اتىراۋدا قاراقشىلىق جاساعان كۇدىكتىلەر ۇستالدى

20 قاڭتار كۇنى ساعات 22:18 شاماسىندا اتىراۋ قالاسى پوليتسيا باسقارماسىنىڭ «102» ارناسىنا 36 جاستاعى شىمكەنت قالاسىنىڭ تۇرعىنى قوڭىراۋ شالىپ, اتىراۋ قالاسىندا ورنالاسقان كوپقاباتتى ۇيلەردىڭ بىرىندەگى ۋاقىتشا تۇرىپ جاتقان مەكەنجايىنا ساعات 21:40 شاماسىندا بەلگىسىز ەكى ەر ادامنىڭ زاڭسىز كىرىپ, اسحانا پىشاعىمەن جانە قارۋعا ۇقساس زاتپەن قورقىتىپ, ۇرىپ-سوعىپ, ۇيالى تەلەفوندارىن, سمارت قول ساعاتىن, ەكى التىن سىرعاسىن, 40 مىڭ تەڭگە اقشاسىن تارتىپ العانىن حابارلاعان.

سونداي-اق زارداپ شەگۋشى 1,5 ملن تەڭگە كولەمىندەگى اقشاسىن تەلەفونداعى Kaspi قوسىمشاسى ارقىلى باسقا ەسەپشوتقا اۋدارتىپ العاندىعىن ايتتى. وقيعا ورنىنا دەرەۋ جەتكەن كريمينالدىق پوليتسيا ءبولىمىنىڭ جەدەل ۋاكىلدەرى مەن باتىس-18 قىزمەتكەرلەرىمەن جەدەل-ىزدەستىرۋ شارالارىن جۇرگىزۋ كەزىندە 26 جانە 24 جاستاعى ەكى كۇدىكتى ۇستالدى. ولاردان جوعارىدا اتالعان زاتتار مەن قوماقتى قارجى تاركىلەندى.

اتالعان دەرەك بويىنشا قر قك-ءنىڭ 192-بابىنىڭ 3-بولىگىمەن (قاراقشىلىق) قىلمىستىق ءىس تىركەلىپ, ەكى كۇدىكتى ۋاقىتشا ۇستاۋ يزولياتورىنا قاماۋعا الىندى.

قازىرگى ۋاقىتتا تەرگەپ-تەكسەرۋ جۇمىستارى جۇرگىزىلۋدە.