ۇلىبريتانيا پرەمەر-ءمينيسترى بوريس دجونسوننىڭ باسى تاعى دا داۋعا قالدى. كوروناۆيرۋس پاندەمياسى كەزىندە جاريالانعان لوكداۋنعا قاراماستان «داۋنينگ ستريتتە» سالتاناتتى كەشتەر وتكىزگەنى ءۇشىن ونى تۇماندى البيوننىڭ تۇرعىندارى عانا ەمەس, پارتيالاستارى دا سىنعا الدى. ءتىپتى وعان سەنىمسىزدىك ءبىلدىرىپ, قىزمەتىنەن كەتۋدى تالاپ ەتكەندەر دە بار.
ماسەلە بىلاي باستالعان ەدى. بىلتىر, ياعني 2021 جىلعى 30 قاراشادا Daily Mirror باسىلىمى «داۋنينگ ءستريتتىڭ» كەيبىر قىزمەتكەرلەرىنىڭ كارانتيندىك تالاپتاردى بۇزعانى تۋرالى اقپارات تاراتتى. ولار 2020 جىلعى قاراشا جانە جەلتوقسان ايلارىندا بىرنەشە كەشكە قاتىسقان كورىنەدى. سونداي جيىنداردىڭ بىرىنە پرەمەر-مينيستر بوريس دجونسوننىڭ دا كەلگەنى ايتىلدى.
ال ول كەزدە ۇلىبريتانيادا قاتاڭ لوكداۋن ەنگىزىلگەن-تۇعىن. سوعان سايكەس قاتىسۋشىلار سانى 6 ادامنان اساتىن كەز كەلگەن باسقوسۋعا تىيىم سالىندى. Daily Mirror-دە الگى ماقالا جاريالانعاننان كەيىن ب.دجونسون ءاردايىم كارانتين تالاپتارىن ساقتاپ جۇرەتىنىن العا تارتقان-دى. پرەمەر-ءمينيستردىڭ ءباسپاسوز قىزمەتى مۇنداي ءىس-شارانىڭ بولعانىن جوققا شىعاردى.
سەنساتسيالىق جاڭالىق تارالعان سوڭ باسقا دا مەديا وكىلدەرى وعان ەرەكشە نازار اۋدارعان. ءسويتىپ, تۇماندى البيونداعى بۇقارالىق اقپارات قۇرالدارى «داۋنينگ ءستريتتىڭ» ماسەلەسىن مايشاممەن قاراۋعا كىرىستى. ماسەلەن, BBC اگەنتتىگى جەلتوقسانداعى باسقوسۋدا ىشىمدىك ءىشىلىپ, ويىن وينالعانىن حابارلادى. Financial Times گازەتى دە جيىننىڭ بولعانىن راستادى.
مۇنداي جاڭالىق اعىلشىن قوعامىن بەي-جاي قالدىرعان جوق. ويتكەنى جيىندار ەلدە قاتاڭ لوكداۋن جاريالانعان كەزدە وتكەن. حالىقتى ساقتانۋعا شاقىرىپ, وزدەرى مامىراجاي تويلاتىپ جۇرگەن شەنەۋنىكتەردىڭ ارەكەتى سىنعا الىندى. پرەمەر-ءمينيستردىڭ ءباسپاسوز حاتشىسى باسقوسۋدا الەۋمەتتىك قاشىقتىق ساقتالىپ, كارانتيندىك تالاپتار ورىندالعانىن العا تارتتى. «داۋنينگ ءستريتتىڭ» اينالاسىندا جۇرگەن باسقا دا قىزمەتكەرلەر زاڭسىزدىققا جول بەرىلمەگەنىن دالەلدەۋگە تالپىنعان.
جەلتوقساندا دالەلدى ۆيدەو جاريالانباعاندا, اعىلشىن شەنەۋنىكتەرى وسىلايشا جاۋاپكەرشىلىكتەن قۇتىلىپ كەتەر مە ەدى, كىم ءبىلسىن؟ 7 جەلتوقساندا ITV ارناسى «داۋنينگ ءستريتتىڭ» ءباسپاسوز حاتشىسى اللەگرا ستراتتوننىڭ ارىپتەستەرىمەن روجدەستۆو كەشىن تويلاعانى تۋرالى ازىلدەسكەنى كورسەتىلگەن ۆيدەو جاريالادى. سونداي-اق The Guardian, Times باسىلىمدارى دا وقيعادان شەت قالعان جوق. اتالعان گازەتتەر وزدەرىنىڭ دەرەككوزدەرىنە سۇيەنىپ, كەشتىڭ قالاي وتكەنىن ەگجەي-تەگجەيلى جاريالادى.
وسى ۆيدەو جاريالانعاننان كەيىن اللەگرا ستراتتون ءوز ەركىمەن قىزمەتىنەن كەتتى. سونىمەن قاتار كەشكە قاتىسقان شون بەيلي دە لوندون اسسامبلەياسىنىڭ پوليتسيا جانە قىلمىس كوميتەتىنىڭ توراعاسى قىزمەتىنەن بوسادى. بيىلعى قاڭتاردا كارانتيندىك تالاپتار ساقتالماعان جيىندارعا 30-40 شەنەۋنىكتىڭ قاتىسقانى بەلگىلى بولدى.
