Alstom زاۋىتىنان ەل ۇكىمەتىنىڭ قولداۋىمەن ەكسپورتقا 40-شى جۇك لوكوموتيۆى جونەلتىلدى. 2021 جىلعى قازاندا قازاقستان رەسپۋبليكاسىنىڭ ساۋدا جانە ينتەگراتسيا ءمينيسترى باقىت سۇلتانوۆ پەن Alstom كومپانياسىنىڭ افريكا, تاياۋ شىعىس جانە ورتالىق ازيا ايماعى بويىنشا پرەزيدەنتى ەندريۋ دەلەونە ءوزارا تۇسىنىستىك جانە ىنتىماقتاستىق تۋرالى مەموراندۋمعا قول قويدى.
2014 جىلى Alstom نۇر-سۇلتان قالاسىندا شىعارىلاتىن 40 Prima T8 AZ8A اۋىر سالماقتى لوكوموتيۆتەرىن قوسا العاندا, 288 ملن ەۋرو سوماسىنا 50 ەلەكتروۆوز جەتكىزۋگە كەلىسىمشارتقا قول قويدى. Prima T8 لوكوموتيۆى – ايماقتىق تەمىر جول قاتىناسىن دامىتۋعا ىقپال ەتەتىن الەمدەگى ەڭ قۋاتتى ەلەكتروۆوزداردىڭ ءبىرى. ەلەكتروۆوزداردان باسقا, ازەربايجانعا رەلستەر دە جەتكىزىلەدى.
قازاقستان – ەۋروپانى, تاياۋ شىعىستى, ازيا مەن رەسەيدى جاڭا جىبەك جولى ارقىلى بايلانىستىراتىن ماڭىزدى كولىك تورابى. ۇزىندىعى شامامەن 21 مىڭ شاقىرىم بولاتىن قازاقستاننىڭ تەمىر جول جەلىسى الەمدەگى كولەمى بويىنشا ءۇشىنشى جەلى جانە تەحنيكالىق قىزمەت كورسەتۋ جۇمىستارى ءۇشىن ماڭىزدى نارىق بولىپ سانالادى. سونىمەن قاتار قازاقستاننىڭ ازەربايجانمەن ءوزارا ساۋداسى 2021 جىلى 332,2 ملن دوللاردى قۇرادى, بۇل 2020 جىلمەن سالىستىرعاندا 3 ەسە جوعارى. جالپى, قازاقستاننان ازەربايجانعا ەكسپورتى 2021 جىلى 3,4 ەسە ءوسىپ, 287,9 ملن دوللاردى قۇرادى. 2021 جىلى قازاقستانعا ازەربايجاننان يمپورت 77,3%-عا ءوسىپ, 44,4 ملن دوللاردى قۇرادى.
وڭدەلگەن تاۋارلار ەكسپورتىن بەلسەندى ىلگەرىلەتۋ ءۇشىن ساۋدا جانە ينتەگراتسيا مينيسترلىگى قازاقستاندىق وندىرۋشىلەرگە ەكسپورتتىق اكسەلەراتسيا باعدارلاماسى, Alibaba پلاتفورماسىنا شىعارۋ, ساۋدا-ەكونوميكالىق ميسسيالار ارقىلى جان-جاقتى قولداۋ كورسەتەدى, سونداي-اق تولىق كونسۋلتاتسيالىق-ساراپتامالىق قولداۋ كورسەتەدى. 2022 جىلى ەكسپورتتىق اكسەلەراتسيا باعدارلاماسى اياسىندا قازاقستاندىق وندىرۋشىلەر مەن قىزمەت كورسەتۋشىلەردىڭ ازەربايجان نارىعىنا شىعۋى جوسپارلانعان. اتالعان قۇرال قوسىمشا ەكسپورت كولەمىن ارتتىرۋعا, سونداي-اق جاڭا قازاقستاندىق تاۋارلاردى ازەربايجانعا شىعارۋعا مۇمكىندىك بەرەدى.
ايتا كەتەلىك, «ەكسپورتتىق اكسەلەراتسيا» باعدارلاماسى مەملەكەت باسشىسىنىڭ تاپسىرماسى بويىنشا 2020 جىلى ىسكە قوسىلدى جانە ەكسپورتتىق الەۋەتى جوعارى تاۋارلار مەن قىزمەتتەردى جىلدام ىلگەرىلەتۋگە باعىتتالعان. 2021 جىلدىڭ قورىتىندىسى بويىنشا «ەكسپورتتىق اكسەلەراتسيا» باعدارلاماسى اياسىندا سىرتقى نارىققا 130 جاڭا ويىنشى شىعارىلدى.