كەنشىلەر استاناسىنداعى تاتتىمبەت اتىنداعى ونەر كوللەدجىنىڭ سوڭعى كۋرسىندا وقيتىن ارىستان ءابىلدين ونەر جولىنداعى ەڭ ۇلكەن تابىسىنا قول جەتكىزدى. دارىندى جاس اسا تانىمال Slava Marlow & Morgenshtern ەسىمدى انشىلەردىڭ «بىسترو» دەگەن تۋىندىسىن ورىنداپ, كاۆەردى 45 ميلليون ادام تىڭداعان.
وسى جانە وتكەن جىلدىڭ قورىتىندىسى بويىنشا باسقا دا شىعارماشىلىق تابىستارى ءۇشىن ول ەكى بىردەي پلاتينا ديسكىسىنە يە بولدى.
ارىستاننىڭ ءوزى بۇل تۋراسىندا Instagram پاراقشاسىندا بىلاي دەپ جازدى: «بىسترو» ءانى 45 ميلليون تىڭداۋدى جيناپ, قوس پلاتينا ديسكىسىن الدى. كەزىندە مەن انشىلەردىڭ وسىنداي ماراپاتتار الىپ جاتقانىن كورىپ, مۇندايدى تەك قانا ارمانداۋشى ەدىم. كۇندەردىڭ ءبىر كۇنىندە ءوز جۇمىسىم ءۇشىن پلاتينا الاتىنىمدى كوز الدىما ەلەستەتە دە الماعانىم راس. مەنى قولداعاندارىڭىز ءۇشىن بارشاڭىزعا العىس ايتامىن».
ارىستان ءابىلدين مۋزىكالىق وتباسىندا دۇنيەگە كەلگەن. ونىڭ اكەسى جەرگىلىكتى «شىڭداۋىل» اتتى ءانسامبلدىڭ ديرەكتورى, مۋزىكانىڭ دجاز تۇرىمەن اينالىسادى. ال اناسى مۋزىكالىق كوللەدجدەگى حوردىڭ ديريجەرى.
Colorit پسەۆدونيمىمەن ونەر كورسەتىپ جۇرگەن ارىستان ءابىلدين بىلتىر حالىقارالىق TikTok كونكۋرسىندا توپ جارعان بولاتىن.
جاس دارىننىڭ بولاشاقتاعى جوسپارى دا زور. ازىرگە ول الەۋمەتتىك جەلىلەردەگى تانىمالدىلىعىن ارتتىرۋمەن اينالىسىپ ءجۇر. قازىردىڭ وزىندە ونىڭ ينستاگرام, تيكتوك جانە ۆك توبىندا ءجۇز مىڭداعان جازىلۋشىسى بار. بۇل دەگەنىڭىز, جاس ءانشىنى تىڭدايتىن اۋديتوريانىڭ اياسى كۇننەن-كۇنگە ۇلعايىپ كەلەدى دەگەن ءسوز.
قاراعاندى