بوريس دجونسون سودان سوڭ عانا باسقوسۋعا قاتىسقانىن راستاپ, كەشىرىم سۇرادى. سونىمەن قاتار ول حانزادا ءفيليپتىڭ جانازاسى شىعاردان ءبىر كۇن بۇرىن «داۋنينگ ستريتتە» كوڭىلدى جيىن وتكىزگەنى ءۇشىن دە پاتشايىم ەليزاۆەتا II-دەن عافۋ ءوتىندى. ول كەزدە دە انگليادا قاتاڭ لوكداۋن جاريالانعان ەدى.
بۇل از دەسەڭىز, بۇكىل ەل كارانتين تالاپتارىنا مويىنسۇنىپ جۇرگەندە «داۋنينگ ستريت» بوريس دجونسوننىڭ تۋعان كۇنىن دۇركىرەتىپ تويلاپتى. انگلياداعى بۇقارالىق اقپارات قۇرالدارى سالتاناتتى كەشتىڭ قالاي وتكەنىن تاپتىشتەپ بايانداپ بەردى.
ماسەلەن, تۋعان كۇنگە ارنالعان باسقوسۋعا 30-عا جۋىق ادام قاتىسقان ەكەن. مەيمانداردىڭ اراسىندا پرەمەر-ءمينيستردىڭ پاتەرىنە جوندەۋ جۇمىستارىن جۇرگىزگەن اتاقتى ديزاينەر لۋلۋ لايتل بار. ديزاينەرگە ەرەكشە توقتالۋىنىڭ سەبەبى مىنادا. ونىڭ ب.دجونسوننىڭ پاتەرىنە جاساعان جوندەۋ جۇمىسى قوعامدا قىزۋ تالقىلانعان ەدى. ايتسە دە «داۋنينگ ستريت» پرەمەر-ءمينيستردىڭ پاتەرىندە وتكەن كەشتى جوققا شىعارىپ وتىر.
پرەمەر-ءمينيستردىڭ اينالاسىنداعى شەنەۋنىكتەردىڭ كوروناۆيرۋس ىندەتىنە قاراماستان تويلاتىپ جۇرگەنى انىقتالعاننان سوڭ مينيسترلەر كابينەتى ارنايى تەكسەرۋ جۇرگىزۋگە كىرىستى. باستاپقىدا بۇل مىندەت مينيسترلەر كابينەتىنىڭ حاتشىسى سيمون كەيزگە جۇكتەلگەن-ءدى. بىراق ول دا 2020 جىلعى 17 جەلتوقساندا وتكەن كەشكە قاتىسقاندىقتان, تەكسەرۋدەن شەتتەتىلدى.
سوندىقتان تەكسەرۋ مينيسترلەر كابينەتىنىڭ ەكىنشى تۇراقتى حاتشىسى سيۋ گرەيگە جۇكتەلدى. ءبىر ايعا سوزىلعان جۇمىس ناتيجەسىندە 31 قاڭتاردا گرەي حانىم 11 بەتتىك الدىن-الا قورىتىندىنى جاريالادى. سوعان سايكەس جيىننىڭ باسىم بولىگىندە كارانتيندىك تالاپتار ساقتالماعان. كەي باسقوسۋ ۇكىمەتتە جۇمىس ىستەيتىندەرگە ءتان ەمەس, ۇلىبريتانيا حالقىنىڭ ءۇمىتىن اقتاماعانى ايتىلعان. سونىمەن قاتار جۇمىس ۋاقىتىندا كوپ مولشەردە الكوگولدى ىشىمدىك ىشىلگەنى دە سىنعا الىندى.
قىسقاسى, سيۋ گرەي «داۋنينگ ستريت» جىبەرگەن كەمشىلىكتەردى جىپكە ءتىزىپ شىققان. ول قورىتىندىنىڭ ءبىر كوشىرمەسىن بوريس دجونسونعا جىبەرسە, ەكىنشىسىن پارلامەنتتە تانىستىردى.
بايانداما جاريالانعاننان كەيىن دەپۋتاتتار ب.دجونسوننىڭ ماسەلەسىن مايشاممەن قاراعانىن ايتا كەتكەن ءجون. حالىق قالاۋلىلارىنىڭ الدىندا ابدەن تەرلەگەن پرەمەر-مينيستر تاعى دا كەشىرىم سۇراپ, كەڭسەسىندە وزگەرىس جاسايتىنىن ايتىپ ۋادە بەردى.
«كەشىرىم سۇرايمىن. ءبارىن ءتۇسىندىم, تۇزەتەمىن ەندى. جيىندى وتكىزگەنىمىز ءۇشىن كەشىرىم سۇرايمىن», دەدى ول.
