قر پرەمەر-ءمينيسترى ءاليحان سمايىلوۆ «شەۆرون» (Chevron) كومپانياسىنىڭ ءوندىرۋ ماسەلەلەرى جونىندەگى ۆيتسە-پرەزيدەنتى دجەيمس دجونسونمەن كەلىسسوز جۇرگىزدى, دەپ حابارلايدى Egemen.kz.
كەزدەسۋدە «تەڭىزشەۆرويل» (تشو) بولاشاقتا كەڭەيتۋ جوباسىن جانە ساعالىق قىسىمدى باسقارۋ جوباسىن ىسكە اسىرۋ, قاراشىعاناق جوباسىن كەڭەيتۋ جانە كاسپي قۇبىر كونسورتسيۋمىنىڭ قۋاتىن ارتتىرۋ پەرسپەكتيۆاسى تالقىلاندى.
«بارلىق ىسكە اسىرىلىپ جاتقان جوبالاردى ۋاقىتىلى ىسكە قوسۋدى قامتاماسىز ەتۋ قاجەت. جۇمىسكەرلەردى جوسپارلى تۇردە بوساتۋعا جانە جۇمىسپەن قامتۋعا ساپالى مونيتورينگ جۇرگىزۋدىڭ ماڭىزى زور», دەدى ءا. سمايىلوۆ.
پرەمەر-مينيستر قر ۇكىمەتى تەڭىز كەن ورنىن دامىتۋعا ەرەكشە نازار اۋداراتىنىن جانە «شەۆرون» كومپانياسىمەن ۇزاق مەرزىمدى ىنتىماقتاستىقتى ءارى قاراي دامىتۋعا نيەتتى ەكەنىن اتاپ ءوتتى. د. دجونسون قر ۇكىمەتىنە قولايلى ينۆەستيتسيالىق احۋالدى جانە مۇناي-گاز سالاسىنداعى جوبالاردى ىسكە اسىرۋ كەزىندە تۋىندايتىن ماسەلەلەردى شەشۋدى قامتاماسىز ەتكەنى ءۇشىن العىس ايتتى.
«شەۆرون» – قازاقستانداعى تەڭىز (50%), قاراشىعاناق (18%) جانە كاسپي قۇبىر كونسورتسيۋمى (15%) ءۇش ءىرى جوبادا اكتيۆتەرى بار ءىرى شەتەلدىك ينۆەستور. 2021 جىلى تشو-دا شيكى مۇناي ءوندىرۋ كولەمى 26,55 ملن توننانى قۇرادى. بيىل 28,73 ملن توننا كولەمىندە مۇناي ءوندىرۋ جوسپارلانۋدا. 2023 جىلدىڭ سوڭىندا بولاشاقتا كەڭەيتۋ جوباسىن اياقتاۋ كەن ءوندىرۋ كولەمىن جىلىنا 12 ملن تونناعا ۇلعايتۋعا مۇمكىندىك بەرەدى.
تشو شيكىزاتىمەن اتىراۋ وبلىسىندا پوليپروپيلەن (قۋاتى – جىلىنا 500 مىڭ توننا) جانە پوليەتيلەن (قۋاتى – جىلىنا 1,25 ملن توننا) ءوندىرىسى بويىنشا ەكى ءىرى گاز-حيميا جوباسىن قامتاماسىز ەتۋ ماسەلەسى پىسىقتالۋدا. 2021 جىلى قازان ايىندا قر ەنەرگەتيكا مينيسترلىگى مەن «شەۆرون» كومپانياسى اراسىندا قازاقستاندا كولەمى $248,5 ملن قۇرايتىن تىكەلەي ينۆەستيتسيالار قورىن قۇرۋ بويىنشا ءوزارا تۇسىنىستىك تۋرالى مەموراندۋمعا قول قويىلدى.
قور كاپيتالداندىرۋىن «شەۆرون»-عا قر-دا تۇسكەن پايدانىڭ ءبىر بولىگى قۇرايدى. قور قاراجاتى قازاقستاننىڭ مۇناي-گاز سالاسىندا, قورشاعان ورتانى قورعاۋدا, سونداي-اق اقپاراتتىق جانە تسيفرلىق تەحنولوگيالار سالاسىندا تاۋارلار ءوندىرۋ, جۇمىستاردى ورىنداۋ جانە قىزمەتتەر كورسەتۋ كوممەرتسيالىق كاسىپورىندارىنا ينۆەستيتسيالاۋ ارقىلى ەكونوميكانى جانە جەرگىلىكتى قامتۋدى دامىتۋعا باعىتتالاتىن بولادى.