمەن دە تانىستى.
ۇلىستىڭ ۇلى كۇنىندە اقتوبە قالاسىنىڭ 7 الاڭىندا جانە قالاعا قاراستى 5 اۋىلدىق وكرۋگتە 30-دان استام كيىز ءۇي تىگىلدى. مەرەكەدە تۇرعىندار مەن قالا قوناقتارىنا 4 توننا باۋىرساق پەن 5 مىڭ ليتر ناۋرىز كوجە ۇسىنىلدى. ناۋرىز كوجە مەن باۋىرساقتى ازىرلەۋگە قالاداعى 42 ساۋدا نىسانى, مەيرامحانا مەن ءدامحانا جۇمىلدىرىلىپتى.
مەرەكەلىك كونتسەرتتەر قالاداعى ساياباقتار مەن مادەنيەت ۇيلەرىنىڭ الاڭدارىن ءان مەن كۇيگە بولەدى. بەكىتىلگەن ءىس-جوسپارعا سايكەس وبلىس ورتالىعىندا 80-نەن استام مەرەكەلىك شارا ۇيىمداستىرىلدى. شارالار اياسىندا قازاق كۇرەسىنەن «قازاقستان بارىسى» وبلىستىق ءتۋرنيرى جالاۋىن كوتەردى. سپورتتىڭ كوپتەگەن تۇرىنەن جارىستار ۇيىمداستىرىلدى.
ناۋرىز مەرەكەسى وبلىستىڭ ون ەكى اۋدانىندا دا ۇيىمشىلدىقپەن باستالدى. حالىقتىق مەرەكەنىڭ اجارى بۇرىنعى جىلداردان گورى ايشىقتالا تۇسكەندەي كورىندى. اقتوبەلىكتەر ۇلىستىڭ ۇلى كۇنى جاڭبىر جاۋىپ, ونىڭ سوڭى قارعا ۇلاسقانىن جاقسىلىققا جورىپ, مولشىلىقتىڭ باسى بولعاي دەپ تىلەدى.
ساتىبالدى ءساۋىرباي,
«ەگەمەن قازاقستان».
سۋرەتتى تۇسىرگەن قايسار شەرىم.
اتىراۋ وبلىسى
اتىراۋدا ەكى-ءۇش كۇننەن بەرى جەل ەكپىنى كۇشەيىپ, بىرنەشە الەۋمەتتىك نىساندار مەن تۇرعىن ۇيلەر شاتىرىن ۇشىرىپ اكەتكەن ەدى. سول جەلدىڭ ەكپىنى كەشە ءسال سايابىرلاپ, سىركىرەپ جاڭبىر جاۋدى. بۇل ۇلىستىڭ ۇلى كۇنى – ناۋرىزدى مەرەكەلەۋگە يساتاي-ماحامبەت الاڭىنا اعىلعان جۇرتشىلىقتىڭ كوڭىلىن الاڭداتا قويعان جوق.
بۇل الاڭ – ءوڭىر جۇرتشىلىعى ءۇشىن ءتۇرلى مادەني-كوپشىلىك شارا وتەتىن بىردەن-ءبىر ورىن. كەشە قالا ورتالىعىنداعى وسى الاڭعا 100-دەن استام كيىز ءۇي تىگىلىپ, ناۋرىز كوجە مەن وزگە دە ۇلتتىق تاعامدار كوپشىلىككە ۇسىنىلدى. ناۋرىز مەرەكەسىنىڭ جالپىحالىقتىق سيپات الۋىنا ءتۇرلى كاسىپورىندار مەن مەكەمەلەر, قوعامدىق ۇيىمدار مەن ەتنومادەني بىرلەستىكتەر دە بەلسەنە اتسالىستى. ال تۇرعىندار ءبىر-ءبىرىن ناۋرىز مەرەكەسىمەن ەمەن-جارقىن قۇتتىقتاپ, ەڭ ىزگى تىلەكتەرىن ءبىلدىرىپ جاتتى.
– ناۋرىزدى مەرەكەلەۋ بارىسىندا ۇلتتىق قۇندىلىقتارىمىزدى كەڭىنەن ناسيحاتتاۋعا كوڭىل ءبولۋىمىز قاجەت. ويتكەنى, بۇل تەك ناۋرىز كوجە ءىشىپ, ەت-باۋىرساق جەپ, قارىن تويدىراتىن مەرەكە بولماۋى ءتيىس. ماسەلەن, ناۋرىز مەرەكەسىندە قازاقتىڭ ۇلتتىق ويىندارىنان سايىستار, بەسىككە سالۋ, تۇساۋكەسەر وتكىزىلسە, ۇيلەنەتىن جاستاردىڭ نەكەسى قيىلىپ, ولارعا ەلگە بەلگىلى دۋالى اۋىزدى قاريالار باتا بەرىپ جاتسا, كەيىنگى ۇرپاققا ونەگە بولار ەدى, – دەدى «قازاق ءتىلى» حالىقارالىق قوعامى اتىراۋ وبلىستىق فيليالىنىڭ توراعاسى ءابىلحان تولەۋىشەۆ.
مۇنايلى وڭىردەگى ناۋرىز مەرەكەسىندە تاڭدايىنا بۇلبۇل ۇيا سالعان انشىلەر ءان قالىقتاتسا, ون ساۋساعىنان كۇي سورعالاعان كۇيشىلەر قاسيەتتى قارا دومبىرادان كۇي كۇمبىرلەتتى. بيشىلەر توبى مىڭ بۇرالا بي بيلەدى. ناۋرىز مەرەكەسى اياسىنداعى مادەني شارالار بۇگىن دە ءوز جالعاسىن تابادى. سونداي شارانىڭ ءبىرى – بالالار اراسىندا اسىق اتۋ سايىسى وتپەك.
