قازاقستان پرەزيدەنتى قاسىم-جومارت توقاەۆ «حابار 24» تىلشىسىنە بەرگەن سۇحباتىندا ۇقشۇ-نىڭ قاڭتارداعى تارتىپسىزدىك كەزىندەگى كومەگى تۋرالى ءتۇسىندىردى, دەپ حابارلايدى Egemen.kz.
«ۇجىمدىق قاۋىپسىزدىك تۋرالى شارت ۇيىمى ءبىزدىڭ ورتاق ۇيىمىمىز بولىپ تابىلادى. قازاقستان 1992 جىلى بۇل ۇيىمنىڭ قاتىسۋشىسى رەتىندە ونى قۇرۋعا قاتىستى. ەلباسى نۇرسۇلتان نازارباەۆ ءتيىستى باستاما كوتەرگەن بولاتىن. ەستەرىڭىزگە سالا كەتەيىن, ۇيىم 1992 جىلدىڭ مامىر ايىندا, شامامەن 30 جىل بۇرىن قۇرىلعان. ياعني, ۇقشۇ-عا ءوتىنىش بىلدىرە وتىرىپ, مەن بوتەن ادامدارعا جۇگىنبەدىم,ء ىس جۇزىندە وداقتاستارىما جۇگىندىم», دەدى پرەزيدەنت.
مەملەكەت باسشىسىنىڭ ايتۋىنشا, ۇقشۇ بىتىمگەرشىلىك كونتينگەنتىن تارتۋ ۇيىمنىڭ شارتتىق قۇجاتتارىنا سايكەس ورىندالعان. قازاقستانعا كەلگەن بىتىمگەرشىلىك كونتينگەنتى بىردە-ءبىر وق اتقان جوق. باسىنان باستاپ بۇل كونتينگەنت ستراتەگيالىق وبەكتىلەردى كۇزەتەدى دەگەن كەلىسىم بولعان.
«بىتىمگەرشىلىك كونتينگەنتىنىڭ قازاقستانعا كەلۋى تۋرالى حاباردىڭ ءوزى لاڭكەستەرگە قارسى جاسالعان ماڭىزدى پسيحولوگيالىق شابۋىل بولعانىن دا اتاپ وتكەن ءجون. بىرىككەن كونتينگەنتتە رەسەيدەن باسقا بەلارۋس, تاجىكستان, ارمەنيا جانە قىرعىزستاننىڭ اسكەري بولىمدەرى بولدى», دەپ قوستى قاسىم-جومارت توقاەۆ.