وتكەن جىلى وبلىستىق جانە اۋداندىق ماڭىزى بار اۆتوجولداردىڭ 4 مىڭ شاقىرىمى قۇرىلىس, رەكونسترۋكتسيالاۋ جانە جوندەۋ جۇمىستارىمەن قامتىلدى. جالپى قۇنى 300,2 ملرد تەڭگە بولاتىن 349 جوبا جۇزەگە اسىرىلدى.
وسىناۋ اۋقىمدى جۇمىس اياسىندا 8 مىڭعا جۋىق جۇمىس ورنى اشىلدى, ونىڭ ىشىندە 1 مىڭى – تۇراقتى, 7 مىڭى – ۋاقىتشا. رەسپۋبليكا بويىنشا 2,6 مىڭ شاقىرىم اۆتوجول پايدالانۋعا بەرىلدى. اتاپ ايتقاندا, جەرگىلىكتى جولداردىڭ 19 شاقىرىمى سالىندى, 152 شاقىرىمى قايتا جاڭارتىلدى, 220 شاقىرىمى كۇردەلى جوندەۋدەن ءوتتى, 2,2 مىڭ شاقىرىم جولعا ورتاشا جوندەۋ جۇرگىزىلدى.
اۋدان ورتالىقتارىن وبلىستارمەن بايلانىستىراتىن جولدار دا جوندەلۋدە. ىسكە اسىرىلعان ءىرى جوبالاردىڭ قاتارىندا شىعىس قازاقستان وبلىسى كۇرشىم اۋدانىنداعى بۇقتىرما سۋ قويماسى ارقىلى وتەتىن كوپىر وتكەلىنىڭ قۇرىلىسىن, اقتاۋ قالاسىنىڭ كۋرورتتىق ايماعىندا جولدار سالۋ جانە رەكونسترۋكتسيالاۋ, اتىراۋ وبلىسىنداعى «يندەر-ميالى», اقتوبە وبلىسىنداعى «اقتوبە قالاسىنىڭ وڭتۇستىك اينالما جولى», الماتى وبلىسىنداعى «الماتى-لەپسى» جوبالارىن ايتۋعا بولادى. سونداي-اق رەسپۋبليكالىق ماڭىزى بار قالالاردا كوشەلەر دامىتىلىپ جاتىر.
جىل قورىتىندىسىندا جەرگىلىكتى جولداردىڭ ءنورماتيۆتى جاعدايداعى ۇلەسى 80%-عا جەتكىزىلدى. بىلتىر بۇل كورسەتكىش 75% ەدى.
وبلىستىق جانە اۋداندىق اۆتوجولدار جەرگىلىكتى اتقارۋشى ورگاندارعا قاراستى ەكەنىن ايتا كەتۋ كەرەك. يندۋستريا جانە ينفراقۇرىلىمدىق دامۋ مينيسترلىگى ءوز كەزەگىندە جىل سايىن جەرگىلىكتى جولدار جەلىسىن دامىتۋعا ماقساتتى ترانسفەرتتەردى پاريتەتتىك نەگىزدە بولۋدە. ياعني 50 پايىزى رەسپۋبليكالىق بيۋدجەتتەن, قالعانىن جەرگىلىكتى اتقارۋشى ورگاندار جەرگىلىكتى بيۋدجەتتەن بولەدى.
جالپى ەلىمىز بويىنشا جەرگىلىكتى جولداردىڭ ۇزىندىعى 71 مىڭ شاقىرىمنان اسادى. «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسىنا سايكەس 2020-2025 جىلدارى وبلىستىق جانە اۋداندىق ماڭىزى بار 27 مىڭ شاقىرىم جولدى قۇرىلىس جۇمىستارىمەن قامتۋ كوزدەلىپ وتىر.