جولداسبەك شوپەعۇل,
«ەگەمەن قازاقستان».
باتىس قازاقستان وبلىسى
ناۋرىز – جىلدىڭ باسى. ۇلىستىڭ ۇلى كۇنى رەسپۋبليكانىڭ باتىس ءوڭىرلەرىندە كەڭەستىك كەزەڭنىڭ وزىندە ناۋرىز ايىنىڭ 14-ىنەن باستاۋ الىپ كەلدى. مۇنىڭ ءوزى ەجەلگى جىل ساناۋ ءداستۇرى مەن حالىقتىق كۇنتۇزبەگە تولىق سايكەس كەلەدى. ويتكەنى, ءار ايدىڭ 14-ءى ەسكىشە ءبىر جاڭاسىنا تەڭەسەدى. وسى تۋعان جاڭا اي بۇكىلحالىقتىق ناۋرىز مەرەكەسىنە ۇلاسىپ, كەشە ورال ءوڭىرىنىڭ كەڭ جازيرا دالاسى مەن گۇل جايناعان قالاسى بۇرىنعىسىنان دا اسقاقتاپ سالا بەردى. وسىلايشا وڭىردە ناۋرىز تويى توعىز كۇنگە سوزىلاتىنىن كورسەتتى.
ۇلىستىڭ ۇلى كۇنى اقجايىق ايماعىن مەكەندەيتىن ءتۇرلى ەتنوس وكىلدەرىنىڭ ورتاق مەرەكەسىنە, بەرەكە-بىرلىك پەن تاتۋلىق جانە جاڭارۋ مەيرامىنا اينالدى. بۇل جونىندە گازەت تىلشىسىنە باتىس قازاقستان وبلىستىق ورىس مادەني بىرلەستىگىنىڭ توراعاسى سەرگەي پوگودين ايتىپ بەردى. سونداي-اق, ناۋرىزدىڭ ساپالىق تۇرعىدان جاڭا تۇرپاتقا ەنىپ كەلە جاتقانى دا ايقىن اڭعارىلىپ تۇردى. ەڭ باستىسى, ناۋرىز تويىنىڭ قادىر-قاسيەتىن ونىڭ ەلدىكتىڭ ەڭسەلەنىپ, اۋىزبىرشىلىكتىڭ ارتا تۇسۋىنە قوساتىن ۇلەسى مەن جوعارى رۋحىن وبلىستا وتكىزىلگەن سان-سالالى مەرەكەلىك شارالارمەن شەكتەي سالۋ ەش مۇمكىن ەمەس.
حالىقتىق جاڭا جىلدى مەرەكەلەۋدىڭ مازمۇنى مەن ءتۇرى ءبىر-بىرىمەن تىعىز ۇيلەسىم تاۋىپ, حالقىمىزدىڭ ەجەلگى سالت-داستۇرلەرىمەن سۋارىلىپ جاتۋى دا جازىلماعان زاڭدىلىقتاي اسەر قالدىردى. ايتالىق, اقجايىق بويىندا «نۇر سەبەلە, ناۋرىزىم!» اتتى فەستيۆال بالالار مەن جاسوسپىرىمدەردى اتا-بابادان ميراس بولىپ كەلە جاتقان ۇلتتىق قولونەردىڭ قىر-سىرىنا قانىقتىرۋدى ماقسات ەتىپتى. مۇنداي مىسالدار از ەمەس.
ءتۇيىپ ايتقاندا, تورىمىزگە اتتاعان ءاز ناۋرىز ەلىمىزدىڭ باتىس بوساعاسىنداعى ءار شاڭىراققا شادىمان شاتتىق پەن قۋانىش, باق-بەرەكە سىيلادى.
تەمىر قۇسايىن,
«ەگەمەن قازاقستان».
جامبىل وبلىسى
ورتالىق «دوستىق» الاڭىن باسىپ وتەتىن تولە بي كوشەسىنە اق شاڭقان 20 كيىز ءۇي تىگىلىپ, ولار مەرەكەگە ساي بەزەندىرىلگەن. ءار ءۇيدىڭ تۇسىندا ءانشى, ءبيشى, كۇيشىسى بار تالانتتى ونەرپازدار ونەرلەرىن كوڭىلدى توپپەن بولىسۋدە.
ۇلتتىق وركەستردىڭ كۇمبىرلەگەن كۇيى اياسىندا وتكەن قىز قۋ, تەڭگە ءىلۋ سياقتى ويىندار دا اسەرلى شىقتى. بايدىبەك بابا ەسكەرتكىشى الدىنداعى ساحنا تورىندەگى لەد ەكرانى جارق-جۇرق ەتىپ, ناۋرىز مەرەكەسىنىڭ شات-شادىمان كوڭىل-كۇيىن پاش ەتكەندەي. كەرنەيشىلەر, داۋىلپازشىلار, اتقا مىنگەن جارشىلار حالىققا ناۋرىز كەلگەنىن جار سالا حابارلاپ جاتتى.
