ۇلت ۇستازى احمەت بايتۇرسىن ۇلى تۋىپ-وسكەن قارا شاڭىراق قازىرگى قوستاناي وبلىسىنا قاراستى جانگەلدين اۋدانىنداعى اقكول مەن احمەت بايتۇرسىنوۆ اۋىلدارىنىڭ اراسىنداعى جولدىڭ بويىندا, ۇلىتاۋدان باستاۋ الاتىن ۇلى جىلانشىق وزەنىنىڭ اقكولگە قۇيار ساعاسىندا – سارتۇبەك دەگەن ەلسىز مەكەندە تۇر. ۇلت ۇستازىنىڭ كىندىك قانى تامعان سارتۇبەك – احاڭنىڭ اتاسى شوشاقتىڭ, كەيىن شوشاق بالالارى ماشەن قاجى مەن بايتۇرسىننىڭ قىستاۋى بولعان قۇتتى جەر.
وتكەن عاسىردىڭ توقسانىنشى جىلدارى كەزىندە ۇلت ۇستازىنىڭ كوزىن كورگەن, سول ءۇشىن جازىقسىز قۋدالانعان كىسىلەردىڭ اڭگىمەسىن تىڭداعان كونەكوز قاريالاردىڭ ايتۋىمەن احاڭنىڭ تۋعان ءۇيىنىڭ ورنى انىقتالىپ, ىرگەتاسى قالپىنا كەلتىرىلگەن.
جەرگىلىكتى تۇرعىنداردىڭ سوزىنشە, سارتۇبەكتە 1960 جىلدارعا دەيىن سيىر فەرماسى بولعان. فەرما قوراسىنىڭ, بازداردىڭ ورنى ءالى كۇنگە دەيىن بار. توقسانىنشى جىلدارى احاڭ اقتالىپ, العاش ەكسپەديتسيا كەلە باستاعاندا سول كەزدە اۋىل باسقارعان راقىمجان ەسىمدى اقساقال بايتۇرسىن ءۇيىنىڭ ورنىنا ەكى قاتار سامان كىرپىش قالاتقان. 2007 جىلى سول ماڭايداعى ەكى اۋىلدىڭ تۇرعىندارى بىرىگىپ, ەكى قاتار ساماننىڭ ۇستىنە قازىرگى ءۇيدى كوتەرەدى. سوندىقتان بۇل – سول جەردەگى حالىقتىڭ اسارلاپ ءجۇرىپ قولدان كىرپىش قۇيىپ, سول كەزدەگى بار مۇمكىندىكتى پايدالانىپ جوقتان بار جاساپ تۇرعىزعان ءۇي. ءاۋ باستا سىرتقى قورشاۋى دا بولماپتى, كەيىنىرەك ارقالىق قالاسىندا تۇراتىن ابىل ەردەنوۆ دەگەن ازامات كەلىپ, قورشاپ كەتەدى.
كەيىن ەل ىشىندە «احاڭنىڭ ءۇيى وسى» دەپ ايتىلا باستاعاندا, بۇعان اۋدان اكىمدىگى دە نازار اۋدارىپ, اينالاسىن اباتتاندىرىپ, كوممۋنالدىق مەنشىككە الادى. بۇگىندە جەرگىلىكتى ماڭىزعا يە كيەلى نىساندار ساناتىنا ەنگەن احاڭنىڭ ءۇيى اۋىل اكىمدىگىنە قارايدى. ۇيگە ەلەكتر سىمى تارتىلعان. بىراق ىشىندە جالعىز سىنىق پارتا مەن سۋىق پەش جانە تورگى بولمەگە ىلىنگەن «رۋحاني جاڭعىرۋ» دەپ جازىلعان الاش كوسەمدەرىنە ارنالعان بيلبوردتان باسقا تۇك جوق. جادىگەرسىز مۋزەي سەكىلدى قاڭىراپ بوس تۇر.
بيىل يۋنەسكو كولەمىندە اتاپ وتىلەتىن مەرەيتوي بارىسىندا احاڭنىڭ بۇل ءۇيى دە جوندەلىپ, بۇتىندەلەتىن بولىپتى. مۇنى جانگەلدين اۋدانىنىڭ اكىمى شوتا وسپانوۆتان ەستىدىك.
– سول جەردەگى ەكى اۋىلدىڭ تۇرعىندارى جىلدا اقتاپ, سىرلاپ, ماڭايىنىڭ تازالىعىن ساقتاپ كەلدى. الداعى ۋاقىتتا احمەت بايتۇرسىن ۇلىنىڭ 150 جىلدىق مەرەيتويىنىڭ اياسىندا وسى ءۇيدى جاڭارتۋ ماسەلەسىن قولعا الايىن دەپ وتىرمىز. جوسپار بويىنشا احاڭ ءۇيىنىڭ قازاقى كەلبەتى ساقتالادى. ءبىزدىڭ جاساپ قويعان جوبامىزبەن وبلىس اكىمى تانىسىپ, بۇعان تاعى دا ءوزىمىز الىپ-قوساتىن بولامىز دەدى. ويتكەنى ءبىزدىڭ جوبامىز شامالى قازىرگى ۇلگىگە جاقىنداپ كەتىپتى. سوندىقتان بۇل جوبامەن ءتيىستى ماماندار تاعى اينالىسادى. وعان 22 ملن تەڭگە ءبولىندى. ەندى مەملەكەتتىك ساتىپ الۋ وتكىزىپ, مەردىگەردى انىقتاۋ جۇمىسى قالدى. باستى ماقسات – ءۇيدىڭ ىشىنە كىرگەندە سول زاماننىڭ رۋحى سەزىلىپ تۇرۋعا ءتيىس. قازىرگىدەي توبەسى الاسا بولمايدى. احاڭنىڭ اتالارى دا, اكەسى دە داۋلەتتى ادامدار بولعان. سوندىقتان بۇل ءۇيدى دە سول كەزدەگى اۋقاتتى ادامداردىڭ تۇرمىسىنا لايىقتاپ جابدىقتايمىز, – دەدى اكىم.
قوستاناي وبلىسى