ەلەكتر قۋاتىنىڭ باعاسى 2021 جىلعى دەڭگەيدە ساقتالادى. بۇل تۋرالى ەنەرگەتيكا ءمينيسترى بولات اقشولاقوۆ ورتالىق كوممۋنيكاتسيالار قىزمەتىندە وتكەن بريفينگىدە ءمالىم ەتتى, دەپ حابارلايدى Egemen.kz.
مينيستر باق وكىلىنىڭ سۇراعىنا جاۋاپ بەرە كەلىپ, باعانى رەتتەيتىن ناقتى تەتىكتەردى قولدانىسقا ەنگىزۋ ءۇشىن پرەزيدەنت شەشىمىمەن 180 كۇن بەلگىلەنگەنىن ەسكە سالدى.
«جوسپار بويىنشا, جەتكەن شەشىمىمىز بويىنشا 2022 جىلى ەلەكتر قۋاتىنىڭ باعاسى 2021 جىلعى دەڭگەيدە ساقتالادى. وعان قوسىمشا جاڭا ءتارتىپ پەن ادىستەر ازىرلەنىپ جاتىر. بۇل – ەلەكتر قۋاتىمەن تولىقتاي جابدىقتاۋ جانە ۇلتتىق ەلەكتر جۇيەسىنىڭ تۇراقتىلىعىن ساقتاۋ. بۇل ەكەۋى – ەڭ ماڭىزدى ماسەلە», دەدى بولات اقشولاقوۆ.
ونىڭ سوزىنە قاراعاندا, ماينينگ فەرمالار تسيفرلىق ءوندىرىسى دە سالادا تاپشىلىق تۋعىزىپ وتىر. ولارمەن كۇرەس ەلدەگى ەلەكتر قۋاتىن اككۋمۋلياتسيالاناتىن گەنەراتسيانىڭ كولەمىن ۇلعايتۋ شارالارىمەن قاتار ءجۇرۋى كەرەك.
«ارينە, ماينەرلەر, باسقا دا زاڭسىز قوسىلۋشىلار سالاعا اسەر ەتىپ, تاپشىلىق تۋعىزىپ جاتىر. ولاردىڭ جولىن كەسۋ ءۇشىن قوسىمشا جۇمىس جۇرگىزەمىز. بىراق دەفيتسيت بولماس ءۇشىن ەڭ ءبىرىنشى گەنەراتسيانى كوبەيتۋىمىز كەرەك. ەكىنشىدەن, ەلەكتر جۇيەلەرىنىڭ ساپاسىن كوتەرۋىمىز كەرەك. سول جۇمىستىڭ ءبارىن ءبىز بەرىلگەن 180 كۇننىڭ ىشىندە ازىرلەپ, ىسكە قوسامىز. باعا جاعىنان ايتساق, بيىل ەلەكتر قۋاتىنىڭ اقىسىن 2021 جىلدىڭ دەڭگەيىندە ساقتاۋعا تىرىسامىز», دەدى مينيستر.