ۇلتتىق كيىمدەرىمەن جاسانعان 10 ءبۇلدىرشىندى ەرتكەن جەر-انا, ايسۇلۋ, كۇنسۇلۋ كورىنىسى جانە جەر-انانىڭ پەرزەنتتەرىنە تەبىرەنە ارناعان تولعاۋى جۇرتتى كەرەمەت اسەرگە بولەدى. بوز تۇيەگە مىنگەن قىدىر اتا مەن ونىڭ سوڭىنا ەرگەن ءبىر توپ قاريالار, كۇن انا, سۋ انا, اۋا انا, سونداي-اق قازاق, وزبەك, قىرعىز, تاتار, ازەربايجان, تۇرىكمەن, تاجىك ەتنوستارى وكىلدەرىنەن قۇرالعان جاماندىقتى الاستاۋشى انالار بەينەسى دە مەرەكە ءمانى مەن ءسانىن اشا ءتۇستى.
ناۋرىز مەرەكەسىنە ارنالعان وسىناۋ قۋانىشتى ءوڭىر حالقىمەن ءبولىسۋ ءۇشىن وبلىس اكىمى كارىم كوكىرەكباەۆتىڭ ورتاعا شىعىپ, جامبىلدىقتاردى جىل باسى – ۇلىستىڭ ۇلى كۇنىمەن قۇتتىقتاپ, ادامزات بالاسىن ىزگىلىك پەن يگىلىكتەن ۇمىتتەندىرگەن مەرەكەمەن شىن جۇرەكتەن قۇتتىقتاۋى دا بيلىك پەن بۇقارا اراسىنداعى جاراسىمدى بايلانىستى پاش ەتە ءتۇستى.
ناۋرىز مەرەكەسى ەسترادا انشىلەرىنىڭ ۇلكەن كونتسەرتىنە ۇلاستى.
كوسەمالى ساتتىباي ۇلى,
«ەگەمەن قازاقستان».
سۋرەتتى تۇسىرگەن تالعات تانىباەۆ.
قاراعاندى وبلىسى
قالانىڭ باس كوشەسى – بۇقار جىراۋ داڭعىلى تورىندەگى تاۋەلسىزدىك ەسكەرتكىشى الدىنان باستالعان ناۋرىز مەرەكەسىنىڭ ءسان-سالتاناتى ءاپ ساتتە جان-جاققا جاڭعىرىپ سالا بەردى. كوشەلەر بويىندا قاز-قاتار تىزىلگەن 100-گە جۋىق كيىز ءۇي داستارقانىنا ءدام جايىلدى. «شارىقتا كۇن ساۋلەلى ناۋرىزىم!», «ناۋرىزعا شاشۋ», «قىدىر اتانى قارسى الۋ» سياقتى تەاترلاندىرىلعان قويىلىمدار ءوڭىردى مەكەندەۋشى جۇزگە تارتا ۇلت پەن ۇلىستىڭ شىرقالعان ءان-كۇيلەرىمەن جالعاسىپ, جۇرت قۋانىشىن ءوسىردى. قۇشاق ايقاستىرعان, ءتوس تۇيىستىرگەن حالىق ءبىر-ءبىرىن قۇتتىقتاپ, ناۋرىزدىڭ ىرىس اكەلۋىن تىلەستى. جاس اقىندار ايتىسى ءوتىپ, بالعىن دارىندار ونەرى شارىقتادى.
بۇل كۇن, اسىرەسە, قايىرىمدىلىق شارالارعا تولى بولدى. نۇرا اۋدانىنىڭ ورتالىعى مەن ەلدى مەكەندەرىندە سوعىس جانە ەڭبەك ارداگەرلەرىنە, كوپبالالى جانە تۇرمىسى تومەن وتباسىلارعا, جالعىزىلىكتى جاندارعا ىزگىلىك كومەك كورسەتىلدى. كيەۆكا كەنتىنىڭ تۇرعىنى روزا جۇمابەكوۆا ءوز اتىنان اۋداندىق ورتالىق مەشىتكە «نيۆا» اۆتوكولىگىن تارتۋ ەتسە, مەرەكە قۇرمەتىنە جەرلەستەرىن باسقا دا سىي-سياپاتتارمەن قۋانتۋشىلار از بولمادى. بۇقار جىراۋ, جاڭاارقا, اقتوعاي اۋداندارىندا ۇلىستىڭ ۇلى كۇنى جارىق دۇنيە ەسىگىن اشقان نارەستەلەر انالارىنا گۇل شوقتارى ۇسىنىلىپ, تارتۋ-تارالعى جاسالدى.
مەرەكە اياسىندا بارلىق وڭىرلەردە ۇيىمداستىرىلعان قايىرىمدىلىق اكتسيالارى ادامداردىڭ ءبىر-بىرىنە دەگەن تازا پەيىل مەن ىزگىلىككە بەكەمدىگىن ايعاقتادى. جەر-جەردەگى مەرەكەنىڭ كوركىن اقتوعاي اۋدانىنىڭ ايگىلى «توقىراۋىن تولقىندارى» ءانسامبلى ودان سايىن جاراستىرسا, قارقارالىنىڭ اتاقتى «سالتاناتى» دا تىڭداۋشىلاردىڭ قۇلاق قۇرىشىن قاندىردى. نۇرالىقتارعا جەرگىلىكتى تالاپكەرلەر ساحنالاعان «زاعيپ انا» سپەكتاكلى قويىلدى. ناۋرىز دۋمانى وبلىستىڭ بارلىق قالالارى مەن اۋداندارىندا كەشكە دەيىن سەيىلمەدى.
ايقىن نەسىپباي,
«ەگەمەن قازاقستان».
