جەمقورلىققا قارسى كۇرەس تولاسسىز جۇرگىزىلەدى

«قارۋلى كۇشتەردىڭ جوعارعى باس قولباسشىسى سىبايلاس جەم­قورلىققا قارسى ىمىراسىز كۇرەس جاريالاعانى بارشاڭىزعا ءمالىم. سىبايلاس جەمقورلىققا قارسى ءىس-قيمىلدىڭ 2022-2026 جىلدارعا ارنالعان مەملەكەتتىك تۇجىرىمداماسىن ىسكە اسىرۋ بارىسىندا ءبىزدىڭ كوميسسياعا ماڭىزدى مىندەتتەر جۇكتەلدى. بۇ­گىن بيىلعى ءبىرىنشى وتىرىس­تى وتكى­زىپ وتىرمىز. اسكەردەگى سىباي­لاس جەمقورلىققا قارسى ءىس-قي­مىل شارالارىن بيۋروكراتيانى جويۋعا, ايقىندىق پەن اشىقتىقتى ارتتىرۋعا باعىتتايمىز», دەپ اتاپ ءوتتى سىبايلاس جەمقورلىققا قارسى كوميسسيانىڭ توراعاسى, قورعانىس ءمينيسترىنىڭ ورىنباسارى گەنەرال-لەيتەنانت سۇلتان قامالەتدينوۆ.

اسكەري ۇجىمداردا سى­باي­لاس جەمقورلىقپەن قۇقىق بۇزۋ­شى­لىقتىڭ الدىن الۋ, ونى جاساۋعا ىقپال ەتكەن سەبەپتەردى, سونداي-اق احۋالدى انىقتاۋ مەن جويۋ قور­عانىس ۆەدومستۆوسى قىزمەتىنىڭ با­سىم باعىتى بولىپ قالا بەرمەك.

جاڭا قارجى جىلىنىڭ اشى­لۋى الدىندا وتكىزىلگەن كوميس­سيانىڭ 2022 جىلعى ءبىرىنشى وتىرىسىندا مەملەكەتتىك ساتىپ الۋ راسىمدەرىن وتكىزۋدە قابىلداناتىن شارالارعا, سونداي-اق تىركەۋ جانە شاقىرۋ ناۋقاندارى بارىسىندا سىبايلاس جەمقورلىقتىڭ الدىن الۋ شارالارىنا ەرەكشە نازار اۋدارىلدى. قىزمەتتىڭ وسى باعىتتارىندا تۋىنداۋى مۇمكىن جەمقورلىقتىڭ تاۋەكەلدەرىن قاراۋ قاجەت. وتىرىس بارىسىندا قورعانىس مينيسترلىگىنىڭ كوميس­سياسى قارۋلى كۇشتەردەگى سىباي­لاس جەمقورلىققا قارسى ءىس-قي­مىل جونىندەگى 2021 جىلعى قىز­مەتتىڭ قورىتىندىسىن شى­عاردى. سىبايلاس جەمقورلىق قىلمىستارىنىڭ سانى 2020 جىلمەن سالىستىرعاندا ءبىر جارىم ەسەگە تومەندەگەنى اتاپ ءوتىلدى.

ۆەدومستۆونىڭ سىبايلاس جەم­قورلىققا قارسى كوميسسياسى ون وتىرىس وتكىزىپ, 176 ۇسى­نىم ازىرلەدى. سىبايلاس جەم­قور­لىققا قارسى ءىس-قيمىل جونىن­دەگى گارنيزون كوميسسيالارى وزەك­تى ماسەلەلەردى تالقىلاۋ جونىن­دە 180-نەن استام ءىس-شارا, قۇقىق قورعاۋ جانە ارنايى ور­گاندار قىزمەتكەرلەرىنىڭ قاتىسۋى­مەن 300-دەن استام كەڭەس ۇيىم­داستىردى. سىبايلاس جەمقورلىق كو­رىنىستەرىنىڭ الدىن الۋدىڭ زاماناۋي تاسىلدەرىنىڭ ءبىرى تسيفرلاندىرۋ بولىپ تابىلاتىنى اتاپ ءوتىلدى. ول ازاماتتار ءۇشىن قىزمەتتەردىڭ قولجەتىمدىلىگىن عانا ەمەس, ءبىرىنشى كەزەكتە راسىمدەردىڭ اشىق ءوتۋىن قامتاماسىز ەتەدى. مەملەكەت باسشىسى تسيفرلاندىرۋ جونىندەگى جۇمىستا باسىمدىقتار ناقتى بەلگىلەنۋگە ءتيىس دەپ اتادى.

