سەناتور اقمارال ءالنازاروۆا ايتۆ-جۇقپاسى دياگنوستيكا جاساۋدى باسەكەلەستىك ورتاسىنا بەرۋدى ءالى ەرتە دەپ سانايدى. ول ۇكىمەت باسشىسى ءاليحان سمايىلوۆتىڭ اتىنا جولداعان دەپۋتاتتىق ساۋالىندا وسى ماسەلەگە الاڭداۋشىلىعىن ءبىلدىردى, دەپ حابارلايدى Egemen.kz.
باسەكەلەستىكتى قورعاۋ مەن دامىتۋدىڭ 2026 جىلعا دەيىنگى جاڭا تۇجىرىمداماسىنا سايكەس ايتۆ ينفەكتسياسىنا دياگنوستيكا جاساۋدى جەكە مەديتسينالىق ورتالىقتار مەن زەرتحانالارعا بەرىلۋى ءتيىس. الايدا, سەناتور اتاپ وتكەندەي, بۇل بولاشاقتا ەلدەگى ايتۆ-مەن اۋىرۋ جاعدايىن ناشارلاتاتىن بىرقاتار پروبلەماعا الىپ كەلەتىن بولادى.
تۇجىرىمداما ايتۆ دياگنوستيكاسىنىڭ ءبىرىنشى كەزەڭىنىڭ عانا باسەكەلەس ورتاعا بەرىلۋىن كوزدەيدى. دەپۋتات تالداۋ ناتيجەسى وڭ بولعان جاعدايدا, بۇل بەرىلۋ جولدارى مەن فاكتورلارىن انىقتاۋ, بايلانىس جاساۋشىلاردى ىزدەۋ جانە زەرتتەۋ جونىندەگى دايەكتى تىزبەكتىڭ بۇزىلۋىنا اكەلەدى دەپ سانايدى.
«بۇرىن قازاقستاندا جىنىستىق جولمەن بەرىلەتىن ينفەكتسيالار مەن گەپاتيتتەرگە زەرتتەۋ جۇرگىزۋدى باسەكەلەستىك ورتاعا بەرۋ تاجىريبەسى بولعان. ناتيجەسىندە ءبىز وسى اۋرۋلاردىڭ تارالۋىن باقىلاۋدى جوعالتىپ الدىق. بۇگىنگى تاڭدا ەلدە ولار بويىنشا ناقتى ستاتيستيكا جوق جانە تيىسىنشە وسى ينفەكتسيالارعا جاۋاپ بەرۋ باعدارلاماسى جوق», دەدى اقمارال ءالنازاروۆا.
دەپۋتات سونداي-اق حالىقارالىق تاجىريبەدەگى كەلەڭسىز دەرەكتەردى دە اتاپ ءوتتى. ونىڭ ايتۋىنشا, كورشى رەسەيدە دە ايتۆ زەرتتەۋىنىڭ 1 كەزەڭى باسەكەلەستىك ورتاعا بەرىلگەننەن كەيىن بۇل اۋرۋدىڭ تەز تارالۋىنا اكەلىپ سوققان. ناتيجەسىندە ولار بىرنەشە رەت ايتۆ-ينفەكتسياسىنىڭ دياگنوستيكاسىن مەملەكەتتىك مەديتسينالىق مەكەمەلەرگە قايتارۋعا ءماجبۇر بولعان كورىنەدى.
سەناتور وسىعان وراي مينيسترلەر كابينەتىنىڭ باسشىسىنا جولداعان ساۋالىندا ايتۆ-ينفەكتسياسىنا دياگنوستيكا جاساۋدى ءتيىستى جۇيەلى دايىندىقسىز جانە ماسەلەنى مۇقيات زەرتتەمەي تۇرىپ باسەكەلەستىك ورتاسىنا بەرمەۋدى ءوتىندى.