قوستاناي وبلىسى
قوستانايعا ءاز ناۋرىز اقشا قارىمەن كەلدى. جاعالاي تىگىلگەن اق شاڭقان كيىز ۇيلەردەگى ناۋرىز كوجەدەن جينالعان جۇرت ءدام تاتۋدا. حالقىمىزدا داستارقاننان قاسيەتتى نە بار؟! ءدام تاتقان جەردە باتا-تىلەك بىرگە جۇرەدى. جەتى, توعىز ءدامنەن قۇراپ پىسىرگەن ناۋرىز كوجەنى تابيعاتتان قۋات الۋ دەپ بىلگەن جۇرت قىستان امان شىعىپ, كوكتەمگە امان-ەسەن جەتكەنىنە قۋانىپ بىرىمەن-ءبىرى شۇرقىراسىپ كورىسۋدە. قاسىنا كۇن مەن ءتۇننىڭ بەينەسىندەگى كۇنسۇلۋ مەن ايسۇلۋدى ەرتكەن قىدىر اتا باتا بەرىپ, بەرەكە-بىرلىكتى, ادامداردىڭ دوستىعىن تىلەدى.
جەرگىلىكتى ونەر ۇجىمدارى ءان مەن كۇيدەن شاشۋ شاشتى. وبلىس اكىمى نۇرالى سادۋاقاسوۆ قوستانايلىقتار مەن قالا قوناقتارىن ناۋرىز مەرەكەسىمەن قۇتتىقتادى. مۇنان كەيىن «باۋىرساق مەرەكەسى» ناۋرىزدىڭ اجارىن اشا ءتۇستى. ارۋلار ۇسىنعان ىستىق باۋىرساقپەن بىرگە ادامداردىڭ اراسىن ارالاعان ىستىق ىقىلاستاردى ايتسايشى!
اقشا قار جاۋىپ تۇرسا دا ناۋرىز مەرەكەسىندەگى قىزىق تولاستاعان جوق. ورتالىق الاڭدا ءيىسى بۇرقىراپ, بىرنەشە جەردە قازان-قازان پالاۋ ءپىسىپ جاتتى, بورەنەگە ورمەلەۋ, گىر كوتەرۋ, ارقان تارتۋ, بەلتەمىرگە تارتىلۋ سەكىلدى حالىقتىق-ۇلتتىق ويىندار مەن سپورتتىق جارىستار قىزىپ بەردى. ءاز ناۋرىز تابيعاتتىڭ جاڭارۋى, كۇن مەن ءتۇننىڭ تەڭەلۋى, جىلدىڭ باسى عانا ەمەس, ءبىر كەمەنىڭ ۇستىندەگى سەكىلدى ءبىر جەردىڭ سۋىن ءىشىپ, اۋاسىن جۇتىپ, ءبىر وتاننىڭ تىلەگىن تىلەپ وتىرعان بارشا قازاقستاندىقتاردى جۇمعان جۇدىرىقتاي بىرىكتىرەتىن قاسيەتتى كۇن ەكەنىن مەرەكەگە جينالعان جۇرت سەزىنىپ بارا جاتتى.
ءنازيرا جارىمبەتوۆا,
«ەگەمەن قازاقستان».
قىزىلوردا وبلىسى
جەر الەمگە قۇتى مەن بەرەكەسىن, ىرىسى مەن نەسىبەسىن الا كەلەتىن ناۋرىز مەرەكەسىن قىزىلوردا وبلىسى ەرەكشە سيپاتتا قارسى الدى. وسى كۇنى قالالىق اكىمدىكتىڭ ۇيىمداستىرۋىمەن كوپقاباتتى ۇيلەردىڭ الدىندا ۇلتتىق تاعامدار ازىرلەنىپ, تۇرعىندارعا تاراتىلدى. قالا ىرگەسىندە اڭشىلار ءۇيى جاساقتالىپ, قازاقى سالت-ءداستۇردىڭ سان ءتۇرى كورسەتىلدى. ەڭ باستىسى, سىر بويى ۇلىستىڭ ۇلىق مەرەكەسىن ءبىر اي بويىنا اتاپ وتەتىن بولادى.
ناۋرىز مەرەكەسى قارساڭىندا قالاداعى ورتالىق الاڭعا وتىز قازاقى ءۇي تىگىلدى. ءسانى مەن سالتاناتى جاراسقان, داستارقانى ءدام-تاعامعا تولعان ۇيلەردى تۇرعىندار ارالاپ, ءماز-مەيرام بولىستى. ايماق باسشىسى قىرىمبەك كوشەرباەۆ پەن قازاقستاننىڭ ەڭبەك ەرى ابزال ەراليەۆ تە قىزىلوردالىقتاردى مەرەكەلەرىمەن قۇتتىقتاپ, قۋانىشقا ورتاقتاستى.
وسى تۇستا ءبىر ادەمى كورىنىستىڭ كۋاسى بولدىق. ۇيلەردى ارالاپ كەلە جاتقاندا قىرىمبەك ەلەۋ ۇلى مەن ابزال جۇماش ۇلىنان جاس بالالاردىڭ تۇساۋىن كەسۋدى ءوتىندى. قازاقى ءجون-جورالعىنى جاقسى بىلەتىن وبلىس باسشىسى مەن ەڭبەك ەرى نارەستەلەردىڭ تۇساۋىن كەسىپ, اق جول تىلەدى. قازاق تۋمىسىنان ىرىمشىل حالىق قوي. «بالالاردىڭ جولى داڭعىل, بولاشاعى زور بولادى» دەسىپ جاتتى حالىق.