وسى باعىتتاعى جۇمىس شەڭ­بەر­ىندە جەرگىلىكتى اسكەري باسقارۋ ورگاندارى مەن اسكەري پوليتسيا بولىمشەلەرىندە «قارۋلى كۇشتەر – ادالدىق الاڭى» جوبالىق كەڭ­سە­لەرىنىڭ جۇمىسى جانداندىرىلدى. باسقا مەملەكەتتىك ورگانداردىڭ اقپاراتتىق جۇيەلەرىنىڭ ينتەگراتسيالاۋىمەن «تسيفرلىق جەرگىلىكتى اسكەري باسقارۋ ورگانى» پيلوتتىق جوباسى ازىرلەندى. اسكەري پوليتسيا «اسكەري سەنىم» ءموبيلدى قوسىمشاسىن ىسكە قوستى. وندا 3 000-نان استام ادام تىركەلىپ, الەۋمەتتىك, قارجىلىق جانە قۇقىقتىق سيپاتتاعى ماسەلەلەر تۋرالى 134 حابارلاما قابىل- داندى.

وتىرىستا قورعانىس ۆەدوم­ستۆوسىنىڭ لاۋازىمدى تۇلعالارى بايانداما جاسادى. اتاپ ايتقاندا, ۇيىمداستىرۋ-جۇمىلدىرۋ جۇ­مىستارى دەپارتامەنتىنىڭ باس­تىعى پولكوۆنيك ساكەن ءجۇسى­پوۆ جاساعان بايانداماسىندا مەم­لەكەتتىك قىزمەتتەر كورسەتۋ ءتارتىبى تۋرالى حالىقپەن ءتۇسىن­دىرۋ جۇمىسى, ازاماتتاردى مەر­زىمدى اسكەري قىزمەتكە جانە اسكەري جيىندارعا شاقىرۋ, سون­داي-اق جەكە قۇراممەن جەكە-تاربيە جۇمىسى جەرگىلىكتى اسكەري باسقارۋ ورگاندارىنداعى سىبايلاس جەمقورلىققا قارسى ءىس-قيمىل قىزمەتىنىڭ باستى باعىتتارى بولىپ تابىلاتىنىن اتاپ ءوتتى.

پرەزيدەنتتىڭ تاپسىرما­لارىن ىسكە اسىرۋ اياسىندا گەنەرال-لەيتەنانت سۇلتان قامالەت­دينوۆ بىرقاتار مىندەتتى بەلگىلەدى. «قورعانىس مينيستر­لىگىنىڭ, باس شتابتىڭ جانە قا­رۋ­لى كۇشتەردىڭ بارلىق قۇرى­لىم­دىق بولىمشەسىنىڭ باسشىلارى, اسكەر تۇرلەرىنىڭ باس قولباس­شىلارى, تەكتەردىڭ, وڭىرلىك قولباسشىلىقتار اسكەرلەرى­نىڭ قولباسشىلارى سىبايلاس جەم­قورلىققا قارسى ءىس-قيمىلدى ءوزىنىڭ قىزمەتتىك جۇمىسى­نىڭ باستى باعىتى دەپ ەسەپ­تەۋگە ءتيىس. ولار ءاربىر باعىنىستى اسكە­ري قىزمەتشىگە سىبايلاس جەمقور­لىققا قارسى كۇرەستەگى ارەكەت­سىزدىگى ءۇشىن جەكە جاۋاپكەرشىلىك جۇك­تەلەتىنىن جەتكىزۋگە مىندەتتى», دەدى كوميسسيا توراعاسى.

مەملەكەتتىك ساتىپ الۋدى ۇيىم­داستىرۋ كەزىندە بيۋروكرا­تيالىق پروتسەستى جويۋ, ولاردىڭ ايقىندىعى مەن اشىقتىعىن كەڭەيتۋ ماڭىزدى باعىت بولىپ بەلگىلەندى. اسكەري قىزمەتشىلەردى تاعايىنداۋ كەزىندە ولاردىڭ مورالدىق قاسيەتتەرىن, پولي­گرافولوگيالىق زەرتتەۋ ناتي­جەلەرىن, سونداي-اق ولاردىڭ سىبايلاس جەمقورلىققا قارسى شارالار قابىلداۋعا قاتىناسىن ەسكەرۋ تۋرالى نۇسقاۋلار بەرىلدى. كومانديرلەرگە (باستىقتارعا) سىيلىقتار بەرۋدىڭ, سونداي-اق رۇقساتسىز قاراجات جيناۋدىڭ جولىن كەسۋ جۇكتەلدى. تاماق­تان­دىرۋدى ۇيىمداستىرۋ سالاسىندا ساربازدار انالارىنىڭ كوميتەتىن, اسكەري قىزمەتشىلەردىڭ وتباسى مۇشەلەرىمەن جۇمىس جونىندەگى قىزمەتتەردى تارتا وتىرىپ, قو­عام­دىق باقىلاۋ شارالارىن قابىل­داۋ قاجەت. قۇرىلىمدىق بولىم­شەلەردىڭ باسشىلارىنا, اسكەر­لەردىڭ باس قولباسشىلارىنا جانە قولباسشىلارىنا سەنىپ تاپسى­رىلعان جانە باعىنىستى بولىم­شەلەردەگى سىبايلاس جەمقورلىق تاۋەكەلدەرىن ۇدايى انىقتاۋ جانە تالداۋ, سىبايلاس جەمقورلىققا قارسى كوميسسياعا ولاردى جويۋ جونىندە ۇسىنىستار ەنگىزۋ تاپسىرىلدى.