ساياسي قۋعىن-سۇرگىن قۇرباندارىن تولىق اقتاۋ بويىنشا مەملەكەتتىك كوميسسيانىڭ قىزمەتىن قامتاماسىز ەتۋ جونىندەگى جوبالىق كەڭسەنىڭ كادرلىق قۇرامى كۇشەيتىلدى.
ساياسي قۋعىن-سۇرگىن قۇرباندارىن تولىق اقتاۋ بويىنشا مەملەكەتتىك كوميسسيا پرەزيدەنت جارلىعىمەن 2020 جىلعى 24 قاراشادا قۇرىلدى. وتكەن جىلى اۋقىمدى ۇيىمداستىرۋشىلىق-دايىندىق جۇمىستارى جۇرگىزىلدى. اتاپ ايتقاندا, قازاقستانداعى ساياسي قۋعىن-سۇرگىن قۇرباندارىنىڭ نەگىزگى ساناتتارىن جان-جاقتى زەرتتەۋ ماقساتىندا تاقىرىپتىق باعىتتارى بويىنشا ماقساتتى توپتاردان قۇرالعان 10 جۇمىسشى توبى, 17 ايماقتىق كوميسسيا قۇرىلدى, ادىستەمە ازىرلەندى, وسىعان دەيىن جابىق بولعان قورلار مەن ماتەريالدار اشىلىپ, كوپتەگەن ىستەر اتقارىلدى. 2021 جىلى ساياسي قۋعىن-سۇرگىن قۇرباندارىن تولىق اقتاۋ بويىنشا ۇيىمداستىرۋشىلىق-ىزدەستىرۋ كەزەڭى اياقتالدى.
ەكىنشى كەزەڭدە جيناقتالعان جانە كەلىپ ءتۇسىپ جاتقان ماتەريالداردى, ارحيۆتەردى جانە قۇقىققورعاۋ ورگاندارى مەن ايماقتىق كوميسسيالار جيناعان تاجىريبەلەردى سۇرىپتاۋ, تالداۋ ءۇشىن بىلىكتى ماماندار مەن عالىمدار قاجەت بولادى. سايكەسىنشە, بۇل كەزەڭدە جيناقتالعان ماتەريالداردى زەرتتەۋ مەن جۇيەلەۋ بويىنشا تەرەڭ تالداۋ جۇمىستارىن جۇرگىزۋ كوزدەلۋدە. بۇل باعىتتاعى جۇمىستار جوبالىق كەڭسەنىڭ قىزمەتكەرلەرىنەن بەلسەندىلىكتى, وسىعان ساي داعدىلار مەن بىلىكتىلىكتى تالاپ ەتەدى.
مەملەكەت باسشىسىنىڭ جارلىعىن ورىنداۋ ماقساتىندا پرەمەر-مينيستر 2022 جىلعى 14 قاڭتاردا جوبالىق ءوفيستىڭ كادرلىق قۇرامىن كۇشەيتۋ بويىنشا وكىم شىعاردى.
مەملەكەت باسشىسىنىڭ كوميسسيا الدىنا قويىپ وتىرعان مىندەتتەرىن ورىنداۋدىڭ جوعارى دەڭگەيدەگى جاۋاپكەرشىلىگىنە بايلانىستى جوبالىق كەڭسەنىڭ كادرلىق قۇرامىن مەملەكەتتىك كوميسسيا جۇمىسىنىڭ بۇكىل كەزەڭىندە ولاردىڭ جالاقىلارى مەن بارلىق الەۋمەتتىك تولەمدەرىن ساقتاي وتىرىپ, مۇددەلى مەملەكەتتىك ورگانداردىڭ قىزمەتكەرلەرىمەن, عىلىمي مەكەمەلەر مەن جوعارى وقۋ ورىندارىنىڭ وكىلدەرىمەن جاڭارتۋ جانە كۇشەيتۋ جۇمىستارى جۇرگىزىلدى.
2022 جىلعى 31 قاڭتاردا نۇر-سۇلتان قالاسىنداعى جوبالىق كەڭسەدە جاڭا قۇراممەن جينالىس وتكىزىلىپ, وندا مەملەكەتتىك كوميسسيانىڭ جوبالىق كەڭسەسىنىڭ جەتەكشىسى س.ا.قاسىموۆ بايانداما جاسادى. جينالىسقا پرەزيدەنت اكىمشىلىگى ىشكى ساياسات ءبولىم باسشىسىنىڭ ورىنباسارى ۆ.ۆ.پورۋبايمەح, ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى ز.ە.قابىلدينوۆ جانە جوبالىق كەڭسەنىڭ جاڭا قۇرامى قاتىستى. جوبالىق كەڭسەنىڭ جاڭا قۇرامى وزدەرىنىڭ لاۋازىمدىق مىندەتتەرىنە سايكەس جۇمىسقا كىرىستى.