بۇگىندە ناۋرىز مەرەكەسىن تەك قازاق حالقى عانا ەمەس, جەرىمىزدى مەكەندەگەن بارلىق ەتنوستار وكىلدەرى دە ەرەكشە ىلتيپاتپەن قارسى الادى. ورتالىق الاڭدا وزدەرىنىڭ ۇلتتىق كيىمىن كيىپ, كوكتەم مەرەكەسىن تويلاپ جاتقان وزگە جۇرتتىڭ وكىلدەرى وسى ءسوزىمىزدىڭ دالەلى بولسا كەرەك. كۇن مەن ءتۇن تەڭەلىپ, تىرشىلىك جاڭاشا سيپات الاتىن ۇلتتىق مەرەكەنى قىزىلوردالىقتار ءوز دارەجەسىندە اتاپ ءوتتى.
ەرجان بايتىلەس,
«ەگەمەن قازاقستان».
سۋرەتتى تۇسىرگەن قايسار شەرىم.
ماڭعىستاۋ وبلىسى
ناۋرىز مەيرامىن تويلاۋ ماڭعىستاۋ وڭىرىندە امال كۇنىنەن باستاۋ الدى. ۇلىق مەرەكەنى ءاربىر مەكەمە ءوز شاڭىراعى استىندا شادىمان شارالارمەن قارسى الدى. 21 ناۋرىز كۇنى تەڭىز جاعاسىندا ۇيىمداستىرىلعان قالالىق ناۋرىز مەيرامىنا حالىق, اسىرەسە, جاستار كوپ جيىلدى.
تاڭ اتىسىمەن تەڭىز جاعاسىنداعى الاڭدا تىگىلگەن كيىز ۇيلەر ماڭى قاربالاسقا تولدى. قازاندار اسىلىپ, ءۇي يەلەرى قوناق كۇتۋ قامىنا كىرىستى. كۇن كوتەرىلە بەرە, «ءاز ناۋرىز مۇباراك بولسىن!» دەگەن تاقىرىپپەن توي شىمىلدىعى اشىلىپ, ساحنا تورىندە تۇركىتىلدەس حالىقتاردىڭ ناۋرىزدى تويلاۋ داستۇرلەرى تەاترلاندىرىلعان قويىلىم تۇرىندە بەينەلەندى. ال مەرەكەلىك شاراعا كەلگەن قوناقتار ءوزارا گىر تاسىن كوتەرۋ, ارمرەسلينگ, قازاقشا كۇرەس, توعىزقۇمالاق, اسىق اتۋ سىندى سپورت تۇرلەرىنەن سايىستى قىزدىرىپ جاتتى.
ماڭعىستاۋلىقتاردى ۇلىستىڭ ۇلى كۇنى مەيرامىمەن قۇتتىقتاعان ايماق باسشىسى ا.ايدارباەۆ ەلدىڭ دامۋىنا, حالىقتىڭ اماندىعىنا, تىنىشتىعى مەن تاتۋلىق-بىرلىگىنە تىلەكتەستىگىن ءبىلدىرىپ, كەلەشەكتە دە وركەندى دامۋ جولىنان, ءوزارا بىرلىك بيىگىنەن تابىلۋعا شاقىردى.
الاڭدا 15-تەن استام كيىز ءۇي تىگىلىپ, تۇساۋ كەسۋ, كەلىن ءتۇسىرۋ, بەت اشۋ سىندى سالت-داستۇرلەر كورسەتىلدى. ءبىز باس سۇققان «اق جول» دەموكراتيالىق پارتياسى تىككەن كيىز ۇيدە قوناقتار ارۋ اتتى كىشكەنە قىزدىڭ تۇساۋ كەسۋىنە كۋا بولدى. سونداي-اق, توي تويلاۋشى قوناقتارعا ارنالىپ تىگىلگەن شاتىرلاردا كول-كوسىر داستارقاندار جايىلىپ, ناۋرىز كوجە تاراتىلدى.
قالا تۇرعىندارى مەن قوناقتارى ءانشى ا.قوسانوۆانىڭ كونتسەرتىن, ماڭعىستاۋ وبلىستىق مادەنيەت باسقارماسى دايىنداعان كونتسەرتتەر مەن قويىلىمداردى, «جىرداريا» جىرشى-تەرمەشىلەر سايىسىن, «التىباقان» فولكلورلىق ۇجىمىنىڭ ويىن-ساۋىق باعدارلاماسىن تاماشالادى.
ءان اۋەلەپ, كۇي كۇمبىرلەگەن مەرەكە ەرتەسىنە «اقتاۋ» ساۋدا ويىن-ساۋىق كەشەنىندە كەكۋشينكاي كاراتەدەن بالالار مەن جاسوسپىرىمدەر اراسىنداعى ءبىرىنشى الەم چەمپيوناتىمەن جالعاستى.
گۇلايىم شىنتەمىرقىزى,
«ەگەمەن قازاقستان».
وڭتۇستىك قازاقستان وبلىسى
وڭتۇستىكتە كوكتەمنىڭ حابارشىسى بايشەشەكتىڭ قىلتيىپ شىققانى قاشان. اشىق الاڭقايلار ناۋرىزدىڭ ىستىق دەمىمەن كوك كورپەگە وراندى.
