سەناتور ناريمان تورەعاليەۆ وندىرىستەگى جاراقاتتانۋدىڭ جوعارى دەڭگەيىنە الاڭداۋشىلىق ءبىلدىردى, دەپ حابارلايدى Egemen.kz.
سپيكەر ۇسىنعان دەرەكتەرگە سايكەس, جىل سايىن ەلىمىزدە 1 500-گە جۋىق ادام وندىرىستە جاراقات الادى, ونىڭ ىشىندە 200-دەن استام جۇمىسشى قايتىس بولادى, ال 600 ادام ەڭبەك جاراقاتتارى مەن كاسىبي اۋرۋلار سالدارىنان مۇگەدەكتىك الادى.
«2020 جىلى جۇرگىزىلگەن تەكسەرۋ ناتيجەلەرى بويىنشا 1,6 ملن جۇمىسكەردىڭ 22%-ى زياندى جانە قاۋىپتى ەڭبەك جاعدايلارىندا جۇمىس ىستەيتىنى انىقتالدى. ناتيجەسىندە جىل سايىن 500-گە جۋىق ادامدا كاسىپتىك اۋرۋلاردىڭ العاشقى بەلگىلەرى تىركەلەدى. بۇدان باسقا, 2020-2021 جىلدارى ەڭبەك ينسپەكتورلارى انىقتاعان 11 مىڭنان استام بۇزۋشىلىقتاردىڭ 34%-ى ەڭبەك قاۋىپسىزدىگى جانە ەڭبەكتى قورعاۋ سالاسىندا تىركەلگەن», دەدى ناريمان تورەعاليەۆ پالاتانىڭ جالپى وتىرىسىندا.
قازىرگى ۋاقىتتا ەلىمىزدە جۇمىس ىستەپ تۇرعان 300 مىڭعا جۋىق كاسىپورىن بار. الايدا, ولار بويىنشا مەملەكەتتىك باقىلاۋدى تەك 237 ەڭبەك ينسپەكتورى جۇرگىزەدى. ينسپەكتورلاردىڭ مۇنداي جەتىسپەۋشىلىگىنە بايلانىستى جىل سايىن ۇيىمدار مەن كاسىپورىنداردىڭ تەك 3%-ىن تەكسەرۋلەرمەن قامتۋ مۇمكىن بولىپ وتىر. بۇل, سەناتور ءتۇسىندىرىپ وتكەندەي, قۇزىرەتتى ورگاندار وندىرىستەگى جازاتايىم وقيعالاردىڭ الدىن الۋمەن كۇرەسپەيدى, تەك پوستفاكتۋم جۇمىس ىستەيدى.
سونىمەن قاتار, كاسىپكەرلىك كودەكسىنە سايكەس ينسپەكتورلار جوسپارلى تەكسەرۋ جۇرگىزۋ تۋرالى 30 كۇنتىزبەلىك كۇن بۇرىن ەسكەرتۋگە مىندەتتى. قىزمەتكەرلەردىڭ ءومىرى مەن دەنساۋلىعىن قورعاۋ ءۇشىن حالىقارالىق ەڭبەك ۇيىمىنىڭ نورمالارى بويىنشا ينسپەكتورلار جوسپاردان تىس تەكسەرۋلەر جۇرگىزۋگە دە قۇقىلى بولۋى ءتيىس.
«كاسىپكەرلىك كودەكستە كوزدەلگەن ەڭبەك ينسپەكتورلارىنىڭ قىزمەتىن شەكتەۋ تۋرالى نورمالاردى حالىقارالىق ەڭبەك ۇيىمىنىڭ كونۆەنتسيالارىنا سايكەس كەلتىرۋ ماڭىزدى دەپ سانايمىز. سونىمەن قاتار, مەملەكەتتىك ەڭبەك ينسپەكتورلارىنىڭ سانىن ارتتىرۋ ماسەلەسىن پىسىقتاۋ, سونداي-اق وندىرىستەگى جازاتايىم وقيعالار فاكتىسى تۋرالى ۋاقتىلى حابارلاماعانى ءۇشىن جۇمىس بەرۋشىنىڭ اكىمشىلىك جاۋاپكەرشىلىگىن كۇشەيتۋ ماسەلەسىن قاراۋ قاجەت», دەدى سەناتور.
دەپۋتات سەناتورلاردىڭ باستاماسى بويىنشا قازىر ەلىمىزدىڭ ەڭبەك كودەكسىنە ءتيىستى وزگەرىستەر مەن تولىقتىرۋلار ەنگىزۋ تۋرالى زاڭ جوباسىن ازىرلەۋگە دايىندالىپ جاتقانىن اتاپ ءوتتى.