نەگىزگى وپپوزيتسيالىق لەيبوريستەر پارتياسىنىڭ جەتەكشىسى كەير ستارمەر ونىڭ وزىنەن باسقالاردىڭ ءبارىن كىنالايتىنىن سىنعا الىپ, ب.دجونسوندى وتستاۆكاعا كەتۋگە شاقىردى. «پرەمەر-ءمينيستردىڭ ءوزى قازىر قىلمىستىق تەرگەۋگە تارتىلىپ جاتقانىنا كۇمان جوق», دەدى ستارمەر.
قازىرگى تاڭدا پوليتسيا تەرگەپ جاتقان وقيعالاردىڭ قاتارىندا 2020 جىلدىڭ ماۋسىمىندا وتكەن ب.دجونسوننىڭ تۋعان كۇنىنە ارنالعان كەش جانە 2021 جىلدىڭ ءساۋىر ايىندا حانزادا ءفيليپتى جەرلەۋ قارساڭىندا وتكەن ەكى جيىن بار.
دەپۋتاتتار الدىندا بوريس دجونسون وزىنە تاعىلعان ايىپتاردى جوققا شىعارىپ, قىزمەتىنەن كەتۋگە نيەتسىز ەكەنىن مالىمدەدى. دەگەنمەن ونىڭ ورىنتاعىنان باس تارتاتىن كەزى جاقىنداپ قالعان سىڭايلى. ويتكەنى وسى وقيعالاردان كەيىن دجونسوننىڭ حالىق الدىندا دا, پارلامەنت الدىندا دا ابىرويى تومەندەپ كەتتى.
ءتىپتى پارتيالاستارىنىڭ ءوزى ونىڭ ارەكەتىن سىنعا الدى. ماسەلەن, كونسەرۆاتيۆتىك پارتياسىنىڭ كەيبىر زاڭگەرلەرى سيۋ گرەيدىڭ زەرتتەۋى دجونسوننىڭ وتىرىك ايتقانىن انىقتاسا, وعان سەنىمسىزدىك ءبىلدىرۋ ماسەلەسىن قارايتىنىن حابارلاعان.
تاياۋدا اتالعان پارتيانىڭ دەپۋتاتتارى سەنىمسىزدىك ءبىلدىرۋ حاتىن جولدادى. نەگىزى ولار پرەمەر-ءمينيستردى اشىق سىناۋىنا بولمايدى. بىراق دجونسوننىڭ ارەكەتى پرەمەر-ءمينيستردىڭ بەدەلىنە نۇقسان كەلتىرگەندىكتەن, وسىنداي قادامعا بارعان.
دەپۋتات پيتەر ولدوس پرەمەر-مينيسترگە سەنىمسىزدىك حاتىن تاپسىرعانىن مالىمدەدى. ونىڭ ايتۋىنشا, بۇل ەلدىڭ دە, ۇكىمەتتىڭ دە, كونسەرۆاتيۆتىك پارتيانىڭ دا مۇددەسى ءۇشىن قاجەت. «جان-جاقتى اقپارات جيناپ, جاعدايعا قانىققاننان كەيىن پرەمەر-مينيستر وتستاۆكاعا كەتۋى كەرەك دەگەن قورىتىندىعا كەلدىم», دەپ جازدى ولدوۋس تۋيتتەردە.
كارشالتون مەن ۋوللينگتون ايماعىنان كەلگەن دەپۋتات ەلليوت كولبەرن شىدامى تاۋسىلعانىن ايتىپ, سەنىمسىزدىك بىلدىرگەندەر قاتارىندا بولعانىن يشارالادى. «ەگەر مەن پرەمەر-مينيستر بولعانىمدا, قىزمەتىمنەن كەتەر ەدىم», دەپ جازدى ول.
«بوريس دجونسوننىڭ ەلدى باسقارۋعا مورالدىق قۇقىعى جوق. الدا-جالدا تاعى ءبىر توتەنشە جاعداي بولا قالسا, قوعامنان ارەكەت ەتۋدى سۇراۋعا ونىڭ قۇقىعى جوق», دەيدى ەندريۋ بريدجن.
ەگەر كونسەرۆاتيۆتىك پارتيانىڭ بيۋرو مۇشەلەرى كوميتەتىنىڭ باسشىسى گرەم برەديگە 54 دەپۋتات سەنىمسىزدىك بىلدىرگەن حاتىن تابىستاسا, وندا پارتيانىڭ ىشىندە داۋىس بەرۋ وتەدى. سوعان سايكەس بوريس دجونسوننىڭ قىزمەتتەگى تاعدىرى شەشىلەدى. ازىرگە پارتيانىڭ 17 دەپۋتاتى عانا مۇنداي قادامعا بارعان.
قورىتا ايتقاندا, قاراپايىم كوڭىلدى كەشتەن باستالعان داۋ بوريس دجونسون ءۇشىن قيىنعا تيەتىن ءتۇرى بار. پرەمەر-ءمينيستردىڭ بەدەلى كونسەرۆاتيۆتىك پارتياسىنىڭ ىشىندە دە «شايقالا» باستاعانىن ەسكەرسەك, ونىڭ قىزمەتىمەن قوشتاسۋىنا كوپ ۋاقىت قالماعان سەكىلدى.