وبلىستا ناۋرىز مەرەكەسى توعىز كۇن تويلاناتىنىن ىلگەرىدە ايتقانبىز. ۇلىق مەرەكە كۇنى وبلىس جۇرتشىلىعى “ناۋرىز” الاڭىنا اسىقتى. اقشاڭقان كيىز ۇيلەر, ەت اسىلعان قازان, ساقىرلاپ قايناعان ساماۋرىن, قازاقتىڭ جازيرا دالاسىنداي كەڭ پەيىلى دۋمان كوركىن قىزدىرا تۇسكەن. ءبىر جەردە اسىق وينالىپ جاتسا, كۇرەس كىلەمىندە بۋرا سان بالۋاندار كۇش سىناسۋدا. اۋەلەگەن ءان دە, قان قىزدىراتىن ايتىس تا وسىندا.
جۇرتشىلىقتى وڭتۇستىك قازاقستان وبلىسىنىڭ اكىمى اسقار مىرزاحمەتوۆ قۇتتىقتادى. «ناۋرىز مەرەكەسى تەك عانا تابيعاتتىڭ تۇرلەنەتىنىن ەسكەرتىپ عانا قويماي, سونىمەن بىرگە, ادامزاتتىڭ جان دۇنيەسىن تازارتۋعا شاقىراتىن مەرەكە. نيەتتى, پەيىلدى, كوڭىلدى تازارتۋعا شاقىراتىن مەرەكە. ءاز ناۋرىز ەڭ ءبىرىنشى كەزەكتە ەلدىڭ بىرلىگىن نىعايتۋدى ماقسات تۇتاتىن مەرەكە. وسىنى ەسكەرىپ, ءبىز بىلتىردان بەرى وبلىسىمىزدا ناۋرىز مەرەكەسىن توعىز كۇن تويلاپ, ءار ءبىر كۇنگە اتاۋ بەرىپ, مەيىرىمدىلىكتى, كەشىرىمدىلىكتى, بىرلىك-بەرەكەنى نىعايتۋعا باعىتتالعان ءىس-شارالاردى ۇيىمداستىرىپ كەلەمىز. مەرەكەنى توعىز كۇن تويلاۋعا وزگە وبلىستار دا تۇسىنىستىكپەن قاراپ, باسقا وڭىرلەر ءبىزدىڭ باستامامىزدى قولداپ, قۋاتتاپ وتىر. ۇلىستىڭ ۇلى كۇنى قۇتتى بولسىن! اق مول بولسىن! شاڭىراقتارىڭىز شاتتىققا تولسىن, اعايىن», دەدى اسقار يسابەك ۇلى.
ناۋرىز مەرەكەسى وبلىستىڭ بارلىق اۋدان-قالالارىندا ءوز جاراسىمىمەن ءوتىپ جاتىر. تۇلكىباس اۋدانىندا ەل اعالارى ت.رىسقۇلوۆ اتىنداعى “ارداگەرلەر ساياباعىنا” 30 ەمەن, “جاستار” اللەياسى مەن ورتالىق ساياباققا 30 ەمەننەن كوشەت وتىرعىزىلدى. اۋدان تۋماسى, بەلگىلى مەملەكەت قايراتكەرى سەرگەي تەرەششەنكو جىلداعى ءداستۇر بويىنشا “ناۋرىز” مەرەكەسى قارساڭىندا 1 مىڭ ءتۇپ ەمەن كوشەتىن سىيعا تارتاتىن. بيىل دا سول ءداستۇر ۇزىلگەن جوق.
ناۋرىز قازىعۇرتتان باستالادى دەگەن قاناتتى ءسوز جۇرتشىلىق ۇعىمىنا بەرىك ورنىققان.
قازىعۇرت اۋدانىنىڭ ورتالىعىندا ەتنومادەني بىرلەستىكتەر مازمۇنعا باي كونتسەرتتىك باعدارلامالار ۇسىندى.
ۇلتتىق ويىندار مەرەكەنىڭ شىرايىن كىرگىزدى. ءاز ناۋرىز وڭتۇستىككە وسىنداي بەرەكەسىمەن كىردى.
ورالحان ءداۋىت,
«ەگەمەن قازاقستان».
پاۆلودار وبلىسى
وبلىس ورتالىعىندا كوكتەم جانە مولشىلىق مەرەكەسى – ناۋرىز مەيرامىن تويلاۋ اياسىندا حالىقتىق ويىن-ساۋىق, كونتسەرتتەر, جارمەڭكەلەر, سايىستار, ءتۇرلى سپورتتىق ويىندار ءوتتى. كۇن رايى دا جايدارى. سالقىن ىزعار كەتىپ, ناۋرىز جىلىلىق اكەلگەندەي. ورتالىق الاڭدا ورنەكتەلۋى بىرىنەن-ءبىرى وتكەن 50-گە جۋىق كيىز ءۇي تىگىلدى. اينالا ءان مەن بي, اۋەلەگەن كۇي, ءماز-مەيرام اسىق ويناعان بالا-شاعا, قاۋقىلداسقان اپا-اتالار. التىباقان تەپكەن قىز-جىگىت. نەشە ءتۇرلى ۇلتتىق تاعامدار تولى ساۋدا قاتارلارى ءتىزىلىپتى.
