دەنساۋلىقتىڭ قادىرىن كوبىنە بويدى دەرت دەندەپ, جان القىمعا كەلىپ تىرەلگەندە عانا وتە كەش ءتۇسىنىپ جاتاتىنىمىز وكىنىشتى-اق. تاياۋدا قوستانايداعى كوپسالالى ونكولوگيالىق اۋرۋحانانىڭ ماماندارى كوپشىلىكپەن ونلاين بايلانىسقا شىعىپ, وڭىردەگى ىسىك اۋرۋلارىنىڭ تارالۋ دەڭگەيى جونىندە باياندادى. سونداي-اق كەيبىر تۇرعىنداردىڭ ساۋالىنا جاۋاپ بەرىپ, قايتكەندە قاتەرلى اۋرۋدىڭ الدىن الۋعا بولاتىنىن ءتۇسىندىردى.
بۇگىندە وبلىستا قاۋىپتى ىسىك دەرتىنە شالدىققان 13 مىڭ ادام تىركەۋدە تۇر. دارىگەرلەر 2021 جىلى 2 300 ادامنان وبىر بەلگىلەرى انىقتالعانىن, ونىڭ 105-ءى عانا ەرتە كەزەڭدەگى ىسىككە جاتاتىنىن تىلگە تيەك ەتە كەلىپ, وبلىس تۇرعىندارىنىڭ باسىم كوپشىلىگى ءالى دە بولسا ءوز دەنساۋلىعىنا ءجۇردىم-باردىم قارايتىنىن ايتتى.
ەمدەۋ مەكەمەسىنىڭ باس دارىگەرىنىڭ مىندەتىن اتقارۋشى ماكسيم بوبوشكونىڭ سوزىنە قاراعاندا, بىلتىر وڭىردە 738 ادام قاتەرلى ىسىكتەن كوز جۇمعان. جابىسقان جەرىن جالماپ بىتكەنشە جەمىرە بەرەتىن جانالعىش دەرتتەن كوز جۇمعانداردىڭ ىشىندە ءبىرىنشى ورىندا وكپە ىسىگىنە شالدىققاندار, ودان كەيىن ىشەك جولدارىنىڭ ىسىگىمەن, ال ءۇشىنشى ورىندا اسقازان ىسىگىمەن اۋىرعاندار تۇر.
– دەگەنمەن دەرتتىڭ ەڭ كوپ تارالعان ءتۇرى تۋرالى ايتاتىن بولساق, ەڭ ءبىرىنشى ورىندا ءسۇت بەزى ىسىگى تۇر. 2021 جىلى 300 ادامنان ءسۇت بەزىنىڭ ىسىگى انىقتالدى. سونداي-اق ءبىر جىلدىڭ ىشىندە 260 ادامنىڭ ىشەك جولدارىنىڭ ىسىگىنە, 215 ادامنىڭ وكپە ىسىگىنە شالدىققانى بەلگىلى بولىپ وتىر. بۇل كورسەتكىش ءبىر وبلىس ءۇشىن وتە اۋىر ەكەنىن جاسىرۋعا بولمايدى, – دەدى ماكسيم بوبوشكو.
باس دارىگەردىڭ ۇيىمداستىرۋ جانە ادىستەمە جۇمىستارى جونىندەگى ورىنباسارى ايگۇل سۇلتانوۆانىڭ ايتۋىنشا, قاتەرلى ىسىكتىڭ كەيبىر تۇرلەرىن ەرتە كەزەڭدە سكرينينگتىڭ كومەگىمەن انىقتاۋعا بولادى. باستىسى, كەشىكپەي ەمدەۋ شارالارىنان ءوتىپ, دەر كەزىندە دەرتتىڭ بەتىن قايتارۋعا امال قىلۋ كەرەك.
– 30-70 جاس ارالىعىنداعى ايەلدەر جاتىر موينى وبىرىنا ءتورت جىل سايىن سكرينينگتەن ءوتۋى كەرەك. مىسالى, بىلتىر سكرينينگتىڭ كومەگىمەن 90 ايەلدەن جاتىر موينى وبىرى انىقتالدى. سونىڭ ىشىندە 21 ايەلدىڭ ىسىگى ەرتە كەزەڭدە ەكەنى انىقتالدى. مۇنى سالىستىرمالى تۇردە العاندا, جاقسى كورسەتكىش دەپ ايتۋعا بولادى. سونىمەن قاتار 50 جاستان 70 جاسقا دەيىنگى ەرلەر مەن ايەلدەر ەكى جىل سايىن كولورەكتالدى قاتەرلى ىسىك سكرينينگىنەن ءوتۋى ءتيىس. سكرينينگ كابينەتتەرى ناۋقاسقا جەدەل-تەستتىڭ قورىتىندىسىن شىعارىپ بەرەدى. ەگەر سكرينينگ وڭ ناتيجە كورسەتسە, تالداۋ قوسىمشا زەرتتەۋگە جىبەرىلەدى. اۋرۋ راستالماعان جاعدايدا, اراعا ەكى جىل سالىپ, تاعى ءبىر سكرينينگ جاساتۋ كەرەك, – دەدى ا.سۇلتانوۆا.
ءسۇت بەزىنىڭ ىسىگى بار-جوعىن انىقتاۋ ءۇشىن ايەل ادامدار اراعا ەكى جىل سالىپ تەكسەرىلىپ تۇرۋى كەرەك ەكەن. مىسالى, بىلتىر مامموگرافيانىڭ كومەگىمەن 70 ايەلدەن قاتەرلى ىسىك انىقتالىپتى. ونكولوگيالىق ەمحانانىڭ مەڭگەرۋشىسى كسەنيا ديساەنكونىڭ ايتۋىنشا, قاتەرلى ىسىك بەلگىلەرى بايقالعان ادامدار دارىگەردىڭ جولداماسى بويىنشا تەگىن كومپيۋتەرلىك توموگرافيا مەن مرت-دان وتەدى. كەزدەسۋ سوڭىندا دارىگەرلەر قاتەرلى ىسىكتىڭ پايدا بولۋ سەبەپتەرى جونىندە ءسوز قوزعاپ, قالاداعى كۇندەلىكتى كۇيبەڭ تۇرمىسقا الدانا بەرمەي, ءبىر اۋىق تازا اۋاعا شىعىپ, تابيعات اياسىندا سەرۋەندەۋدىڭ ماڭىزدى ەكەنىن, اسىرەسە ارنەنى ويلاي بەرىپ, جۇيكەگە جۇك ءتۇسىرىپ الماۋ كەرەكتىگىن ەسكەرتتى.
قوستاناي وبلىسى