ىندەت قايتا ەتەك الا باستاعان قوستاناي وبلىسى دا «سارى ايماققا» كوشىپ, شەكتەۋ شارالارىن كۇشەيتتى. وبلىستىق دەنساۋلىق ساقتاۋ دەپارتامەنتى 10 قاڭتاردا 3 ادام COVID-19 جۇقتىردى دەپ مالىمەت بەرىپ ەدى, بۇل كورسەتكىش اينالدىرعان 6 كۇننىڭ ىشىندە ءجۇزدىڭ ۇستىنە ءبىر-اق شىقتى.
وبلىستىڭ باس سانيتارلىق دارىگەرى جاريا ەتكەن جاڭا قاۋلىعا سايكەس, بۇدان بىلاي توي-تومالاقتار مەن فورۋم, كونفەرەنتسيا سياقتى كوپشىلىك شارالاردى ۇيىمداستىرۋعا تىيىم سالىندى. تەك مارقۇمداردىڭ رۋحىنا دۇعا باعىشتاپ, اس بەرۋگە عانا رۇقسات بار. Ashyq قوسىمشاسى ورناتىلعان قوعامدىق تاماقتانۋ ورىندارىندا ءوتۋى ءتيىس مۇنداي شارالارعا ءارى كەتكەندە 30 ادام عانا قاتىسا الادى.
COVID-19-عا قارسى ۆاكتسينا قابىلداعان-قابىلداماعانىنا قاراماستان, مەملەكەتتىك مەكەمە قىزمەتكەرلەرىنىڭ كەم دەگەندە 80 پايىزى قاشىقتان جۇمىس ىستەۋگە كوشتى.
وبلىستىڭ باس سانيتارلىق دارىگەرى ەرمۇحانبەت داۋلەتباەۆتىڭ ايتۋىنشا, ەل ىشىندە ۇجىمدىق يممۋنيتەت تولىق قالىپتاستى دەۋگە ءالى ەرتە.
– «وميكروننىڭ» جۇعۋ جىلدامدىعى «دەلتا» شتامىنا قاراعاندا 5 ەسە جوعارى. بەتپەردەسىز ادامنىڭ قاسىندا بەس مينۋت تۇرعان ادامنىڭ ءوزى قاۋىپتى ىندەتتى جۇقتىرىپ الۋى مۇمكىن. كوروناۆيرۋس ينفەكتسياسىنىڭ باسقا تۇرلەرىندەي ەمەس, «وميكرون» 20-30 جاس ارالىعىنداعى ادامدارعا كوبىرەك جۇعادى. سوڭعى كەزدەرى تۇرعىنداردىڭ دەنى قوعامدىق ورىنداردا ساقتانىپ ءجۇرۋدى ۇمىتىپ, تارتىپكە سالعىرت قاراي باستادى. ناتيجەسىندە, ۆيرۋستى قايتا جۇقتىرىپ العان ناۋقاستار قاتارى كوبەيۋدە, – دەدى ە.داۋلەتباەۆ.
سونىمەن قاتار مەكتەپ وقۋشىلارى 31 قاڭتارعا دەيىن, ال جوعارى وقۋ ورىندارى مەن كوللەدج ستۋدەنتتەرى 6 اقپانعا دەيىن ونلاين رەجىمدە وقيتىن بولادى.
قوستاناي وبلىسى