مەرەكە قارساڭىندا قالا, اۋدان, اۋىلداردى تازارتۋ جۇمىستارى ءجۇرگىزىلدى, اعاش كوشەتتەرىن وتىرعىزۋ ايلىعى جاريالاندى. ساياباقتار, گۇلزارلار دا ءبىر تىنىستاپ قالدى. ەكىباستۇزدىقتار ناۋرىز مەيرامىن «قايىرىمدىلىق» ايلىعى دەپ جاريالاپ, ونى 14 ناۋرىزدا باستاپ كەتتى. ال باياناۋىلدا وزەن-كول, بۇلاقتاردى تازارتۋعا اقساقالدار جينالىپ, «بۇلاق كورسەڭ – كوزىن اش» اتتى شاراعا قاتىستى. وبلىس ورتالىعىندا وبلىس اكىمى قانات بوزىمباەۆ قاتىسقان «جاسىل قالا» اتتى باستاما اياسىندا ساياباقتاردا 16 شىرشا, 14 تال-تەرەك وتىرعىزىلدى. ۋسپەن, جەلەزين اۋداندارىنا ناۋرىزبەن قۇتتىقتاپ كورشىلەس ومبى, التاي ولكەسىنەن قوناقتار كەلدى. مەرەكەگە جينالعان جۇرتشىلىق ىستىق باۋىرساقپەن بۋى بۇرقىراعان شاي ءىشىپ, ناۋرىز كوجەدەن اۋىز ءتيدى.
بۇل كۇنى ءدامدى باۋىرساق پىسىرۋشىلەر بايقاۋى دا ۇيىمداستىرىلدى. ودان تۇسكەن قاراجات جەتىم بالالار ۇيىنە بەرىلەدى. ورتالىق الاڭعا جينالعان قالا تۇرعىندارى مەن قوناقتارى قوشقار كوتەرۋ, جىلىك سىندىرۋ جانە باسقا دا ۇلتتىق ويىندارعا قاتىسىپ, قىمبات سىيلىقتار ۇتىپ الدى. ناۋرىز دۋماننىڭ كوڭىلدى شاتتىعىن ءانشى قايرات نۇرتاس جالعاستىردى.
فاريدا بىقاي,
«ەگەمەن قازاقستان».
سولتۇستىك قازاقستان وبلىسى
ءاز ناۋرىز مەرەكەسى قىزىلجار وڭىرىنە دە جىلى شۋاعىن, تابيعات-انانىڭ مەيىرىمىن الا كەلدى. وسىدان بەس مىڭ جىل بۇرىن تويلانا باستاعان ۇلىستىڭ ۇلى كۇنى وبلىستا جاڭاشا سيپات الىپ, ەتنومادەني, سپورتتىق شارالار حالىقتىق مەرەكەگە ۇلاسىپ ءجۇر. بۇل جولى دا ناۋرىز مەيرامىن تويلاۋ «دوستىق» ءۇيىنىڭ الدىنان باستاۋ الدى. ماعجان جۇماباەۆ كوشەسىنىڭ بويىنا اق شاڭقان كيىز ۇيلەر تىگىلىپ, اۋەلەگەن اندەر مەن مىڭ بۇرالعان بيلەر جۇرتشىلىقتىڭ كوڭىل كۇيىن كوتەرە ءتۇستى. ءتۇرلى ەتنوس وكىلدەرى ناۋرىز مەيرامى قوناقتارىنا ۇلتتىق تاعامدارىنان ءدام تاتىرىپ, ادەت-عۇرىپتارىمەن, سالت-داستۇرلەرىمەن تانىستىردى. جەتى دامنەن قۇرالعان ناۋرىز كوجە تەگىن ۇسىنىلدى. قولدانبالى ونەر تۋىندىلارىنا ارنالعان كورمەنى قىزىقتاۋشىلار دا كوپ بولدى.
ۆەدومستۆولار مەن ۇيىمداردىڭ تىككەن كيىز ۇيلەرىنىڭ ىشكى-سىرتقى ءسان-سالتاناتى ەرەكشە تامساندىردى. س.مۇقانوۆ اتىنداعى قازاق سازدى-دراما تەاترىنىڭ ارتىستەرى ۇلىستىڭ ۇلى كۇنىن بەينەلەگەن تەاترلاندىرىلعان كورىنىسىن جۇرتشىلىق زور ىنتامەن تاماشالادى. قىزىر اتانىڭ باتاسى ەرەكشە اسەر ەتتى. «كوكتەم كوركى – ناۋرىز» اتتى حورەوگرافيالىق كومپوزيتسيا دا تاعىلىمدىلىعىمەن ەستە قالدى.
ايماق باسشىسى سامات ەسكەندىروۆ وبلىس تۇرعىندارىن شىعىستىڭ جاڭا جىلىمەن قۇتتىقتاپ, دەنساۋلىق, تابىس تىلەدى. كوپۇلتتى قازاقستان حالقىن بىرىكتىرگىش كۇشىن, ەلدەگى ساياسي تۇراقتىلىقتىڭ كەپىلىنە اينالعانىن اتاپ ءوتتى.
ورتالىق الاڭدا توعىزقۇمالاق, ارقان تارتۋ, جىلىك سىندىرۋ, گىر كوتەرۋ, قول كۇرەسى سەكىلدى ۇلتتىق, سپورتتىق ويىندار باسەكەسى جالعاسسا, قازىلار القاسى كيىز ۇيلەر مەن ۇلتتىق تاعامدار جانە ناۋرىز كوجە بايقاۋىنىڭ قورىتىندىسىن شىعارىپ جاتتى. ءار اتالىم بويىنشا باعالى سىيلىقتار تىگىلدى. پوگودين اتىنداعى ورىس دراما تەاترىندا سۋىرىپسالما اقىنداردىڭ جىر سايىسى تاماشالاندى.
جەكەلەگەن كاسىپكەرلەر مەن مىرزا ازاماتتار جەتىم بالالاردى, تۇرمىسى تومەن وتباسىلار مەن جالعىزىلىكتى قارت ادامداردى قولداۋ قايىرىمدىلىق اكتسياسىن وتكىزىپ, دەمەۋ قولدارىن سوزدى. «نۇر وتان» پارتياسىنىڭ قولداۋىمەن جاسوتاندىقتار حالىقتىق اسار ءداستۇرى نەگىزىندە ءتۇرلى شارالار وتەتىنىن جاريالادى.
ءاز ناۋرىز مەيرامى اۋدانداردا, ەلدى مەكەندەردە دە كەڭىنەن اتاپ ءوتىلدى.
ءومىر ەسقالي,
«ەگەمەن قازاقستان».
شىعىس قازاقستان وبلىسى
بيىل شىعىس قازاقستاندا ءاز ناۋرىز ايرىقشا اتاپ وتىلۋدە. وڭىردە ۇلىق مەيرام ءبىر اپتا بۇرىن باستالىپ كەتتى. جەتى كۇنگە بەلگىلەنگەن ناۋرىز مەرەكەسىنىڭ العاشقى «ءونىس» كۇنىندە ءوڭىر باسشىلارى دۇنيەگە كەلگەن سابيلەردى قۇتتىقتادى. وبلىس ورتالىعىندا بۇل كۇنى 16 بالا دۇنيەگە كەلدى. ولاردىڭ ونى – قىز, التاۋى – ۇل. شەمونايحا اۋدانىنىڭ اكىمى ا.توقتاروۆ دۇنيەگە ءسابي اكەلگەن التى انانى قۇتتىقتادى. بۇل شارا ريددەر قالاسىندا دا كورىنىس تاپتى.
«قامقورلىق» اتالعان ەكىنشى كۇنى ايماق كاسىپورىندارى پاتروناتتىق تاربيەدەگى بالالارعا سىي-سىياپات تاپسىرسا, اۋدان جانە قالا اكىمدەرى ارداگەرلەرگە قۇرمەت كورسەتتى. ماسەلەن, كوكپەكتى اۋدانىنىڭ اكىمى س.ءدۇسىپوۆ سول كۇنى 90 جاسقا تولعان سوعىس ارداگەرى مولداقۇسمان قوجاەۆتىڭ ۇيىنە بارىپ, قاريانى ۇلىستىڭ ۇلى كۇنىمەن قۇتتىقتادى. وسكەمەندەگى №35 ورتا مەكتەپتە «قۇت-بەرەكە باستاۋى» اتتى مەرەكەلىك كونتسەرت ءوتتى.
«تازالىق» كۇنى وبلىس اۋماعى بويىنشا تازالىق جۇمىستارى جۇرگىزىلدى. زىريان قالاسى مەن گلۋبوكوە كەنتىندە جاستار ورتالىعىنىڭ باستاماسىمەن «ماڭايدى قاردان تازارتامىز» اتتى فلەش-موب اكتسياسى ۇيىمداستىرىلدى. وسكەمەندە تىل ەڭبەككەرلەرى, سوعىس ارداگەرلەرى مەن قاريالاردىڭ اۋلالارىن تازارتۋعا كومەك كورسەتىلدى.
تارباعاتاي اۋدانىنىڭ قۇيعان اۋىلىندا كيىز ۇيلەر تىگىلىپ, جەرگىلىكتى جۇرت ۇلىستىڭ ۇلى كۇنىن مەرەكەلەدى. ءۇرجار اۋدانىنىڭ قوڭىرشاۋلى اۋىلدىق وكرۋگىندە وتكەن «پاي-پاي, قازاقتىڭ كەلىندەرى-اي!» اتتى كەلىندەر سايىسىنا 20-عا جۋىق اۋىلدىڭ كەلىندەرى قاتىستى.
ال «ىنتىماق» كۇنى ءتۇرلى ەتنوستار وكىلدەرىن ءبىر ماقسات, ءبىر مۇددەگە جۇمىلدىرعان بىرلىگى بەكەم ەل ەكەنىمىزدى كورسەتتى. بۇل كۇنى التىباقاندار قۇرىلىپ, كوپشىلىكتى دوستىق انىمەن تەربەتتى. مەملەكەتتىك ءتىلدى ۇيرەنۋشىلەر اراسىندا قازاقتىڭ ۇلتتىق داستۇرلەرىنىڭ بايقاۋى دا ۇيىمداستىرىلدى. «ىرىس» كۇنى مادەني-سپورتتىق شارالارمەن جالعاستى. بالالار شىعارماشىلىعى ۇيىندە «ناۋرىز حانشايىمى» بايقاۋى ءوتىپ, قالا جاسوسپىرىمدەرى ەركىن كۇرەستەن كۇش سىناستى.
«شاتتىق» – ءتۇرلى مادەني شارالارعا تولى شات-شادىمان كۇن بولدى. ەرتىس جاعالاۋىنداعى امفيتەاتردا وبلىس ورتالىعىنىڭ تۇرعىندارى مەن مەيماندارىنا ارنالعان قازاقستان مەن شەتەل ەستراداسى وكىلدەرىنىڭ قاتىسۋىمەن ۇلكەن كونتسەرت ءوتتى. ۇلىستىڭ ۇلى كۇنى وسكەمەننىڭ ورتالىق الاڭىندا اۋىل شارۋاشىلىعى ونىمدەرىنىڭ جارمەڭكەسىمەن جانە مازمۇندى مەرەكەلىك كونتسەرتپەن جالعاسىن تاپتى.
دۋمان اناش,
«ەگەمەن قازاقستان».